"ހައްދު" ގެ ޓްރެއިލާ ނެރެފި

ޑައިރެކްޓަރ އަބްދުލް ފައްތާހުގެ އެންމެ ފަހުގެ ފިލްމު "ހައްދު" ގެ ޓްރެއިލާ ނެރެފިއެވެ.

މިފިލްމަކީ ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ. ނިއުމާ މުހައްމަދު އަދި ފައްތާހު ޕްރޮޑިއުސްކުރާ މި ފިލްމުގެ ކޮސްޓިއުމް ޑިޒައިނަރަކީ މަޝްހޫރު ކޮސްޓިއުމް ޑިޒައިނާ ނާޒިޔާ އެވެ.

މަހުދީގެ ވާހަކައެއްގެ މައްޗަށް ބިނާކޮށް އުފައްދާ މި ފިލްމު ބަލާލުމުން "ހައްދު ފަހަނަ އެޅުމުން" ވާނެ ގޮތް އެނގިގެން ދާނެ ކަމަށް ވެސް ބުންޏެވެ.

މި ފިލްގެ ޝޫޓިންތައް ނަގާފައިވަނީ ހަމަޖެހިފައިވަނީ ހއ. ކެލާ، ރ. ވާދޫ، މާލެ އަދި މާލެ ކައިރި ރިސޯޓްތަކުގައެވެ.

ތަރިންގެ ރޯލުން ފެނިގެން ދަނީ މަރިޔަމް އައްޒަ، އައިމިނަތު ރިޝްފާ އަދި މި ދާއިރާއަށް އަލަށް ތައާރަފްވާ ޝިބާން އަހުމަދު އެވެ.

"ހައްދު" ފިލްމަކީ މިހާތަނަށް ރާއްޖޭގެ ފިލްމީ ދާއިރާ އިން ހޯދާފައިވާ ރިކޯޑުތައް މުގުރާލެވޭނެ ފިލްމަކަށް ވެގެންދާނެ ކަމުގެ ޔަގީންކަން އެބައޮތް ކަމަށް ފައްތާހު ވަނީ ބުނެފައެވެ. ފައްތާހް ބުނެފައިވަނީ ގިނަ އެވޯޑުތައް ވެސް މިފިލްމުން ހާސިލް ކުރާނެކަމާ މެދު އެއްވެސް ޝައްކެއް ނެތް ކަމަށާއި މިހާތަނަށް ދިވެހި ފިލްމަކަށް ނުލިބޭ ވަރަށް އާމްދަނީ މި ފިލްމުން ހޯދާނެ ކަމަށެވެ.

މިފިލްމްގެ ލަވަތައް ކިޔައިދީފައިވަނީ މުހައްމަދު އަބްދުލް ޣަނީ ( ތޭރަވާ) އާއި އަޝްފާއެވެ.

ފައްތާހު ބުނީ ފިލްމުގެ ރީތިކަން ފެންނާނީ ބޮޑުސްކްރީނުން ކަމަށެވެ.

ފައްތާހު ބުނީ މަސައްކަތް ވަރަށް ފުރިހަމައަށް ކުރިއަށްދާ ކަމަށާއި ފުރިހަމަ، މޮޅު އަދި ސަޅި ފިލްމެއް ސެޕްޓެމްބަރު ހައެއްގައި ސްކްރީނުން ދައްކައިލާނެ ކަމަށެވެ.

"ހައްދު" އަކީ އަހުމަދު މަހުދީގެ ސްކްރީން ޕްލޭއަކަށް ހަދާ ފިލްމެކެވެ.