އޭއެފްސީ އޭޝިއަން ކަޕްގެ ކޮލިފައިންގގައި ރާއްޖެ ކުޅުނު ފުރަތަމަ މެޗުން ބަލިވެއްޖެއެވެ.

ބުދަ ދުވަހު ހަވީރު އުޒްބަކިސްތާނުގެ މަރްކަޒީ ސްޓޭޑިއަމްގައި ތައިލެންޑް އާއި ވާދަކުރި މެޗުން ރާއްޖެ ބަލިވީ 3-0ންނެވެ. މެޗު ފެށިގެން ތައިލެންޑު ޓީމުން އެޓޭކިން ގޭމެއް ކުޅުނުއިރު، ރާއްޖެ ކުޅުނީ ވަރަށް ބޮޑަށް ފަހަތަށް ޖެހިގެންނެވެ. ފުރަތަމަ ހާފުގައި ތައިލެންޑުން ގިނަ ހަމަލާތަކެއް އުފެއްދިއިރު އެޓީމުން ފުރަތަމަ ލީޑު ނެގީ މެޗުގެ 40 ވަނަ މިނެޓުގައެވެ. މިއީ ތައިލެންޑުގެ ކެޕްޓަން ތީރަތޯން ބުންމަތަން ނަގައިދިން ހުރަހެއް ބޮލުން ޖަހާ ގޯލުގެ ތެރެއަށް ފޮނުވާލައިގެން ސަރާޗް ޔޫޔެން ކާމިޔާބުކޮށްދިން ލަނޑެކެވެ. ފުރަތަމަ ހާފުގެ އިތުރު ވަގުތުގައި ތައިލެންޑުން ލަނޑެއް ޖަހާ ލީޑު ފުޅާކުރިއެވެ. މި ލަނޑު އެޓީމަށް ކާމިޔާބުކޮށްދިނީ ތީރަސީލްއެވެ.

ދެވަނަ ހާފުގައި ރާއްޖެއިން ކުރިއަށް ޖެހިގެން ލަނޑެއް ޖެހުމަށް މަސައްކަތް ކުރިއެވެ. ނަމަވެސް ލަނޑު ޖަހަން ކުރި މަސައްކަތް ކާމިޔާބުވާގޮތެއް ނުވިއެވެ. ތައިލެންޑުގެ ފަހު ލަނޑު 79 ވަނަ މިނެޓުގައި ޖަހައިދިނީ ޕަންސާ ހެމްވިބޫންއެވެ. މި ލަނޑު ޖެހުމަށްވެސް އެހީތެރިވީ ކެޕްޓަން ތީރަތޯންއެވެ.

މި ބައްޔާއެކު މިއަންނަ އަހަރު އޮތް އޭޝިއަން ކަޕްއަށް ކޮލިފައިވުމަށް ރާއްޖެއަށް އިތުރަށް އުނދަގޫވީއެވެ. އަމިއްލަ ބާރުގައި މުބާރާތަށް ކޮލިފައިވާން ބޭނުންނަމަ ކުރިއަށް އޮތް ދެމެޗު ކާމިޔާބު ކުރަން ޖެހޭނެއެވެ.  ކޮލިފައިންގ ގައި ރާއްޖެ ހިމެނެނީ ތައިލެންޑު، އުޒްބެކިސްތާނު އަދި ސްރީލަންކާއާ އެއް ގްރޫޕެއްގައެވެ. ގްރޫޕުގެ މެޗުތައް ސެންޓްރަލައިޒްކޮށް ކުޅޭނީ އުޒްބެކިސްތާނުގައެވެ. އޭޝިއަން ކަޕްގެ ޖާގަ ލިބޭނީ ހަ ގްރޫޕުގެ ތެރެއިން ކޮންމެ ގްރޫޕެއްގެ އެއްވަނަ ޓީމާ، ހަ ގްރޫޕުން ދެވަނައަށްދާ ޓީމުތަކުގެ ތެރެއިން ފަސް ޓީމަކަށެވެ.

ކޮލިފައިންގގެ ދެވަނަ މެޗުގައި މި މަހުގެ 10 ވަނަ ދުވަހު ރާއްޖެ ނިކުންނާނީ އުޒްބެކިސްތާންއާއި ދެކޮޅަށެވެ. އޭގެ ފަހުން ކޮލިފައިންގ ގެ ފަހުމެޗުގައި ސްރީލަންކާއާ ދެކޮޅަށް ރާއްޖެ ކުޅޭ މެޗު އޮންނާނީ މި މަހުގެ 14 ވަނަ ދުވަހުއެވެ.