އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ހުށަހަޅާފައިވާ ޚަރަދުގެ ބިލަކީ "ނުބައި އަނިޔާވެރި" ބިލެއް ކަމަށް، މުއްސަނދި ވިޔަފާރިވެރިޔާ، އަދި ޓްރަމްޕާ ގާތް ގުޅުމެއް އޮތް އީލޮން މަސްކް ވިދާޅުވެއްޖެ އެވެ.

އެމެރިކާގެ ރިޔާސީ ދެ ވަނަ ދައުރަކަށް ޓްރަމްޕް އިންތިޚާބު ކުރުމަށްޓަކައި މަސްކް ވަނީ ވަރަށް ބުރަކޮށް މަސައްކަތް ކުރައްވައިފަ އެވެ. މާލީ ގޮތުން ޓްރަމަޕްގެ ކެމްޕެއިން އަށް އެހީތެރިވުމުގެ އިތުރުން، މަސްކް ވަނީ އަމަލީ ގޮތުން ވެސް ޓްރަމްޕްގެ ކެމްޕެއިންގައި ބައިވެރިވެފަ އެވެ. އަދި ޓްރަމްޕާއި މަސްކާ ދެމެދު އޮތީ ވަރަށް ގާތް ގުޅުމެއް ވެސް އުފެދިފަ އެވެ.

މިއަހަރުގެ ޖަނަވަރީ މަހު ރިޔާސީ ދެ ވަނަ ދައުުރުގެ ހުވާ ކުރައްވައި ވެރިކަމާ ހަވާލުވުމަށް ފަހު ޓްރަމްޕް ވަނީ މަސްކަށް ސަރުކާރުގެ މަގާމެއް ވެސް ހަވާލު ކުރައްވައިފަ އެވެ. އެގޮތުން ޑިޕާޓްމަންޑް އޮފް ގަވަމަންޓް އެފިޝެންސީ (ޑޯޖް)ގެ އިސްވެރިޔާގެ ގޮތުގައި މަސްކް ހަމަޖައްސަވައި، ސަރުކާރުގެ ޚަރަދު ކުޑަ ކުރުމުގެ މުހިންމު މަސައްކަތެއް ވަނީ މަސްކާ ހަވާލު ކުރައްވައިފަ އެވެ.

ނަމަވެސް މިިދިޔަ ހަފުތާގެ ތެރޭގައި މަސްކް ވަނީ ޓްރަމްޕްގެ ސަރުކާރުން ވަކިވެފަ އެވެ. އަދި ޓްރަމްޕް ވަނީ ސަރުކާރުގައި މަސްކް ކޮށްދެއްވާފައިވާ ޚިދުމަތްތަކަށް ޝުކުރު އަދާ ކުރައްވައިފަ އެވެ. އޭރު ވެސް، މަސްކާއި ޓްރަމްޕްގެ ގުޅުން ގޯސްވެފައިވާ ކަމުގެ އަޑުތަކެއް އޮތީ ފެތުރިފަ އެވެ. 

އޭގެ ފަހުން މަސްކް އޭނާގެ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، ޚަރަދުގެ ބިލަކީ "ނުބައި އަނިޔާވެރި" ބިލެއް ކަމަށެވެ. އަދި އެ ބިލާ އެއްކޮޅަށް ކޮންގްރެސްގައި ވޯޓު ދެއްވި މެމްބަރުން ވެސް ލަދު ގަންނަން ޖެހޭނެ ކަމުގައި މަސްކް ވިދާޅުވި އެވެ. އަދި އެނގި ތިބެ ކޮށްފައި ވަނީ ވަރަށް ނުބައި ކަމެއްގެ ގޮތުގައި މަސްކް ވަނީ އެކަން ސިފަ ކުރައްވައިފަ އެވެ. 

ޓްރަމްޕްގެ ސަރުކާރުން ހުށަހަޅާފައިވާ އެ ބިލުގެ ސަބަބުން 10 އަހަރު ދުވަހުގެ ތެރޭގައި އެމެރިކާގެ ދަރަނި އިތުރު ވާނެ ކަމަށް ވަނީ އަންދާޒާ ކޮށްފަ އެވެ. އެގޮތުން ގާތް ގަނޑަކަށް ތިން ބިލިއަން އެމެރިކާ ޑޮލަރަށް ދަރަނި އިތުރު ވާނެ ކަމަށް ބުނެފައިވެ އެވެ.