ޕީއެސްޖީގެ ސްޕޯޓިންގ ޑައިރެކްޓަރަކަށް ކަމްޕޯސް ހަމަޖައްސައިފި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ސްޕޯޓިންގ ޑައިރެކްޓަރުގެ މަގާމަށް ލުއިސް ކަމްޕޯސް ހަމަޖައްސައިފިއެވެ.

މި މަގާމަށް އޭނާ ހަމަޖެއްސީ އެ މަގާމުގައި ކުރިން ހުރި ބްރެޒިލްގެ ލިއޮނާޑޯ އަރައުހޯ މަގާމުން ވަކިކުރުމަށްފަހުއެވެ. މިއީ ނިމުނު ސީޒަނުގައި ޕީއެސްޖީއަށް ލިބުނު ދަށް ނަތީޖާގެ ސަބަބުން ޓީމުގެ ހިންގުމަށް ގެންނަ ބަދަލުގެ ތެރެއިން ބަދެލެކެވެ. މީގެ އިތުރުން ޕީއެސްޖީން އެ ޓީމުގެ ކޯޗުގެ މަގާމުގައި ހުރި  މައުރީސިއޯ ޕޮޗެޓީނޯ މަގާމުން ވަކިކުރަން މަސައްކަތްކުރާކަމަށް މީޑިއާ ރިޕޯޓުތައް ބުނެއެވެ. އަދި އޭނާގެ ބަދަލުގައި ޒިނެދިން ޒިދާން ހޯދުމަށް މަސައްކަތް ކުރާ ކަމަށް ވެސް ރިޕޯޓުތައް ބުނެއެވެ.

މީގެ ކުރިން ފްރާންސްގެ ރައީސް އިމެނުއެލް މެކްރޯން ވިދާޅުވީ ކުޅުންތެރިއެއް އަދި ކޯޗެއްގެ ގޮތުގައިވެސް އޭނާ ޒިދާންއަށް ވަރަށް ބޮޑަށް ސަޕޯޓުކުރައްވާ ކަމަށެެވެ. އަދި ރެއާލް މެޑްރިޑްއާއެކު ޒިދާން ތިން ޗެމްޕިއަންސް ލީގު ކާމިޔާބުކޮށްފައިވާކަން ފާހަގަކުރައްވާ އިމެނުއެލް މެކްރޯން ވިދާޅުވީ އެއީ ޕީއެސްޖީންވެސް ބޭނުންވާ ތަށި ކަމަށެވެ. މީގެ އިތުރުން މެކްރޯން ވިދާޅުވީ ޒިދާން އެނބުރި ގައުމަށް އައިސް ޕީއެސްޖީއާ ފްރާންސްގެ ފުޓްބޯޅަ ކުރިއަރުވަން މަސައްކަތް ކުރާތަން ބައްލަވާލައްވަން ބޭނުންފުޅުވާ ކަމަށެވެ.

ޕީއެސްޖީގެ ސްޕޯޓިން ޑައިރެކްޓަރުގެ މަގާމަށް ހަމަޖެއްސި ކަމްޕޯސް ވަނީ އެފްސީ މޮނާކޯގެ ސްޕޯޓިންގް ޑައިރެކްޓަރުކަން ކޮށްފައެވެ.