އަންނަ އަހަރު އުތުރު އެމެރިކާގައި ބާއްވާ ފީފާ ވޯލްޑް ކަޕަށް ފްރާންސް ކޮލިފައިވެއްޖެ އެވެ.

ފްރާންސް އިން މި ކާމިޔާބީ ހޯދީ ބުރާސްފަތި ދުވަހުގެ ރޭ ކުޅުނު މެޗުގައި ޔުކްރޭންގެ މައްޗަށް 4-0 އިން ކުރި ހޯދައިގެން ގްރޫޕް ޑީގެ އެއްވަނަ ޓީމުގެ ގޮތުގައެވެ.

ކޮލިފިކޭޝަންގައި ފްރާންސް ވަނީ ފަސް މެޗުން 13 ޕޮއިންޓް ހޯދައިފައެވެ. މި ގްރޫޕްގެ ދެވަނައިގައި އޮތީ އައިސްލޭންޑް އޮތް އިރު ތިންވަނައިގައި އޮތީ ޔުކްރޭން އެވެ. މި ދެ ޓީމަށް ވެސް ފަސް މެޗުން ލިބިފައިވަނީ 7 ޕޮއިންޓެވެ. ގްރޫޕްގެ ފުލުގައި އެއް ޕޮއިންޓާއެކު އޮތީ އަޒަރްބައިޖާން އެވެ. ފްރާންސް އިން ވޯލްޑް ކަޕްގެ ޖާގައެއް ކަށަވަރު ކުރިއިރު، ކޮލިފައިންގ ގްރޫޕްގައި ފްރާންސް އަށް ބާކީ އަދި އެއް މެޗު އެބައޮތެވެ.

ޔުކްރޭންއާ ދެކޮޅަށް ކުޅުނު މެޗުގައި ފްރާންސުން ވަނީ ވަރުގަދަ ކުޅުމެއް ދައްކައިފައެވެ. މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، ދެވަނަ ހާފުގައި ފްރާންސް އިން ވަނީ ވަރުގަދަ ހަމަލާތަކެއް އުފައްދާ ހަތަރު ގޯލު ޖަހާފައެވެ.

މެޗުގެ 55 ވަނަ މިނެޓްގައި ލިބުނު ޕެނަލްޓީއަކުން ފްރާންސަށް ލީޑު ނަގައިދިނީ ޒުވާން ސްޓާރު ކިލިއަން އެމްބާޕޭ އެވެ. މެޗުގެ 76 ވަނަ މިނެޓްގައި މައިކަލް އޮލީސޭ ފްރާންސްގެ ދެވަނަ ގޯލު ކާމިޔާބުކޮށްދިނެވެ. އަދި މެޗުގެ 83 ވަނަ މިނެޓްގައި އެމްބާޕޭ އަނެއްކާވެސް ގޯލު ކާމިޔާބުކޮށް އޭނާގެ ދެވަނަ ގޯލު ޖަހައި ފްރާންސްގެ ތިންވަނަ ގޯލު ކާމިޔާބުކޮށްދިނެވެ. މެޗުގެ 88 ވަނަ މިނެޓްގައި ހޫގޯ އެކިޓީކޭ ފްރާންސްގެ ފަހު ގޯލު ކާމިޔާބު ކޮށްދިނުމާއެކު މެޗު ނިންމާލީ 4-0 އިންނެވެ.

މިއީ ފްރާންސް ވޯލްޑް ކަޕަށް ކޮލިފައިވި 17 ވަނަ ފަހަރެވެ. ފްރާންސުން ވަނީ ވޯލްޑް ކަޕް ދެ ފަހަރެއްގެ މަތިން ކާމިޔާބުކޮށްފަ އެވެ. އެންމެ ފަހުން ފްރާންސް ކާމިޔާބުކުރީ 2018 ވަނަ އަހަރު ރަޝިއާގައި ބޭއްވި ވޯލްޑް ކަޕް މުބާރާތެވެ.

އަންނަ އަހަރުގެ ވޯލްޑް ކަޕްގައި 48 ޓީމަކުން ވާދަކުރާއިރު، މިއީ މި ފޯމެޓުގައި ބާއްވާ ފުރަތަމަ ވޯލްޑް ކަޕެވެ. މުބާރާތުގައި ޖުމްލަ 104 މެޗު ކުޅުމަށް ހަމަޖެހިފައިވާއިރު، މެޗުތައް ކުޅޭނީ އެމެރިކާގެ 16 ސިޓީއެއްގައެވެ. ވޯލްޑް ކަޕް ކުރިއަށްދާނީ ޖޫން 11 އިން ފެށިގެން ޖުލައި 19 އަށެވެ.