ހަމްޕުގެ ލަނޑުން ރާއްޖެއަށް މޮޅެއް
14 ޖޫން 2022 | އަންގާރަ 14:39ރާއްޖެއިން ކޮލިފައިންގ ގެ މެޗުތައް ނިންމާލީ ތިން ޕޮއިންޓާއެކު ތާވަލުގެ ތިން ވަނައިގައި
ކޮލިފައިންގ ގައި ރާއްޖެއާ ލަންކާ ބައްދަލުކުރި މެޗުގެ ތެރެއިން | އެފްއޭއެމް
އޭޝިއަން ކަޕް ކޮލިފައިންގގެ ފަހު މެޗުގައި ސްރީލަންކާއާ ވާދަކޮށް ރާއްޖެ މޮޅުވެއްޖެއެވެ.
އުޒްބަކިސްތާންގެ ނަމަންގަންގެ މަރުކަޒީ ސްޓޭޑިއަމްގައި ކުޅުނު މި މެޗު ރާއްޖެއިން ކާމިޔާބުކުރީ 1-0ންނެވެ. މި މެޗުގެ ހަމައެކަނި ލަނޑު ދެވަނަ ހާފުގެ 63 ވަނަ މިނެޓުގައި ރާއްޖެއަށް ކާމިޔާބުކޮށްދިނީ ހަމްޒާ މުހައްމަދު (ހަމްޕު) އެވެ. މިއީ އިއްބެ ދިން ޕާހެއްގެ ބޭނުންހިފާ ލަންކާގެ ޑިފެންޑަރެއް ކައިރިން ނައްޓާލުމަށްފަހު ގޯލުގެ ތިރީ ކަނަށް ފޮނުވާލައިގެން ހަމްޕު ޖެހި ލަނޑެކެވެ.
ނަމަވެސް އޭގެ ފަހުން ނަތީޖާ ހަމަހަމަ ކުރުމަށް ލަންކާއަށް ރަނުގެ ފުރުސަތެއް ލިބުނެވެ. ރާއްޖޭގެ އޭރިއާ ތެރެއިން ސަމޫހު އަލީ (ސަމުއްޓެ) ލަންކާގެ ޑިލޯން ޑި ސިލްވާއަށް ކުރި ފައުލަކާ ގުޅިގެން ލަންކާއަށް ޕެނަލްޓީއެއް ލިބުނެވެ. ނަމަވެސް ޑި ސިލްވާ ފޮނުވާލި ޕެނަލްޓީ ރާއްޖޭގެ ކީޕަރު ފައިސަލް ވަނީ މަތަކޮށްފައެވެ.
މި މެޗަށް ނިކުތް އިރުވެސް ރާއްޖެ އަދި ލަންކާއަށް އޭޝިއަން ކަޕްގެ ޖާގަ ވަނީ ގެއްލިފައެވެ. އެއީ ގްރޫޕުގައި ދެން ކުޅުނު ދެ މެޗުންވެސް ބަލިވުމުންނެވެ.
މި މެޗުން މޮޅުވުމާއެކު ރާއްޖެއިން ކޮލިފައިންގގެ މެޗުތައް ނިންމާލީ ތިން ޕޮއިންޓާއެކު ތާވަލުގެ ތިން ވަނައިގައެވެ. ލަންކާއަށް ކޮލިފައިންގ ނިންމާލަން ޖެހުނީ ހުރިހާ މެޗަކުން ބަލިވުމުން ޕޮއިންޓެއް ނުލިބި ގްރޫޕުގެ ފުލުގައެވެ.
ކޮލިފައިންގގައި ރާއްޖެ ހިމެނެނީ ތައިލެންޑް، އުޒްބަކިސްތާން އަދި ސްރީލަންކާއާ އެއް ގްރޫޕެއްގައެވެ. ގްރޫޕުގެ މެޗުތައް ސެންޓްރަލައިޒްކޮށް ކުޅެނީ އުޒްބަކިސްތާނުގައެވެ. އޭޝިއަން ކަޕްގެ ޖާގަ ލިބޭނީ ހަ ގްރޫޕުގެ ތެރެއިން ކޮންމެ ގްރޫޕެއްގެ އެއްވަނަ ޓީމާއި، ހަ ގްރޫޕުން ދެވަނައަށްދާ ޓީމުތަކުގެ ތެރެއިން ފަސް ޓީމަކަށެވެ.
