ބިންހެލުމުގައި ބިމާ ހަމަވި ގެ ކޮޅަށްޖަހާނެ ތަނަވަސްކަމެއް އަތަކު ނެތް!

20 އަހަރަށް ދިގުލައިގެންދިޔަ ހަނގުރާމައަކަށް ފަހު ހިންދެމިނުލެވި އުޅެނިކޮށް، ހަތިޔާރު އެޅި ހަނގުރާމަވެރި ތޯލިބާން ޖަމާއަތުގެ މުށުތެރޭގައި ބަންދުވި އަފްޣާނިސްތާނުގެ އާންމު ރައްޔިތުންނަށް އަނެއްކާވެސް މިވަނީ އިތުރު ހިތްދަތި ކަމަކަށް ކެތްކުރަން ޖެހިފައެވެ. މިދިޔަ ބުދަ ދުވަހުގެ މެންދަމުގެ ވަގުތުގައި އައި ބާރުގަދަ ބިންހެލުމުގައި މަރުވި މީހުންގެ އަދަދު 1000ށްވުރެ މައްޗަށް އަރައި، ޒަޚަމްވީ މީހުންގެ އަދަދު 3000ށްވުރެ މައްޗަށް އަރާފައިވާއިރު، އެތައް ހާސް ގެއެއް ވަނީ ބިމާ ހަމަވެފައެވެ.

އަފްޣާނިސްތާނުގެ ޑިޒާސްޓަރ މިނިސްޓްރީގެ ތަރުޖަމާނު، މުހައްމަދު ނާޒިމު ހައްގާނީ ހާމަކުރިގޮތުގައި، 10000އެއްހާ ގެ ވަނީ ކޮންމެވެސް ވަރަކަށް، ނުވަތަ މުޅިން ހަލާކުވެ ސުންނާފަތިވެފައެވެ.

ދަތިކަމާއި ތަކުލީފު ކުރިމަތިވި ކަމުގައި ވީނަމަވެސް ގާޔާން ޑިސްޓްރިކްޓްގެ ރަށްވެހިންގެ ހިތްވަރު އިންތިހާއަށް ގަދައެވެ. އެ ސަރަހައްދުގެ ރައްޔިތުން، ދިރިއުޅުން އާރާސްތުކުރުމުގެ އަޒުމައިގެން ތެދުވީ މިދިޔަ ހުކުރު ދުވަހުއެވެ. ނަމަވެސް އެކަންވެސް މާ އެދެވޭ ގޮތެއްގައި ކުރިއަށް ގެންދެވޭ ގޮތެއް ނުވެއެވެ. އިވެމުން ދަނީ ކޮންސްޓްރަކްޝަން ސާމާނު ނުލިބުމާއި، ލަކުޑީގެ އަގުބޮޑުވުމުގެ ޝަކުވާއެވެ.

"އިސްލާމީ އިމާރާތަކީ" އޯގަސްޓް 2021ގައި އަފްޣާނިސްތާނުގެ ކޮންޓްރޯލް ނެގުމަށްފަހު ތޯލިބާން ޖަމާއަތުން އަމިއްލައަށް ދީފައި ވާ ނަމެކެވެ.

ރެކްޓަަރ މިންގަނޑުން 6.1ގެ ބާރުމިނުގައި ވަރުގަދަ ބިންހެލުން އައި ފަރުބަދަމަތީ ސަރަހައްދުގައި މީހުން ވަޒަންވެރިވެފައިވަނީ ދުރު ހިސާބުތަކުގައެވެ. އެއީ އަފްޣާނިސްތާނުގައި ހަނގުރާމަކުރި ދުވަސްވަރު، ކުރިމަތިލުންތަކުގެ މައިދާނެއްވެސްމެއެވެ.

ބިންހެލުމުގެ ސަބަބުން ހާލުގައިޖެހިފައިވާ މީހުންނަށް އެހީ ފޯރުކޮށްދިނުމަކީ މިއަދު ތަކުލީފެކެވެ. މުވާސަލާތީ ޚިދުމަތުގެ ފެންވަރު ދަށްކަމާއި، ދަތުރުފަތުރަށް އޮތް މަގުތަކުގެ ފެންވަރު ދަށްކަމުން، މީހުން ސަލާމަތްކުރުމަށާއި، އިންސާނީ އެހީ ފޯރުކޮށްދިނުމަކީވެސް ގޮންޖެހުމެކެވެ.

އަފްޣާނިސްތާނުގެ ކޮންޓްރޯލް، ތޯލިބާނުން ނެގުމާއެކުހެން ބައިނަލްއަގުވާމީ މުޖުތަމައުން ވަނީ އަފްޣާނިސްތާނު ބާކީކޮށް، އެކަހެރިކޮށްފައެވެ. އދ.އާއި ހުޅަނގުގެ ދަތިކުރުމުގެ ފިޔަވަޅުތަކަށް ބިރުންނެވެ. ނަމަވެސް ތޯލިބާން ޖަމާއަތުން ވަނީ ދަތިކުރުމުގެ ފިޔަވަޅުތައް އުވާލައި، އަފްޣާނިސްތާނަށް އެހީ ފޯރުކޮށްދިނުމަށް ބައިނަލްއަގުވާމީ މުޖުތަމައަށް ގޮވާލާފައެވެ. މި ބިންހެލުމަކީ ތޯލިބާން ސަރުކާރަށް އިމްތިހާނެއްކަމަށް ބައެއް ފަރާތްތަކުން ސިފަކުރާއިރު، ބައިނަލްއަގުވާމީ އެހީދޭ ޖަމްއިއްޔާތަކުން މިހާރު ވަނީ އަފްޣާނިސްތާނަށް އެހީ ދޭންފަށާފައެވެ.