ތ. ދިޔަމިގިލީ ކައުންސިލް އިދާރާއިން އިންތިޒާމުކޮށްގެން އެރަށުގެ މުއައްސަސާތަކުގެ މެދުގައި ކުރިއަށް ގެންދިޔަ ދިޔަމިގިލީ މުއައްސަސާ ކަޕް 2022 ކާމިޔާބުކަމާއެކު ނިންމާލައިފިއެވެ.

މުއައްސަސާ ކަޕްގައި ފިރިހެން ޑިވިޝަނަށް ޚާއްސަކޮށްގެން ކުރިއަށް ގެންދިޔަ ފުޓްސަލް މުބާރާތް ކާމިޔާބުކުރީ ހެލްތު ސެންޓަރ ޓީމުންނެވެ. ފައިނަލް މެޗުގައި ސްކޫލް ޓީމުގެ މައްޗަށް ހެލްތު ސެންޓަރކުރިހޯދީ 2-0ންނެވެ.

މުބާރާތުގެ ފުޓްސަލް ކިންގ އަކީ ހެލްތު ސެންޓަރ ޓީމުގެ އަބްދުﷲ ފަރީޝްއެވެ. ޑްރީމް ޓީމުގައި ހިމެނުނީ ހެލްތު ސެންޓަރ ޓީމުގެ ފަރީޝްގެ އިތުރުން ހުސައިން ހަސަން އާއި ސްކޫލް ޓީމުގެ ޝުއާން މުހައްމަދު، އަފްޒަލް މުހައްމަދު އަދި މުހައްމަދު އަރީފްއެވެ.

އަންހެން ޑިވިޝަނަށް އަމާޒުކޮށްގެން ކުރިއަށްގެންދިޔަ ހޭންޑްބޯޅަ މުބާރާތުގެ ފައިނަލުގައި ވާދަކުރީވެސް ހެލްތު ސެންޓަރ ޓީމްއާއި ސްކޫލް ޓީމެވެ. މި މެޗުގެ ފުރިހަމަ ވަގުތު ހަމަވިއިރު 2-2ން އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީގައި ސްކޫލް މޮޅުވީ 1-0ންނެވެ.

މުބާރާތުގެ ހޭންޑް ބޯލް ކުއީންގެ މަގާމު ހޯދީ ކައުންސިލް ޓީމުގެ ފާތިމަތު ސައީދާއެވެ. ސައީދާގެ އިތުރުން ޑްރީމް ޓީމުގައި ހިމެނުނީ ސްކޫލް ޓީމުގެ އާމިނަތު ޖޫލިޔާ، ނާއިލާ އާދަމް، ތިބްޔާން ރަޝީދު އަދި ހެލްތު ސެންޓަރގެ އައިޝަތު އެލީޝާއާއި ހައިފާގެ އިތުރުން ފެނަކަ ޓީމްގެ ޝަނޫނާ މުހައްމަދުއެވެ.