މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕްގައި އެކުއެޑޯއަށް ކުޅެވޭނެކަމަށް ދުނިޔޭގެ ފުޓްބޯޅައިގެ މައި އިދާރާ ފީފާގެ ޑިސިޕްލިނަރީ ކޮމިޓީން ނިންމައިފިއެވެ.
ވޯލްޑް ކަޕް ކޮލިފިކޭޝަން މެޗުތަކުގައި އެކުއެޑޯއަށް ނިސްބަތްނުވާ ކުޅުންތެރިއެއް ޓީމުގައި ހިމަނައިގެން ކުޅުނުކަމަށް ޗިލީން ވަނީ ފީފާއަށް މައްސަލަ ހުށަހަޅާފައެވެ. ޗިލީން ހުށަހަޅާފައިވާ މައްސަލާގައި ވާގޮތުން, އެކުއެޑޯގެ ބައިރޯން ކަސްޓީއޯއަކީ އެގައުމުގެ ރައްޔިތެއް ނޫނެވެ. އަދި އޭނާއަކީ ކޮލޮމްބިއާގެ ޓުމާކޯއަށް 1995 ވަނަ އަހަރު އުފަންވެފައިވާ މީހެއްކަމަށް ޗިލީން ވަނީ ބުނެފައެވެ. އަދި މިކަންތައް ސާބިތުކުރެވޭ ވަރަށް ހެކި އެބަހުރިކަމަށް ޗިލީން ބުނެފައިވެއެވެ.
ނަމަވެސް ރަސްމީ ލިޔެކިޔުންތަކުން ދައްކާ ގޮތުގައި ކަސްޓީއޯ 1998 ވަނަ އަހަރު އުފަންވީ އެކުއެޑޯގެ ސިޓީ އޮފް ޖެނެރަލް ވިލަމިލް ޕަލާޔަސްއަށެވެ. ޗިލީއިން ހުށަހަޅާފައިވާ މައްސަލާގައިވަނީ ކަސްޓީއޯ ފޭކް ޕާސްޕޯޓަކާއި އުފަން ދުވަހުގެ ސެޓްފިކެޓެއް ހެެއްދިކަމަށެވެ.
ފީފާއިން ނެރުނު ބަޔާނެއްގައި ބުނީ މި މައްސަލައަށް ގޮތް ނިންމީ ދެފަރާތުން ހުށަހަޅާފައިވާ ކަންބޮޑުވުންތަކާއި ލިޔެކިޔުންތަކަށް ބެލުމަށްފަހުކަމަށެވެ. ފީފާ ޑިސިޕްލިނަރީ ކޮމިޓީން ނިންމީ ކުރިންވެސް އޮތް ގޮތަށް އެކުއެޑޯއަށް ވޯލްޑް ކަޕުގައި ކުޅެވޭނެ ކަމަށެވެ.
ކޮލިފައިންގައި ކަސްޓީއޯ ވަނީ އެކުއެޑޯ ކުޅުނު 18 މެޗުގެ ތެރެއިން އަށް މެޗު ކުޅެފައެވެ. އަދި އެޓީމަށް ލިބުނު 26 ޕޮއިންޓުގެ ތެރެއިން 14 ޕޮއިންޓު ހޯދާފައިވަނީ ކަސްޓީއޯ ކުޅުނު މެޗުތަކުގައެވެ. ކަސްޓީއޯ ކުޅުނު މެޗުތަކުގެ ޕޮއިންޓު އުނިކުރަން ފީފާއިން ނިންމިނަމަ އެކުއެޑޯއަށް މިފަހަރުގެ ވޯލްޑް ކަޕުގައި ކުޅުމުގެ ފުރުސަތު ގެއްލޭނެއެވެ.
މިއަހަރުގެ ވޯލްޑް ކަޕަށް ދެކުނު އެމެރިކާ ބައްރުން މިހާތަނަށް ކޮލިފައިވެފައި ވަނީ ހަތަރު ޓީމެވެ. އެކުއެޑޯގެ އިތުރުން މުބާރާތަށް ކޮލިފައިވީ ބްރެޒިލް، އާޖެންޓީނާއާއި އުރުގުއޭއެވެ. މިއަންނަ ހަފުތާގައި އޮންނަ ޕްލޭ އޮފް މެޗު ކާމިޔާބު ކޮށްގެން ޕެރޫއަށްވެސް ވޯލްޑް ކަޕް ކުޅުމުގެ ފުރުސަތު އެބައޮތެވެ.
ޗިލީން ކޮލިފައިން ނިންމާލީ 19 ޕޮއިންޓާއެކު ހަތްވަނާގައެވެ. ޗިލީއާ އެކުއެޑޯ ބައްދަލުކުރި ދެމެޗުގައިވެސް ކަސްޓީއޯ ކުޅުނެވެ. މި ދެމެޗުގެ ޕޮއިންޓު ޗިލީއަށް ދޭން ފީފާއިން ނިންމިނަމަ އެކުއެޑޯގެ ބަދަލުގައި ޗިލީއަށް ވޯލްޑް ކަޕް ކުޅުމުގެ ފުރުސަތު ލިބޭނެއެވެ.
