އާފްޣާނިސްތާނުގެ އިރުމަތީ ސަރަޙައްދަށް ބިންހެލުމެއް އައުމުގެ ސަބަބުން ގާތްގަނޑަކަށް 622 މީހުން މަރުވެ، 1،500 އަށްވުރެ ގިނަ މީހުންނަށް އަނިޔާވެއްޖެ އެވެ.

ފުނޑުވެފައިވާ އިމާރާތްތަކުގެ ދަށުން ދިރިހުރި މީހުން ހޯދުމުގެ މަސައްކަތް ކުރަމުން ދާއިރު، ހެލިކޮޕްޓަރުތަކުން އަނިޔާވެފައިވާ މީހުން ރައްކާތެރި ތަންތަނަށް އުފުލަމުންދެއެވެ.

ހަމަ ނުޖެހުންތަކުން ސަލާމަތް ވުމަށް އަވައްޓެރި ގައުމުތަކަށް ހިޖުރަ ކުރި އަފްޣާނިސްތާނުގެ ރައްޔިތުންގެ ތެރެއިން ގިނަ ބަޔަކު އަނބުރާ އަފްޣާނިސްތާނަށް ފޮނުވާލާފައިވާ މި ދަނޑިވަޅުގައި، މި ކާރިސާގެ ސަބަބުން، މިހާރުވެސް އިންސާނީ ހާލަތު ދަށްވެފައިވާ ދެކުނު އޭޝިއާގެ މި ޤައުމުގެ ވަސީލަތްތަކަށް އިތުރު ބުރައެއް އަންނާނެ ކަމަށް ރިޕޯޓުތައް ބުނެއެވެ.

ރިކްޓަރ ސްކޭލްގައި 6 ގެ ބާރުމިނުގައި އައި މި ބިންހެލުމުގެ ސަބަބުން 1،500 އަށްވުރެ ގިނަ މީހުންނަށް އަނިޔާވެފައިވާ ކަމަށް ޠާލިބާނުން ހިންގާ އާފްޣާނިސްތާނުގެ އެތެރޭގެ ކަންކަމާބެހޭ މިނިސްޓްރީން ނެރުނު ބަޔާނެއްގައި ބުނެފައިވެއެވެ. އަދި މަރުވި މީހުންގެ އަދަދު 622 ގައި ހުރި ކަމަށްވެސް ބުނެފައިވެއެވެ. ސަރުކާރުން ހިންގާ ރޭޑިއޯ ޓެލެވިޜަން އާފްޣާނިސްތާން (އާރްޓީއޭ) އިން ކުރިން ބުނެފައި ވަނީ މަރުވި މީހުންގެ އަދަދު ގާތްގަނޑަކަށް 500 ގައި ހުރި ކަމަށެވެ.

ޕާކިސްތާނުގެ ޚައިބަރު ޕަޚްތުންޚްވާ ސަރަޙައްދާ އިންވެގެން އޮންނަ މި ސަރަޙައްދަށް ހޯމަ ވިލޭރޭ މެންދަމު އައި މި ބިންހެލުމުގެ ސަބަބުން ސަރަހައްދުގެ ގެތައް ވަނީ ފުނޑުފުނޑުވެފައެވެ. މި ބިންހެލުން އައީ ބިމުގެ އަޑިން 10 ކިލޯމީޓަރު (6 މޭލު) ފުންމިނުގައެވެ.

މި ބިންހެލުން އުފެދުނީ (އެޕިސެންޓަރ) އަފްޣާނިސްތާނުގެ އިރުމަތީގައި އޮންނަ ނަންގަރުހާރު ޕްރޮވިންސްގެ ފަސްވަނައަށް އެންމެ ބޮޑު ސިޓީ ކަމުގައިވާ ޖަލާލާބާދުން 27 ކިލޯމީޓަރު (17 މޭލު) ދުރުގައެވެ.

މި ބިންހެލުމުގެ އަސަރު ކުނަރު އަދި ލަޣްމާން ޕްރޮވިންސް ތަކަށްވެސް ކޮށްފައިވެއެވެ. އަދި ޤައުމުގެ ވެރިރަށް ކާބުލް އިން 140 ކިލޯމީޓަރު (87 މޭލު) ދުރުގައިވެސް މި ބިންހެލުން އިހުސާސްކުރެވުނެވެ.

އޮފިޝަލުން ބީބީސީ އަށް މަޢުލޫމާތު ދީފައިވާ ގޮތުގައި އަފްޣާނިސްތާނާއި ޕާކިސްތާނުގެ ބޯޑަރާ ކައިރި ސަރަޙައްދުތަކުގައި ގެތައް ވަނީ ފުނޑުފުނޑުވެފައެވެ.

މި ސަރަޙައްދަކީ ފަރުބަދަ ގިނަ އަދި މުވާސަލާތީ ވަސީލަތްތައް މަދު ސަރަޙައްދަކަށްވުމުން، މަޢުލޫމާތު ލިބެމުންދަނީ ވަރަށް ލަހުންނެވެ.

ނަމަވެސް، ސަރަޙައްދުގެ އޮފިޝަލުން ބީބީސީ ނިއުސް އަށް މަޢުލޫމާތު ދީފައިވާ ގޮތުގައި މަރުވި މީހުންގެ އަދަދު އެތައް ސަތޭކަ އަށް އަރާނެ ކަމުގެ ކަންބޮޑުވުން އެބައޮތެވެ.

އަންނަމުންދާ އާފްޓަރޝޮކްތަކާއެކު، ސަރަޙައްދުގެ ހަނި ފަރުބަދަ މަގުތަކުގެ ސަބަބުން ސަލާމަތްކުރުމުގެ މަސައްކަތްތަކަށް ދަތިތަކާ ކުރިމަތިވެއެވެ. އަދި މި މަގުތަކުގެ ތެރެއިން ބައެއް މަގުތައް ވަނީ ފައިބައިގެން އައި ހިލަބުރިތަކުގެ ސަބަބުން ބަންދުވެފައެވެ.

ޠާލިބާނުން ހިންގާ ސަރުކާރުގެ އޮފިޝަލުން ވަނީ ބައިނަލްއަޤްވާމީ އެހީ އަށް އެދިފައެވެ.

މި ބިންހެލުން އައީ ވަރަށް ތިލަ އިން ކަމަށް ވުމުން ގެއްލުން ވަރަށް ބޮޑުވާނެ ކަމަށް ތަޖުރިބާކާރުން ދެކެއެވެ.

"މިހާތަނަށް ބޭރު ސަރުކާރަކުން މީހުން ސަލާމަތް ކުރުމަށް ނުވަތަ އެހީތެރިކަން ފޯރުކޮށްދިނުމުގެ މަސައްކަތަށް އެހީތެރިވުމަށް ހުށަހަޅާފައެއް ނުވޭ،" ފޮރިން އޮފީހުގެ ތަރުޖަމާނެއް ރޮއިޓާރސް އަށް ބުނެފައިވެއެވެ.

ދުނިޔޭގެ އެންމެ ފަގީރު ޤައުމުތަކުގެ ތެރެއިން އެއް ޤައުމު ކަމަށް ވާ އާފްޣާނިސްތާނަކީ ވަރަށް ނުރައްކާތެރި ބިންހެލުންތައް އަންނަ ޤައުމެކެވެ. ޚާއްޞަކޮށް އިންޑިއަން އަދި ޔޫރޭޝިއަން ޓެކްޓޯނިކް ޕްލޭޓްތައް ބައްދަލުވާ ހިސާބު ކަމަށްވާ ހިންދޫކުޝް ފަރުބަދަ ސިލްސިލާ އަކީ ބިން ހިލެން އާންމުކޮށް ތަޖުރިބާ ކުރާ ސަރަހައްދެކެވެ.