ތަޖަކިސްތާނު ބަަލިކޮށް، ފުރަތަމަ ފަހަރަށް ޖޯޑަން ސެމީ ފައިނަލަށް

މިހާރު ކުރިއަށްދާ އޭއެފްސީ އޭޝިއަން ކަޕްގެ ކުއާޓާ ފައިނަަލްގައި ތަޖަކިސްތާނާ ދެކޮޅަށް ކުޅުނު މެޗުން މޮޅުވެ، ފުރަތަމަ ފަހަރަށް ޖޯޑަން އިން މުބާރާތުގެ ސެމީ ފައިނަލަށް ދަތުރު ކޮށްފި އެވެ.

މިއީ ޖޯޑަން މުބާރާތުގެ ކުއާޓާ ފައިނަލްގައި ކުޅުނު ތިން ވަނަ ފަހަރެވެ. ނަަމަވެސް، މީގެ ކުރިން ކުޅުނު ދެ ފަހަރު ވެސް، އެ ޓީމަށް ސެމީ ފައިނަލާ ހަމަ އަށް ދެވޭ ގޮތެއް ނުވި އެވެ. ހުކުރު ދުވަހުގެ ރޭ ކުޅުނު ކުއާޓާ ފައިނަލް މެޗު ޖޯޑަން އިން ކާމިޔާބު ކުރީ 1-0 އިންނެވެ.

މެޗުގައި ދެ ޓީމުގެ ފަރާތުން ވެސް ހަމަހަމަ ކުޅުމެއް ފުނުނުއިރު، ދެ ޓީމަށް ވެސް ލަނޑު ޖަހާނެ ފުރުސަތު ލިބުނެވެ. މެޗުން ޖޯޑަން މޮޅުވީ ދެ ވަނަ ހާފުގައި ޖެހި ލަނޑުންނެވެ. އެއީ މެޗުގެ 66 ވަނަ މިނެޓުގައި ތަޖަކިސްތާންގެ ވަހުދަތު ޚަނޯނޯ އަތުން ބައި ކޮޅަށް ވަތް ލަނޑުންނެވެ.

މިއަހަރުގެ މުބާރާތަކީ ތަޖަކިސްތާނުން އޭޝިއަން ކަޕްގަައި ވާދަކުރި ފުރަތަމަ މުބާރާތެވެ. މުބާރާތުގެ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން އެ ޓީމު ވަނީ އެއް މެޗުން މޮޅުވެފަ އެވެ. އަނެއް މެޗުން ބަލިވެފައިވާއިރު، އަނެއް މެޗު ނިމުނީ އެއްވަރުވެގެންނެވެ. މުބާރާތުގެ ގަދަ 16 ގައި ތަޖަކިސްތާނުން ޔުނަައިޓެޑު އަރަބް އެމިރޭޓްސް (ޔޫއޭއީ)ގެ މައްޗަށް ކުރި ހޯދީ ޕެނަލްޓީ ޖަހައިގެންނެވެ.

އޭޝިއަން ކަޕްގައި ޖޯޑަން ކުޅޭ ފުރަތަމަ ސެމީ ފައިނަލްގައި ނިކުންނާނީ ސައުތު ކޮރެއާއާ ދެކޮޅަށެވެ.