ޓެސްލާގެ ވަޒީފާތަކުން 10 އިންސައްތަ މަދުކުރުމަށް އެކުންފުނީގެ ޗީފް އެގްޒެކެޓިވް އީލޮން މަސްކް ބުނެފައިވާ ކަމަށް ރޮއިޓަރސް އިން ރިޕޯޓުކޮށްފިއެވެ.

ރޮއިޓަރސް އިން ރިޕޯޓުކޮށްފައިވާގޮތުން އީލޮން މަސްކް ވަނީ ކުރިއަށް އޮތްތާގައި ދުނިޔޭގެ އިގުތިސާދު ވަރަށް ބޮޑަށް ގޯސްވެދާނެ ކަމަށް އޭނާއަށް ހީވާކަމަށް ބުނެ ވަޒީފާތައް މަދުކުރުމަށް ކުންފުނީގެ އެގްޒެކެޓިވްސް އަށް އީމެއިލް ކޮށްފައެވެ.

އެގޮތުން މި އީމެއިލްގައި ކުންފުނީގެ ވަޒީފާތަކުން 10 އިންސައްތަ ވަޒީފާ މަދުކުރުމަށް ބުނެފައިވާކަމަށް ވަނީ ރިޕޯޯޓުކޮށްފައެވެ.

ބުރާސްފަތި ދުވަހު ފޮނުވި އީމެއިލްގައި ދުނިޔޭގެ ބާޒާރުގައި ތަކެތީގެ އަގު އުފުލުމާއި ޔޫކްރެއިން ރަޝިއާ ހަނގުރާމަ ހުއްޓުމެއް ނެތި ކުރިއަށްދާ ދިއުމުގެ ސަބަބުން ކުރިއަށް އޮތްތާގައި ދުނިޔޭގެ އިގުތިސާދު ވަރަށް ބޮޑަށް ގޯސްވެދާނެ ކަަމަށް ލަފާކުރެވޭކަމަށް ވަނީ ބުނެފައެވެ. މިމެއިލްގައި މަސްކް ވަނީ އިތުރު މުވައްޒަފުން ނުނެގުމަށްވެސް ބުނެފައެވެ.

މީގެ ކުރިންވެސް އެކި ފަހަރުމަތިން ރިސެޝަނަކަށް ގޮސްދާނެ ކަމުގެ ބިރު އެބައޮތް ކަމަށް މަސްކް ފާހަގަކޮށްފައިވާއިރު، ވަޒީފާތައް މަދުކޮށް އިތުރު މުވައްޒަފުން ނުނެގުމަށް ބުނި ބުނުން މިއީ މިހާތަނަށް މިފަދަ ބޮޑު ކުންފުންޏެއްގެ ވެރިއެއް މިހާ ސީދާކޮން އެންގި ފުރަތަމަ ފަހަރުކަމަށް ރޮއިޓަރސް އިން ފާހަގަކުރެއެވެ.

މިހާތަނަށް އައިރު ޓެސްލާ އާއި އެހެނިހެން އިލެކްޓްރިކް އުޅަނދުތަކަށް ހުރި ޑިމާންޑަށް ބަދަލުތަކެއް ނާދެއެވެ. އެހެންނަމަވެސް ކޮވިޑް-19ގެ ސަބަބުން ޗައިނާގެ ޝަންގްހާއީގައި އެޅި ފިޔަވަޅުތަކާއެކު އެސިޓީގައި ހުރި ޓެސްލާގެ ފެކްޓްރީގައި މަސައްކަތްތައް ފެށުމުގައި ވަނީ ގޮންޖެހުންތަކާ ކުރިމަތިވެފައެވެ.

ތަފާސްހިސާބުތައް ދައްކާގޮތުން މިދިޔަ އަހަރު ނިމުނު އިރު، ޓެސްލާއިން 100،000 އެއްހާ މީހުންނަށް ވަޒީފާ ދީފައިވާއިރު، މަސްކްގެ މި އީމެއިލް ފޮނުވުމާ ހަމައަށްވެސް އެކުންފުނިން 5،000 އެއްހާ ވަޒީފާ ވަނީ އިއުލާންކޮށްފައެވެ.