ލަންކާގެ ކުޅުންތެރިއަކު ކްރިކެޓް ކުޅެން ހުއްޓާ ދަނޑުމައްޗަށް ވެއްޓި މަރުވެއްޖެ
6 ޖުލައި 2026 | ހޯމަ 12:22ބޭރުވަލާގައި ކުރިއަށްދިޔަ ކްރިކެޓް މުބާރާތެއްގެ މެޗެއްގައި ކުޅެން ހުއްޓާ، އުމުރުން 46 އަހަރުގެ ޒުލްފިކާރު ނަމަކަށް ކިޔާ ކުޅުންތެރިއަކު ކުއްލި ގޮތަކަށް ދަނޑުމައްޗަށް ވެއްޓި މަރުވެއްޖެ. ހާޓް އެޓޭކެއް ޖެހިގެން ހިނގި ކަމަށް ބެލޭ މި ހާދިސާއާ ގުޅިގެން މުބާރާތުގެ ހުރިހާ މެޗުތަކެއް މިހާރު ވަނީ މެދުކަނޑާލާފައި.
ސްރީލަންކާގެ ކްރިކެޓް ކުޅުންތެރިޔާ ޒުލްފިކާރު (ނޫ ޖާޒީގައި، ކެމެރާއަށް ކުރިމަތިލައިގެން) ބެޓް ހިފައިން ޕިޗު މަތީގައި ހުއްޓާ ފެންނަ މަންޒަރެއް | ސްކްރީން އިމޭޖް
ސްރީލަންކާގެ ބޭރުވަލާގައި ސްކޫލެއްގެ އިސްދަރިވަރުންގެ ޖަމިއްޔާއަކުން އިންތިޒާމުކޮށްގެން ކުރިއަށްގެންދިޔަ ކްރިކެޓް މުބާރާތެއްގެ މެޗެއްގެ ތެރެއިން، އުމުރުން 46 އަހަރުގެ ކުޅުންތެރިއަކު ދަނޑުމައްޗަށް ވެއްޓި މަރުވެއްޖެ ކަމަށް ލަންކާގެ މީޑިއާ ތަކުން ރިޕޯޓު ކޮށްފި އެވެ.
މި ހާދިސާ ހިނގާފައިވަނީ ޒުލްފިކާރު ނަމަކަށް ކިޔާ ބެޓްސްމަނަކު ކުޅެން ހުއްޓާ، ކުއްލިއަކަށް ދަނޑުމައްޗަށް އޭނާ ވެއްޓުމާ ގުޅިގެންނެވެ.
މެޗުގެ ތެރެއިން ކުޅުންތެރިޔާ ދަނޑުމައްޗަށް ކުއްލި ގޮތަކަށް ވެއްޓޭ މަންޒަރު
ޒުލްފިކާރު ދަނޑުމައްޗަށް ވެއްޓުމާއެކު، މުބާރާތުގެ މެޑިކަލް ޓީމު އެތަނަށް ދިއުމުގެ ކުރިން ދެ ޓީމުގެ ކުޅުންތެރިންނާއި އަމްޕަޔަރުން ވަނީ އޭނާއަށް އެހީތެރިކަން ފޯރުކޮށްދިނުމަށް މަސައްކަތް ކޮށްފަ އެވެ. އަދި ކުއްލި ފަރުވާ ދިނުމަށްޓަކައި ވަގުތުން އޭނާ ދަނޑުން ބޭރަށް ގެންދިޔަ ނަމަވެސް، އޭނާ މަރުވެއްޖެކަން ވަނީ ހާމަކޮށްފަ އެވެ.
ބެލެވޭ ގޮތުގައި ޒުލްފިކާރު މަރުވާން މެދުވެރިވީ ކުޅެން ހުއްޓާ ދިމާވި ހާޓް އެޓޭކެއްގެ ސަބަބުންނެވެ.
މި މެޗު ވަގުތުން ލައިވްކޮށް ދައްކަމުން ދަނިކޮށް ހިނގި މި ހިތާމަވެރި ހާދިސާއާ ގުޅިގެން، މުބާރާތް އިންތިޒާމުކުރި ފަރާތުން ވަނީ މުބާރާތުގެ ހުރިހާ މެޗުތަކެއް ވަކި މުއްދަތެއް ނެތް ގޮތަށް މެދުކަނޑާލާފަ އެވެ.
