މާތް ﷲ ނަހީ ކުރައްވާ، ހަރާމް ކުރައްވާފައިވާ އަމަލުތަކުގައި ފާފަ ކުރުން މަތީ ދެމި ތިބޭ މީހުންނަށް މި ދުނިޔެ މަތީގައިވެސް އެކަލާންގެ އަޒާބު ދެއްވާ, ކޯފާ ފޮނުއްވަވައެވެ. އެފަދަ އެއް މިސާލަކީ ފާހިޝް އަމަލުތަކުގައި ހައްދު ފަހަނައަޅާދިޔަ ޕޮމްޕޭގެ މިސާލެވެ. ޕޮމްޕޭގެ އަހުލުވެރިންގެ ނިމުން އައި ގޮތެވެ.
އިޓަލީގެ ގަދީމީ ރަށެއްކަމުގައިވާ ޕޮމްޕޭގެ އަހުލުވެރިންނަކީ އިހުގެ ރޯމަނުންގެ އެންމެ ވަރުގަދަ މުއްސަދިން ދިރިއުޅުނު ރަށެކެވެ. އެ މީހުންނަކީ ޖިންސީ އުފާ ހޯދުމާއި، އެއް ޖިންސުގެ ގުޅުން ހިންގުމާއި، ރާބުއިމާއި، ޖުވާ ކުޅުމާއި، އަޅުންނަށް އިހާނެތި ގޮތް ހަދައި މެރުމާއި، ދުނިޔަވީ އެންމެހާ މަޖަލުގައި ހައްދު ފަހަނަޅައިފައިތިބި ބައެކެވެ.
އެ އާބާދަށް ނިމުން އައީ، ވެސޫވިއަސް އަލިފާންފަރުބަދައިގެ ވަރުގަދަ ގޮވުމާއެކުގައެވެ. އެންމެ ދުވަހެއްގެ ތެރޭގައެވެ. ފަރުބަދަތަކުން ފައިބަމުންދިޔަ ވިހަ ގޭހާއި އަޅިތައް ރަށުތެރެއަށް ފައިބައި ރަށުތެރޭގައި ވައި ބަންދުވިއެވެ. ނަތީޖާއެއްގެ ގޮތުން އެމީހުންތިބި ގޮތަށް އެހަރަކާތުގައި ތިބެ ފަނާވެދިޔައީއެވެ. ހަށިތައް މިއަދާ ހަމައަށް ވެސް ފެންނަންހުރީ އެމީހުންގެ އެންމެ ފަހު ސިކުންތުގެ ހަރަކާތުގައިވާތީއެވެ.
ތާރީހު ދިރާސާ ކުރާ ފަރާތްތަކުން ތާ އަބަދުމެހެން ޕޮމްޕޭގައި ހަރަކާތްތެރިވެއެވެ. އެކި ދިރާސާތަކުގެ ތެރެއިން އަބަދުމެހެން ކޮންމެވެސް ދިރުމެއް ފަނާވެގޮސްފައިވާތީ ހޯދައެވެ. މި ފަހަރުވެސް ފެނިފައި މިވަނީ އެފަދަ އެއްޗެކެވެ. މިފަހަރު ފެނުނީ ބިސް އަޅަން ތައްޔާރުވެފައި ވަނިކޮށް މަރުވި ކަންޒުކަހަނބެކެވެ.
މާބަނޑު ކަންޒުކަހަނބު ފެނިފައި ވަނީ ގުދަނެއްގެ ގޮތުގައި ބޭނުން ކުރަމުން ދިޔަ ތަނެއްގެ މަށި ތަޅުންގަނޑުގެ އަޑިންނެވެ. ބެލެވޭ ގޮތުގައި އެ ކަންޒުކަހަނބު މަރުވެފައި ވަނީ ވެސޫވިއަސް އަލިފާންފަރުބަދަ ގޮވުމުގެ ކުރިންނެވެ. ދިރާސާގެ މަސައްކަތުގައި ހަރަކާތްތެރިވާ ފަރާތްތަކުން ބުނީ، ބިސް އެޅުމަށްޓަކާ އެ ކަންޒުކަހަނބު ވަޅުގަނޑެއް ތައްޔާރު ކުރި ކަމަށެވެ. ނަމަވެސް ބިސް އެޅޭ ގޮތް ނުވި ކަމަށާ، އެ ކަންޒުކަހަނބު މަރުވެފައި ވަނީ އެހެންވެ ކަމަށް ބެލެވޭ ކަމަށެވެ.
62 އޭޑީގައި ޕޮމްޕޭއަށް ބާރުގަދަ ބިންހެލުމެއް އައި. މި މަގަށް ވާ ގޮތަށް ހުރި ފިހާރައިގެ ތަޅުންގަނޑު ހަލާކުވީމަ، އެތަނުގައި އާ ތަޅުމެއް އެޅި. އެ މީހުން ތަޅުންގަނޑު ތަޅާލުމުން، އެ މާބަނޑު ކަންޒުކަހަނބު ބިސް އަޅަން ވަޅު ކޮނެވޭ ގޮތްވި، މި ދިމާ އަޑީގަ. އަހަރަމެންނަށް ބިސް ފެނުނީ ކަންޒުކަހަނބުގެ ބަނޑުތެރޭ އޮއްވާ. ބިސްނާޅާ އޮތީ ކީއްވެ ކަމެއް އަހަރަމެންނަކަށް ނޭނގޭ. އެ ކަންޒުކަހަނބު މަރުވީ. މިކަން ޝައުގުވެރިވަނީ، އެ މަރުހަލާގައި ޕޮމްޕޭ އޮތް ގޮތް ދެނެގަންނަން އެހީއަކަށް ވާނެތީ. އެއީ ބިންހެލުމަށްފަހު، އެހެން ނަމަވެސް، އަލިފާންފަރުބަދަ ގޮވުމާ ދެމެދު ހޭދަވި މަރުހަލާ. އެ ދުވަސްވަރަކީ ހުރިހާ ދިމާއެއްގައި ހެން ގެތަށް އަޅަމުން ދިޔަ ދުވަސްވަރެއް. މުޅި ސިޓީހެން އޮތީ ކޮންސްޓްރަކްޝަން ސައިޓެއްހެން. އެކަމަކު ހުރިހާ ގެއެއްގައި އިމާރާތް ކުރުމުގެ މަސައްކަތް ކުރިއަކަށް ނުދޭ. ޖަނަވާރުތައް ބިސްއަޅާ ހަދަން ވަންނަނީ އެކަހަލަ ތަންތަނަށްގެބްރިއެލް ޒަކްޓްރިޖެލް؛ ޕޮމްޕޭ އާކިއޮލޮޖިކަލް ޕާކުގެ ޑައިރެކްޓަރ ޖެނެރަލް
ބިސްއަޅަން ވަޅުކޮނެ، ކޮންމެވެސް ސަބަބަކާ ހެދި ބިސް ނޭޅި މަރުވި ކަންޒުކަހަނބު ފެނުނު ސަރަހައްދަކީ، އެއް ޒަމާނެއްގައި ވަރަށް ތަނަވަސް ގެއެއް އިމާރާތް ކޮށްފައި ހުރި ސަރަހައްދެކެވެ. ފާރުތަކުގައި ފަރުމާގެ މުށިތައް ޖަހާފައި ހުރިއިރު ކުރެހުންތައްވެސް ހުއްޓެވެ.
ޕޮމްޕޭ ސިޓީއިން އަދިވެސް ނުފެންނަ އެތައް ސަރަހައްދެއް އެބަ އޮތެވެ. ހޯދަމުން ދާ ވަރަކަށް، ތަފާތު އެކި ގޮތް ގޮތުން އާޝޯހް ކުރަނިވި މަންޒަރުތައް ފެނެއެވެ. ކޮންމެ މަންޒަރަކީވެސް ތިރިތިބީންނަށް ޢިބުރަތުން ފުރިގެންވި މަންޒަރެކެވެ.
