އީލޯން މަސްކްގެ ކެނެޑާގެ ރައްޔިތުކަން ބާތިލުކުރުމަށް ސަރުކާރަށް ގޮވާލާ ހުޅުވާލި ޕެޓިޝަނެއްގައި އެތައް ހާސް މީހުން ސޮއިކޮށްފި

ކެނެޑާ އާއި ޓްރަމްޕް ސަރުކާރާ ދެމެދު އުފެދިފައިވާ އަރާރުމުގެ ތެރޭގައި، ޓެސްލާގެ ވެރިޔާ އަދި ބިލިއަނަރު އީލޯން މަސްކްގެ ކެނެޑާގެ ރައްޔިތުކަން ބާތިލުކުރުމަށް ސަރުކާރަށް ގޮވާލާ ހުޅުވާލި ޕެޓިޝަނެއްގައި 250،000 އަށްވުރެ ގިނަ މީހުން ސޮއިކޮށްފިއެވެ.

ފެބްރުއަރީ 20 ގައި ފެށުނު މި ޕެޓިޝަންގައި، މަސްކް ކެނެޑާގެ ޤައުމީ މަސްލަހަތާ ދެކޮޅަށް މަސައްކަތްކޮށް، އެޤައުމުގެ މިނިވަންކަން ނިގުޅައިގަތުމަށް މަސައްކަތްކުރާ ކަމަށް ތުހުމަތު ކޮށްފައިވެއެވެ.

ޕެޓިޝަނަށް ޖަވާބުދެމުން، މަސްކް އޭނާގެ އެކްސް ޕްލެޓްފޯމްގައި "ކެނެޑާއަކީ ހަޤީޤީ ޤައުމެއް ނޫން" ކަމަށް ލިޔެފައިވެއެވެ. ނަމަވެސް މި ޕޯސްޓް ފަހުން ވަނީ ޑިލީޓްކޮށްފައެވެ.

މި ޕެޓިޝަން ހުޅުވިފައި އޮންނާނީ ޖޫން 20 އާ ހަމައަށެވެ. މިއީ ޤާނޫނީ ބާރެއް ލިބިގެންވާ ޕެޓިޝަނެއް ނޫނެވެ. އެހެން ނަމަވެސް އާންމުގޮތެއްގައި 500 މީހުން ސޮއިކޮށް، ޕާލިމެންޓް މެންބަރެއްގެ ތާއީދު ލިބޭ ޕެޓިޝަންތަކަށް ސަރުކާރުން ޖަވާބުދާރީވެއެވެ. ނަމަވެސް ޕާލިމެންޓަރީ ކުޑަތަން ވެފައި އޮތުމާއެކު މި ޕެޓިޝަން އަކީ ބުރަދަނެއް ހުރި އެއްޗަކަށް ނުވެ ދިއުމަކީ އެކަށީގެންވާ ކަމެކެވެ.

ކެނެޑާގެ ޤާނޫނުގެ ދަށުން ރައްޔިތުކަން ބާތިލުކުރެވޭނީ އިމިގްރޭޝަން ނުވަތަ ރައްޔިތުކަމުގެ ފޯމުގައި މަކަރާއި ހީލަތް ހެދުމުގެ ސަބަބުން އެކަންޏެވެ.

ދެކުނު އެފްރިކާގައި އުފަންވި މަސްކް އަކީ މިހާރު އެމެރިކާ އާއި ކެނެޑާގެ ރައްޔިތެކެވެ.