ޔޫއެސްއެއިޑްގެ އިސް އޮފިޝަލުން ޗުއްޓީ އަށް ފޮނުވާލުމަށް ފަހު މަސްކް ވިދާޅުވަނީ އެ އޭޖެންސީ "މަރުވުމުގެ" ވަގުތު ޖެހިއްޖެ ކަމަށް

އެމެރިކާ އިން ބޭރު ދުނިޔެއަށް ދޭ އެހީގެ މަސައްކަތްތައް ކުރަމުން އައި ޔުނައިޓެޑް ސްޓޭޓްސް އޭޖެންސީ ފޯ އިންޓަނޭޝަނަލް ޑިވެލޮޕްމަންޓް (ޔޫއެސްއެއިޑް) "މަރުވަން" ޖެހޭ ކަމަށް އީލޮން މަސްކް ވިދާޅުވެއްޖެއެވެ.

އޭނާ މިހެން ވިދާޅުވެފައިވަނީ ޔޫއެސްއެއިޑްގެ އިސް ސެކިއުރިޓީ ދެ އޮފިޝަލުން ޗުއްޓީއަށް ފޮނުވާލެވުނު ކަމަށް ރިޕޯޓުތަކުގައި ބުނެފައިވާ ވަގުތެއްގައެވެ. އެ ދެ އޮފިޝަލުން ޗުއްޓީއަށް ދާން މަޖުބޫރު ކުރީ މަސްކްގެ މަންދޫބުންނަށް އެ އޭޖެންސީން ސިއްރު ލިޔެކިޔުންތަކެއް ބެލުމުގެ ހުއްދަ ދިނުމަށް އިންކާރުކުރުމާ ގުޅިގެންނެވެ.

އެމެރިކާގެ ވެރިކަމަށް ވަޑައިގެންނެވި ރައީސް ޑޮނަލްޑް ޓްރަމްޕް ޑިޕާޓްމަންޓް އޮފް ގަވަރންމަންޓް އެފިޝެންސީ (ޑޯޖް) ގެ ވެރިޔަކަށް އިސްކުރެއްވި މަސްކް ވިދާޅުވެފައިވަނީ، ވޮޝިންގްޓަން ޑީސީގައި ހުންނަ ޔޫއެސްއެއިޑް ގެ މައި އޮފީހުގެ ވަކި ސަރަހައްދުތަކަށް ވަނުމުގެ ހުއްދަ އޭނާގެ އޮފީހުގެ ޓާސްކް ފޯސްގެ މެންބަރުންނަށް ސެކިއުރިޓީ އޮފިޝަލުން ދިނުމަށް އިންކާރުކުރުމާ ގުޅިގެން ޔޫއެސްއެއިޑް އަކީ "ކުށްކުރާ މުއައްސަސާއެއް" ކަމަށެވެ.

"އެ ތަން މަރުވުމުގެ ވަގުތު ޖެހިއްޖެ،" މަސްކް އޭނާގެ ސޯޝަލް މީޑިއާ ޕްލެޓްފޯމް އެކްސްގައި ލިޔުއްވިއެވެ.

ޔޫއެސްއެއިޑްގެ ސެކިއުރިޓީ ޑައިރެކްޓަރ އާއި އޭނާގެ ނައިބު ޗުއްޓީއަށް ފޮނުވާލެވުނީ ސަރުކާރު ހިންގުމުގެ ޚަރަދު ކުޑަކުރުމުގެ މަސްއޫލިއްޔަތުތައް ހަވާލު ކޮށް އަލަށް އުފެއްދި ޑޯޖްގެ މުވައްޒަފުންނަށް ވޮޝިންގޓަނުގައި ހުންނަ ޔޫއެސްއެއިޑް އޮފީހުގެ ވަނުން މަނާ ސަރަހައްދު ތަކަށް ވަނުމުގެ ހުއްދަ ދިނުމަށް އިންކާރުކުރުމާ ގުޅިގެންނެވެ. މިކަން ފުރަތަމަ ރިޕޯޓުކުރީ ސީއެންއެންއިންނެވެ. އަދި ގިނަ އެމެރިކާގެ މީޑިއާތަކުން ނަން ހާމަނުކުރާ އޮފިޝަލުންނާ ހަވާލާދީ މިކަން ހިނގިކަން ރިޕޯޓުކޮށްފައިވެއެވެ.

ޓްރަމްޕްގެ އެގްޒެކެޓިވް އޯޑަރަކުން އުފެއްދެވި ނަމަވެސް ސަރުކާރުގެ ޑިޕާޓްމަންޓެއްގެ ގޮތުގައި ނުހިމެނޭ ޑޯޖް ގެ އޮފިޝަލުންނަށް ފަހުން މަނާކުރި ސަރަހައްދަށް ވަދެވުނެވެ. އަދި އެމީހުން ބޭނުންވި ލިޔެކިޔުންތަކާ ހަމައަށް ވާސިލުވިއެވެ. މި ހާދިސާ ހިނގިކަމަށް ގިނަ ރިޕޯޓުތަކުގައި ބުނެފައިވެއެވެ.

އެހެން ނަމަވެސް ވައިޓް ހައުސްގެ ކޮމިއުނިކޭޝަންސް ޑައިރެކްޓަރ ސްޓީވަން ޗުއަންގް ވިދާޅުވެފައިވަނީ ޑޯޖް ގެ މުވައްޒަފުން މަނާ ސަރަހައްދަށް ވަނުމަށް މަސައްކަތްކުރި ކަމަށް ބުނާ ޕީބީއެސްގެ ރިޕޯޓަކީ "ދޮގު ޚަބަރެއް" ކަމަށާއި "އެއްވެސް ވަރަކަށް ތެދެއް ނޫން" ކަމަށެވެ.