އަފްޣާން ބިންހެލުން: އަހަރެންގެ އާއިލާއިން 11 މެންބަރުން މަރުވި، އަހަރެންނަށް އެހީވެދީ!

އެއީ ފާއިތުވިދިޔަ 20 އަކަށް އަހަރު ދުވަހުގެ ތެރޭގައިވެސް އަފްޣާނިސްތާނަށް އައި އެންމެ ވަރުގަދަ ބިންހެލުމެވެ. މިދިޔަ ބުދަ ދުވަހުގެ މެންދަމުން އަލިވެލިވަގުތު ރެކްޓާ މިންގަނޑުން 6.1ގެ ބާރުމިނުގައި އަފްޣާނިސްތާނު ގުޑުވާލި ބިންހެލުމުގައި މަރުވި މީހުންގެ އަދަދު 1000 އިން މައްޗަށް އަރާފައިވާއިރު، ޢަބްދުއްރަޙްމާންގެ އާއިލާއިން އެކަނިވެސް 11 މީހެއްގެ ފުރާނަ ގެއްލިފައިވާ ކަމަށް އޭނާ ވަނީ ކިޔާދީފައެވެ.

ބިންހެލުމުގެ އަސަރު އެންމެ ބޮޑަށް ކުރި ޕަކްތިކާ ޕްރޮވިންސްއަށް ލިބިފައިވާ ގެއްލުންތަކަށް އިޝާރާތް ކޮށް ވާހަކަ ދައްކަމުން، ޢަބްދުއްރަޙްމާން ވަނީ މަރުގެ ހާދިސާތައް ހިނގި ސަރަހައްދުތައް ކިއާދީފައެވެ.

ޢަބްދުއްރަޙްމާން ވަނީ ގެތަށް އަލުން ކޮޅަށް ޖެހުމަށް ސަރުކާރުގެ އެހީއަށް އެދި ގޮވާލާފައެވެ.

ޖޫން 22 ވަނަ ދުވަހުގެ ބިންހެލުމަކީ އަފްޣާނިސްތާނުގެ ކޮންޓްރޯލް ނަގައިގެން އޮތް ތާލިބާން ސަރުކާރަށް ކުރިމަތިލާން ޖެހިފައިވާ ބޮޑު އިމްތިހާނެއް ކަމަށް ބައިނަލްއަގުވާމީ މުޖުތަމައުން ސިފަ ކުރެއެވެ. ބިން ހެލުން އައި އިރުވެސް އަފްޣާނިސްތާނަކީ ތަފާޓު އެތައް ކާރިސާއެއް އުފެދިފައި އޮތް ގައުމެކެވެ. ސިއްހީ ނިޒާމު އޮތީ މުޅިންހެން އިނދަޖެހިފައެވެ. ބައިނަލްއަގުވާމީ މުޖުތަމައުން ވަނީ އަފްޣާނިސްތާނު އެކަހެރި ކޮށްފައެވެ. ހުޅަނގުން އަޅާފާނެ ދަތި ކުރުމުގެ ފިޔަވަޅުތަކުގެ ބިރަށް، އަފްޣާނިސްތާނަށް އެހީގެ އަތެއް ދިއްކޮށްލުމަކީ، ކޮންމެ ކޮންމެ ގައުމަކަށް ކުރަން ކުރޭ ވަރުގެ ކަމެއް ނޫނެވެ. 

އަފްޣާނިސްތާނުގައި އިންސާނީ ކާރިސާއެއް އުފެދިފައިވާއިރު، އދ. ފަދަ ބައެއް ޖަމާއަތްތަކުން މިހާރުވެސް ދަނީ އަފްޣާނިސްތާނަށް އެހީ ފޯރުކޮށްދެމުންނެވެ. ނަމަވެސް، އެންމެ ފުރިހަމަ ގޮތުގައި އެހީ ފޯރުކޮށްދިނުމަށް ތާލިބާނުން ހުރަސްތައް ކުރިމަތި ކުރަމުން ދާ ކަން، އދ. ގެ އިސް އޮފިޝަލެއްކަމަށްވާ މާޓިން ގްރިފިތްސް ވަނީ އދ. ގެ ސަލާމަތީ މަޖިލީހަށް ދަންނަވާފައެވެ.