މިއަންނަ އަހަރު ބޭއްވުމަށް ހަމަޖެހިފައިވާ އޭއެފްސީ އޭޝިއަން ކަޕް ހޯސްޓުކުރުމަށް ބިޑްކުރުމުގެ މުއްދަތު އޭއެފްސީން އިތުރުކޮށްފިއެވެ.
މީގެ ކުރިން މި މުބާރާތް ބޭއްވުމަށް ހަމަޖެހިފައި އޮތީ ޗައިނާގައެވެ. ނަމަވެސް އެގައުމުގައި ކޮވިޑުގެ ހާލަތު ގޯސްވުމުގެ ސަބަބުން މުބާރާތް ނުބޭއްވޭނެކަން ރަސްމީކޮށް އޭއެފްސީއަށް އެންގީ މިދިޔަ މެއި މަހުއެވެ. އެހެންކަމުން މުބާރާތް ހޯސްޓުކުރަން ބިޑް ކުރުމުގެ ފުރުސަތު އޭއެފްސީން ހުޅުވާލީ މި މަހުގެ ނިޔަލަށެވެ.
ނަމަވެސް އަންގާރަ ދުވަހު އޭއެފްސީން ވަނީ މި މުއްދަތު އިތުރުކޮށް، މިއަންނަ މަހުގެ 15އާ ހަމައަށް ބިޑް ހުށަހެޅުމުގެ ފުރުސަތު ހުޅުވާލާފައެވެ. 24 ގައުމަކުން ބައިވެރިވާ މި މުބާރާތް ބޭއްވުމަށް ތާވަލުކޮށްފައިވަނީ މިއަންނަ އަހަރުގެ ޖޫން މަހާއި ޖުލައި މަހުއެވެ.
މުބާރާތް ހޯސްޓު ކުރުމަށް ބިޑް ހުށަހެޅުމުގެ މުއްދަތު އިތުރުކޮށްފައިވާއިރު، ސައުތު ކޮރެއާގެ ފުޓްބޯޅަ އެސޯސިއޭޝަނުން މިދިޔަ ހަފުތާގައި ވަނީ މުބާރާތް ހޯސްޓުކުރުމަށް ބިޑް ހުށަހަޅާނެކަން އިއުލާނުކޮށްފައެވެ. މީގެ އިތުރުން މިދިޔަ މެއި މަހު ޖަޕާނުންވެސް ވަނީ މުބާރާތް ހޯސްޓުކުރުމުގެ ޝައުގުވެރިކަން ފާޅުކޮށްފައެވެ. އަދި އޮސްޓްރޭލިއާގެ ފުޓްބޯޅަ ފެޑެރޭޝަނުންވެސް، މުބާރާތް ހޯސްޓުކުރުމަށް އެގައުމަށް އޮތް ފުރުސަތުތައް ބަލަމުން އަންނަކަމަށް ބުނެފައިވެއެވެ.
