މަގާމުގައި އަހަރެއް ފުރިހަަމަ ނުވަނީސް ޖަޕާނުގެ ބޮޑުވަޒީރު ޝިގެރު އިޝިބާ އިސްތިއުފާ ދެއްވައިފިއެވެ.

ބޮޑު ވަޒީރު ގެ ނިންމުން އައިސްފައި ވަނީ އޭނާ ވެރިކަން ކުރައްވާ ލިބަރަލް ޑިމޮކްރެޓިކް ޕާޓީ (އެލްޑީޕީ) އިން ލީޑަރޝިޕް އިންތިޚާބަކަށް ދިއުމަށް ފެނެތޯ ބެލުަމަށް ވޯޓެއް ނެގުމަށް ނިންމުމާ އެކުގައެވެ.

އެލްޑީޕީ އިން ވޭތުވެދިޔަ ހަތް ދިހަ ވަރަކަށް އަހަރު ޖަޕާނުގައި ވެރިކަން ކޮށްފައިވީ ނަމަވެސް، އިޝިބާގެ ލީޑަރު ކަމުގައި ވޭތުވެ ދިޔަ 15 އަހަރު ގެ ތެރޭގައި ފުރަތަމަ ފަހަރަށް މަޖިލީހުގެ ތިރި ގޭގެ މެޖޯރިޓީ ގެއްލި، ޖުލައި މަހު މަތި ގޭގެ މެޖޯރިޓީ ވެސް ގެއްލުނެވެ.

ދުނިޔޭގެ ހަތަރު ވަނަ އަށް އެންމެ ބޮޑު އިޤްތިޞާދު އަދި އެމެރިކާގެ މުހިންމު ބައިވެރިއެއް ކަމުގައިވާ ޖަޕާނު މިހާރު ކުރިމަތިލާން ޖެހިފައި ވަނީ ޗައިނާ އާއެކު އޮތް ގުޅުން ގޯސްވަމުން ދިއުމާއި ސަރަޙައްދީ ރައްކާތެރިކަން ގެއްލެމުންދާ ސިޔާސީ ހަމަނުޖެހުމުގެ ދުވަސްވަރަކާ އެވެ.

އާދީއްތަ ދުވަހާ ހަމައަށް، އިޝިބާގެ އިސްތިއުފާ އަށް ގޮވާލުންތަކަށް އިޖާބަ ނުދެއްވާ އޭނާ ގެންދެވީ، އެމެރިކާ އާ އެކު ހުރި ވިޔަފާރީގެ މައްސަލަތައް ހައްލު ކުރުމަކީ އޭނާގެ ޒިންމާ އެއް ކަމަށް ވިދާޅުވަމުންނެވެ.

"ޤައުމީ ކާރިސާއެއްގެ ގޮތުގައި ސިފަ ކުރެވިދާނެ އެމެރިކާ އިން އަޅާފައިވާ ޓެކްސް ފިޔަވަޅުތަކާ ގުޅޭ މަޝްވަރާތައް އަޅުގަނޑުމެންގެ ސަރުކާރުގެ ޒިންމާގެ ދަށުން ނިންމަން ޖެހޭނެ ކަމަށް އަޅުގަނޑު ވަރަށް ބޮޑަށް ޤަބޫލުކުރަން،" އޭނާ ވިދާޅުވެފައިވެއެވެ.

އުމުރުޅުން 68 އަހަރުގެ އިޝިބާ ވިދާޅުވީ، އާ ވެރިއަކު އިންތިޚާބު ކުރެވެންދެން "ރައްޔިތުންނަށް" އޭނާގެ ޒިންމާތައް އަދާކުރައްވަމުން ގެންދަވާނެ ކަމަށެވެ.

އެލްޑީޕީ އިން އާ ލީޑަރެއް ހޮވުމަށްފަހު އަދި އެ ފަރާތް ގާނޫނު ހަދާ މަޖިލީހުގެ ވޯޓަކުން ބޮޑުވަޒީރު ކަމަށް އައްޔަނު ކުރެވޭނެއެވެ.

2024 ވަނަ އަހަރުގެ އޮކްޓޯބަރު މަހު މަޤާމާ ހަވާލުވި އިޝިބާ އަށް ގިނަ މައްސަލަތަކާ ކުރިމަތިލައްވަން ޖެހިވަޑައިގަތެވެ. އެ ގޮތުން އަގުތައް މައްޗަށް ދިއުމުގެ މައްސަލަ ހައްލު ކުރުމަށް ވައުދުވެވަޑައިގެންނެވި ނަމަވެސް، އިޤްތިޞާދީ ދަތިތަކާއި، ދިރިއުޅުމުގެ އަގުބޮޑުވުމުގެ ހާލަތާއި، އެމެރިކާ އާއެކު އޮތް ސިޔާސީ ގުޅުމުގެ ދަތިތަކާ ކުރިމަތިލައްވަން ޖެހުމުން ރައްޔިތުންނަށް އިތުބާރު ހޯދައިދިނުމުގައި ދަތިތަކާ ކުރިމަތިލައްވަން ޖެހިވަޑައިގަތެވެ.

ތަކެތީގެ އަގުތައް މައްޗަށް ދިއުމުގެ މައްސަލަ ހައްލު ނުކުރެވުން، ޚާއްޞަކޮށް ވޭތުވެދިޔަ އަހަރު ހަނޑުލުގެ އަގު ދެގުނަވުމަކީ ސިޔާސީ ގޮތުން އިޝިބާގެ ސަރުކާރަށް ބޮޑު ގެއްލުމެއް ވެގެން ދިޔަ ކަމެއް ކަމުގައި ފާހަގަ ކުރެވުނެވެ.

އޭނާގެ ކެބިނެޓަށް އެންމެ ދެ އަންހެނުން ބޭފުޅުން އައްޔަން ކުރެއްވުމުންނާއި، ޕާޓީގެ މެމްބަރުންނަށް އަގުބޮޑު ހަދިޔާތައް ދެއްވުން ފަދަ މައްސަލަތަކާ ގުޅިގެން އާންމުންގެ ތާއީދު އިޝިބާ އަށް އިތުރަށް ދަށްވެގެން ދިޔައެވެ.