"އުއްމީދުތައް ފުރިހަމަކުރަން އަހަރެން މިހުރީ އެންމެ ރަނގަޅު ތަނުގައި" - ހާލަންޑް

މެންޗެސްޓަރ ސިޓީއަކީ އުއްމީދުތައް ހާޞިލްކުރަން އޭނާއަށް އެންމެ ރަނގަޅު ތަންކަމަށް ބޮރޫޝިޔާ ޑޯޓްމަންޑް ދޫކޮށް މެންޗެސްޓަރ ސިޓީއަށް ބަދަލުވި ޒުވާން ފޯވާޑް ހާލަންޑް ބުނެފިއެވެ.

ހޯމަ ދުވަހު ފަސް އަހަރުގެ އެއްބަސްވުމެއްގައި ސިޓީއާއެކު ސޮއިކުރުމަށްފަހު ހާލަންޑް ބުނީ ޔޫރަޕްގެ އެންމެ މޮޅު ކުޅުންތެރިންނާއި, ކޯޗާއެކު އޭނާއަށް އޭނާގެ އަމާޒަށް ވާޞިލްވެވޭނެކަމަށެވެ. 19 އަހަރުގެ ހާލަންޑް ބުނީ މިއީ އޭނާގެ ކެރިއަރުގައި ފަޚުރުވެރި ދުވަހެއް ކަމަށާއި, ސިޓީއަށް ބަދަލުވި ބަދަލުވުމަކީ އޭނާއާއި އާއިލާއަށްވެސް ވަރަށް ބޮޑު އުފަލެއްކަމަށެވެ. ހާލަންޑްގެ ބައްޕަ އަލްފް އިންޖް ހާލަންޑް ވަނީ މީގެކުރިން ސިޓީއަށް ކުޅެފައެވެ. ހާލަންޑްގެ ބައްޕަ ސިޓީއަށް ސޮއިކުރީ މީގެ 22 އަހަރު ކުރިން ޖޫން މަހެއްގެ 13 ވަނަ ދުވަހުއެވެ. އާލިންގ ބްރައުޓް ހާލަންޑްވެސް ސިޓީއަށް ރަސްމީކޮށް ސޮއިކުރީ ޖޫން 13 ވަނަ ދުވަހުއެވެ. ހާލަންޑް ސިޓީއަށް ސޮއިކުރުމުގައި އޭނާގެ ބައްޕަގެ ދައުރުވެސް ބޮޑެވެ.

ސިޓީން ހާލަންޑްގެ ސޮއި ހޯދީ ރެއާލް މެޑްރިޑާއި, ބާސެލޯނާއިންވެސް އޭނާއަށް ޝައުޤުވެރިކަން ފާޅުކޮށްފައިވަނިކޮށެވެ. ހާލަންޑް ވަނީ ކްލަބް ފުޓްބޯޅައިގައި މިހާތަނަށް 121 މެޗުން 92 ގޯލް ޖަހާފައެވެ. މިދިޔަ އަހަރު ހާލަންޑް ވަނީ ޗެމްޕިއަންސްލީގުގައި 20 ގޯލް ޖެހި އެންމެ ކުޅުންތެރިޔާގެ ޝަރަފް ހޯދާފައެވެ. ޤައުމީ ޓީމަށް ކުޅުނު 21 މެޗުން ހާލަންޑް ވަނީ 20 ގޯލް ޖަހާފައެވެ.