ކޮޅުމަޑުލު ދިޔަމިގިލީ ކައުންސިލް އިދާރާއިން އިންތިޒާމުކޮށްގެން ބާއްވާ މުއައްސަސާ ކަޕް 2022 ފަށައިފިއެވެ.

މުއައްސަސާ ކަޕް 2022ގެ ނަމުގައި ދިޔަމިގިލީ ކައުންސިލުން ދެ މުބާރާތެއް ވަނީ ފަށާފައެވެ. އެއީ އެރަށުގެ މުއައްސަސާތަކުގައި މަސައްކަތްކުރާ ފިރިހެން މުއައްޒަފުންނަށް ފުޓްސަލް މުބާރާތެއް، އަދި އަންހެން މުއައްޒަފުންނަށް ހޭންޑް ބޯޅަ މުބާރާތެކެވެ. ފުޓްސަލް މުބާރާތުގައި ފަސް ޓީމަކުން ބައިވެރިވާއިރު، ހޭންޑް ބޯޅަ މުބާރާތުގައި ހަތަރު ޓީމެއް ވާދަކުރެއެވެ.

މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވީ އަތޮޅު ޕޮލިސް ކޮމާންޑަރ، އިންސްޕެކްޓަރ އޮފް ޕޮލިސް އަހްމަދު ހަމީދުއެވެ.

ހޭންޑް ބޯޅަ މުބާރާތުގެ ފުރަތަމަ މެޗުގައި ވާދަކުރީ ހެލްތު ސެންޓަރ ޓީމާއި ފެނަކަ ޓީމެވެ. މި މެޗު 3-1ން ކާމިޔާބުކުރީ ހެލްތު ސެންޓަރ ޓީމެވެ. މެޗުގެ މޮޅު ކުޅުންތެރިއަކަށް ހޮވުނީ ހެލްތު ސެންޓަރ ޓީމުގެ ފާތިމަތު ރީޝާއެވެ.

ފުޓްސަލް މުބާރާތުގެ ފުރަތަމަ މެޗުގައި ފެނަކައާ ވާދަކޮށް ސްކޫލް ޓީމު ކުރިހޯދީ 7-3ންނެވެ. މި މެޗުގެ މޮޅު ކުޅުންތެރިއަކީ ސްކޫލް ޓީމުގެ އަފްޒަލް މުހައްމަދުއެވެ.