ހައިޓީގެ ގޭންގް ސަޕްރެޝަން ފައުޖަށް ސްރީލަންކާ ސިފައިން ގުޅިއްޖެ

ހައިޓީގައި ހަރަކާތްތެރިވާ ގޭންގުތައް ހުއްޓުވުމަށް އަލަށް އުފައްދާފައިވާ ބައިނަލްއަގުވާމީ ފައުޖު ކަމަށްވާ "ގޭންގް ސަޕްރެޝަން ފޯސް" (ޖީ.އެސް.އެފް) އާ ސްރީލަންކާގެ ސިފައިންގެ ޓީމެއް ގުޅިފައިވާ ކަމަށް އދ. ގެ ތާއީދާއެކު މަސައްކަތްކުރާ އެ އިދާރާގެ ތަރުޖަމާނަކު ބުރާސްފަތި ދުވަހު ވިދާޅުވެއްޖެ އެވެ.

އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ތަރުޖަމާނު ވިދާޅުވީ، ސްރީލަންކާގެ ސިފައިންގެ ޓީމު ހައިޓީގެ ވެރިރަށް ޕޯޓް-އޯ-ޕްރިންސަށް އައިސްފައިވަނީ ބުދަ ދުވަހުގެ ރޭގެ ވަގުތެއްގަ އެވެ. ނަމަވެސް، ސަލާމަތީ ސަބަބުތަކަށްޓަކައި އެ ޓީމުގައި ހިމެނޭ ސިފައިންގެ އަދަދު ހާމަކުރެވެން ނެތް ކަމަށް އޭނާ ވިދާޅުވި އެވެ.

މި ފައުޖު ވަރުގަދަކުރުމުގެ ގޮތުން ކުރިއަށް އޮތް ހަފުތާތަކުގެ ތެރޭގައި އިތުރު ސިފައިން އަންނާނެ ކަމަށް ބެލެވޭ ކަމަށް ތަރުޖަމާނު ވިދާޅުވި އެވެ. މި ފައުޖު ފުރިހަމަވާއިރު، ފުލުހުންނާއި ސިފައިން ހިމެނޭހެން ޔުނީފޯމް އެޅި 5،500 މުވައްޒަފުންނާއި، 50 މަދަނީ މުވައްޒަފުން މި ފައުޖުގައި ތިބޭނެ އެވެ.

މި ފައުޖުގެ މައިގަނޑު މަގުސަދަކީ ހައިޓީގެ ވެރިރަށުގެ ބޮޑު ބަޔަކާއި ގައުމުގެ މައިގަނޑު މަގުތަކުގެ ކޮންޓްރޯލް ނަގާފައިވާ ހަތިޔާރު އެޅި ގޭންގުތައް ނައްތާލުމަށް ހައިޓީގެ ގައުމީ ފުލުހުންނަށް އެހީތެރިކަން ފޯރުކޮށްދިނުމެވެ.

މީގެ އިތުރުން، ގައުމުގެ މުހިންމު އިންފްރާސްޓްރަކްޗާތަކުގެ ސަލާމަތްތެރިކަން ކަށަވަރުކުރުމާއި، އާންމު ރައްޔިތުންގެ ރައްކާތެރިކަން ގާއިމުކުރުމުގެ އިތުރުން، އިންތިޚާބެއް ބޭއްވުމަށް ބޭނުންވާ މާހައުލެއް ގާއިމުކުރުމަކީ ވެސް މި ފައުޖާ ހަވާލުކުރެވިފައިވާ ޒިންމާއެކެވެ.

އެމެރިކާ ބައްރުގެ އެންމެ ފަގީރު ގައުމު ކަމަށްވާ ހައިޓީގައި ބާރުގަދަ ގޭންގުތަކުން މީހުން މެރުމާއި، ރޭޕްކުރުމާއި، މުދާ ފޭރުމުގެ އިތުރުން މީހުން ރަހީނުކުރުން ފަދަ ޖަރީމާތައް ހިންގަމުންދާތީ، އެ ގައުމު އޮތީ ވަރަށް ނުރައްކާތެރި ހާލަތެއްގައެވެ.

އދ. ގެ ހިއުމަން ރައިޓްސް ޗީފް ވޮލްކާރ ތާކް މިދިޔަ މަހު ވިދާޅުވި ގޮތުގައި، 2026 ވަނަ އަހަރުގެ ފުރަތަމަ ހަ މަސްދުވަހުގެ ތެރޭގައި ގޭންގުތަކުގެ ހަމަނުޖެހުންތަކުގައި މަދުވެގެން 2،300 މީހުން މަރުވެ، 1،100 މީހުން ޒަޚަމްވެފައިވެއެވެ. އެހެންކަމުން، މި އާ ފައުޖަކީ މިވަގުތަށް "ވަރަށް ބޮޑަށް ބޭނުންވެފައިވާ" ފައުޖެއް ކަމަށް އޭނާ  .

އދ. ގެ ސަލާމަތީ މަޖިލީހުން މިދިޔަ އަހަރު އިއުލާންކުރި ޖީ.އެސް.އެފް އަކީ، ވަސީލަތްތަކާއި ބަޖެޓުގެ ދަތިކަން ކުރިމަތިވެފައިވާ "މަލްޓިނޭޝަނަލް ސެކިއުރިޓީ ސަޕޯޓް" (އެމް.އެސް.އެސް) މިޝަންގެ ބަދަލުގައި މަޑުމަޑުން މަސައްކަތްތަކާ ހަވާލުވާނެ ފައުޖެކެވެ.

ޖީ.އެސް.އެފް އަކީ ކުރީގެ މިޝަނަށްވުރެ ވަރުގަދަ ފައުޖަކަށް ހެދުމަށް އަމާޒު ހިފާފައިވީ ނަމަވެސް، މިހާތަނަށް މި ފައުޖުގައި ތިބީ ޗާޑް، މޮންގޯލިއާ، ޖަމައިކާ، ގުއަޓެމާލާ އަދި އެލް ސަލްވަޑޯރުން އައިސްފައިވާ 1،000 އަށްވުރެ މަދު ސިފައިންނެވެ.

ސްރީލަންކާ ގުޅުމާއެކު މި ފައުޖަށް ސިފައިން ފޮނުވި ގައުމުތަކުގެ އަދަދު މިހާރު ހަޔަކަށް އަރާފައިވާ ކަމަށާއި، މި ފައުޖުގެ ގާބިލުކަން އިތުރުކުރުމުގެ މަސައްކަތް ކުރިއަށްދާ ކަމަށް ތަރުޖަމާނު ވިދާޅުވި އެވެ.

ޕޯޓް-އޯ-ޕްރިންސްގެ ދެކުނުން 20 ކިލޯމީޓަރު ދުރުގައި އޮންނަ ކެންސްކޮފް އަވަށަށް ބުދަ ދުވަހު ދިން ހަމަލާއެއްގައި، އެތައް ބަޔަކު މަރުވެ، ގިނަ އަދަދެއްގެ ގެދޮރުގައި އަލިފާން ރޯކޮށްލާފައިވާ ކަމަށް އެ ރަށުގެ މޭޔަރު ޖީން މަސިލޯން ބުރާސްފަތި ދުވަހު ރޭޑިއޯ ސްޓޭޝަނަކަށް މައުލޫމާތު ދެއްވަމުން ވިދާޅުވި އެވެ.

ސަލާމަތީ ހާލަތު ގޯސްވުމުގެ ސަބަބުން 2016 ވަނަ އަހަރުގެ ފަހުން ހައިޓީގައި އެއްވެސް އިންތިޚާބެއް ބޭއްވިފައެއް ނުވެ އެވެ.

ހައިޓީއަށް އެހީތެރިވުމަށް އދ. އިން 2026 ވަނަ އަހަރަށް އެކުލަވާލި 880 މިލިއަން ޑޮލަރުގެ އިންސާނީ އެހީގެ ޕްލޭނަށް މިހާތަނަށް ލިބިފައިވަނީ ބޭނުންވާ ފައިސާގެ ހަތަރުބައިކުޅަ އެއްބަޔަށްވުރެ ވެސް މަދު އަދަދެކެވެ. މިދިޔަ ޖޫން މަހު އެ ގައުމަށް ކުރެއްވި ޒިޔާރަތެއްގައި އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ، ދުނިޔޭގެ ގައުމުތަކުން ހައިޓީގެ ހާލަތަށް ފުރަގަސްދީފައިވާތީ އެކަމާ ހިތާމަކުރައްވާ ކަމަށް ވިދާޅުވެފަ އެވެ.