ފަސް ބަދަލު ގެނެވޭ އުސޫލު ގަވާއިދުގައި ހިމަނަނީ

ފުޓުބޯޅަ މެޗެއްގައި ފަސް ބަދަލު ގެނެވޭ ގޮތަށް އޮތް އޮތުން ގަވާއިދުގައި ހިމަނަން ނިންމައިފިއެވެ.

މިި ބަދަލަކީ ކޮވިޑް-19 ގެ ސަބަބުން އަމަލުކުރަން ފެށި އުސޫލެކެވެ. މިކަމާ ގުޅިގެން އިންޓަރނޭޝަނަލް ފުޓްބޯލް އެސޯސިއޭޝަން ބޯޑު (އައިއެފްއޭބީ)ން ހޯމަ ދުވަހު ނިންމާފައިވަނީ އެ ފަސް ބަދަލު ގެނެވޭ ގޮތަށް ގަވާއިދުގައި ހިމަނާށެވެ.

އިނގިރޭސި ޕްރިމިއަރ ލީގުން ވެސް ވަނީ ފަސް ބަދަލު ގެނެވޭ ގޮތަށް ކުޅެފައެވެ. ނަމަވެސް އެންމެ ފަހުން ކުޅުނު ދެ ސީޒަނުގައި އަނެއްކާ ވެސް ވަނީ ތިން ބަދަލު ގެނެވޭ ގޮތަށް ބަދަލުކޮށްފައެވެ. އަދި އަންނަ ސީޒަނުން ފެށިގެން ފަސް ބަދަލު ގެނެވޭ ގޮތަށް ބޭއްވުމަށް ޕްރިމިއަރ ލީގުން މިހާރު ވަނީ އެއްބަސްވެފައެވެ.

އައިއެފްއޭބީން ނިންމާފައިވަނީ މެޗުގެ އިތުރު ވަގުތު ކުޅެން ޖެހިއްޖެ ނަމަ، ހަ ވަނަ ބަދަލެއް ގެނެވޭ ގޮތަށެވެ. އަދި މި ފޯމެޓަށް ޖުލައި މަހުގެ އެއް ވަނަ ދުވަހުން ފެށިގެން އަމަލުކުރުމަށް ވަނީ ނިންމާފައެވެ. މިގޮތަށް ގަވާއިދު ހެދި ނަމަވެސް، މުބާރާތް އިންތިޒާމުކުރާ ފަރާތުން ބޭނުންވާ ނަމަ، ތިން ބަދަލު ގެނެވޭ ގޮތަށް އެ މުބާރާތެއް ކުޅެވިދާނެ ކަމަށް އެ އެސޯސިއޭޝަނުން ވަނީ ނިންމާފައެވެ.

މީގެ އިތުރުން އެ އިދާރާއިން ނިންމާފައިވަނީ ސެމީ އޮޓޮމޭޓެޑް ވީއޭއާރު ވެސް ބޭނުންކުރުމަށެވެ. އެއީ އޮފްސައިޑު އަވަށް ދެނެގަތުމަށް ބޭނުންކުރާ ވަސީލަތެކެވެ. އަދި ސެމީ އޮޓޮމޭޓެޑް ވީއޭއާރު ވަނީ ފީފާ ކުލަބް ވޯލްޑް ކަޕްގައި ބޭނުންކޮށްފައެވެ.