ގާތް ރަޙުމަތްތެރިންގެ ގޮތުގައި ތިބުމަށް ފަހު އުފެދުނު ޚިޔާލު ތަފާތުވުންތަކާ ގުޅިގެން އެކަކު އަނެކަކަށް ފާޑު ވިދާޅުވެ ވާހަކަ ދެއްކުމަށް ފަހު، އެމެރިކާގެ ރައީސް ޑޮނަލްޑް ޓްރަމްޕް އަދި ބިލިއަނަރު އީލޮން މަސްކު އެއް ތަނަކު ބައްދަލުވެ، އަތާ އަތް ޖޯޑުކޮަށް ސަލާމް ކުރައްވައިފި އެވެ.

ޓްރަމްޕް އާއި މަސްކު ބައްދަލުވެފައި ވަނީ، ދާދި ފަހުން ދިން ހަމަލާއެއްގައި މަރާލި ޗާލީ ކާކްގެ ހަނދާނުގައި ބޭއްވި ޚާއްސަ އިވެންޓުގަ އެވެ. އެ އިވެންޓުގައި ޓްރަމްޕް އާއި މަސްކު ތިއްބެވީ ވެސް، ގާތް ގާތުގައި ޖެހި ޖެހިގެންނެވެ.

އެރިޒޯނާގެ ގްލެންޑޭލްގައި ބޭއްވި އެ ރަސްމިއްޔާތަކީ، މި ހިނގާ ސެޕްޓެމްބަރު މަަހުގެ 10 ވަނަ ދުވަހު ޔުޓާ ޔުނިވާސިޓީގެ ކެމްޕަހުގައި އިންދާ، ބަޑިން ހަމަލާ ދީ މަރާލި ޗާލީގެ ހަނދާނުގައި ބޭއްވި ރަސްމިއްޔާތެކެވެ. އެ ރަސްމިއްޔާތުގައި އެތައް ހާސް ބަޔަކު ވަނީ ބައިވެރިވެފަ އެވެ.

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި މަސްކު ވަނީ އަމަލީ ގޮތުން ބައިވެރިވެ، ޓްރަމްޕް އަށް ކެމްޕެއިން ކުރައްވައިފަ އެވެ. އަދި އޭނާ ވަނީ ޓްރަމްޕްގެ ކެމްޕެއިން އަށް 270 މިލިއަން އެމެރިކާ ޑޮލަަރަށް ވުރެ ގިނައިން ޚަރަދު ކޮށްފަ އެވެ.

ޓްރަމްޕްގެ ރިޔާސީ ދެ ވަނަ ދައުރު ފެށުމާ އެކު، ޑިޕާޓްމަންޓް އޮފް ގަވަމެންޓް އެފިޝެންސީ (ޑޯޖް)ގެ އިސްވެރިޔަކަށް ހަމަޖެއްސެވީ ވެސް މަސްކު އެވެ. ނަމަވެސް، ޓްރަމްޕްގެ ސަރުކާރުން ހުށަހެޅި ޓެކްސް އަދި ހޭދަ ކުރުމުގެ ބިލާ ގުޅިގެން ޓްރަމްޕް އާއި މަސްކާ ދެމެދު ނުތަނަވަސްކަން އުފެދުނެވެ. އޭގެ ފަހުން މަސްކު ވަނީ ޓްރަމްޕްގެ ސަރުކާރުން ވަކިވާން ނިންމައިފަ އެވެ.

ޗާލީގެ ހަނދާނުގައި ބޭއްވި ރަސްމިއްޔާތަށް ފަހު، ޓްރަމްޕްއާ އެކު ނަންގަވާފައިވާ ފޮޓޯ އެއް މަސްކު އޭނާގެ އެކްސް އެކައުންޓުގައި ޕޯސްޓު ކުރައްވައިފަ އެވެ. އެ ޕޯސްޓުގައި މަސްކު ލިޔުއްވާފައި ވަނީ "ފޯ ޗާލޯ" މިހެންނެވެ. ހަމަ އެހެންމެ، އެމެރިކާގެ ރިޔާސީ ގަނޑުވަރު ވައިޓް ހައުސް އިން ވެސް ވަނީ، މަސްކު އާއި ޓްރަމްޕް އަތް ގުޅާލައިގެން ތިއްބެވި މަންޒަރު ފެންނަ ވީޑިއޯ ޕޯސްޓު ކޮށްފަ އެވެ.

ޓްރަމްޕްއާ މައްސަލަ ޖެހި ސަރުކާރުން ވަކިވި ފަހުން މަސްކު ވަނީ، ޓްރަމްޕްއާ ދެކޮޅަށް ސިޔާސީ ޕާޓީއެއްް އުފައްދަވާނެ ކަަމަށް ވެސް އިއުލާން ކުރައްވައިފަ އެވެ. ނަމަވެސް، އެކަމުގައި މިހާތަނަށް މަސްކު އަށް މާ ބޮޑު ކުރިއެރުމެއް ހޯދިފައި ނުވެ އެވެ.