ޔުނައިޓެޑް އާއި، ސިޓީގެ ކުރީގެ ފޯވާޑް ތެވޭޒް ކުޅުން ހުއްޓާލައިފި

މެންޗެސްޓަރ ޔުނައިޓެޑް އަދި މެންޗެސްޓަރ ސިޓީގެ ކުރީގެ ފޯވާޑް ކާލޯސް ތެވޭޒް ކުޅުން ހުއްޓާލައިފިއެވެ. އާޖެންޓީނާގެ ޤައުމީ ޓީމަށްވެސް ކުޅުނު ފޯވާޑް ކުޅުން ހުއްޓާލީ 38 އަހަރުގައެވެ.

ތެވޭޒް ވަނީ ސިޓީއާއި ޔުނައިޓެޑްގެ އިތުރުން ޕްރިމިއަރ ލީގުގެ ވެސްޓްހޭމްއަށްވެސް ކުޅެފައެވެ. ތެވޭޒް ކުޅުން ހުއްޓާލިކަން އިއުލާންކުރިއިރު ބޮކަ ޖޫނިއަރސްއަށް މިދިޔަ އަހަރުގެ ޖޫން މަހު ކުޅުނު ފަހުން މެޗެއް ނުކުޅެއެވެ. ތެވޭޒް ބުނީ 20 އަހަރުގެ ކެރިއަރު ނިންމާލީ އޭނާގެ މެކްސިމަމް ދިނުމަށްފަހުކަމަށެވެ. އެކަމަކު ހުއްޓާލުމުގެ ނިންމުން އައީ މިދިޔަ އަހަރު އޭނާގެ ބައްޕަ މަރުވެ, ލިބުނު ހިތާމަތަކާ ގުޅިގެންކަމަށް ތެވޭޒް ބުނެފައިވެއެވެ.

ތެވޭޒް ބުނީ އޭނާ ކުޅުން ހުއްޓާލީ ކުރިމަތީގައި ހުށަހެޅުންތަކެއް ހުއްޓާ ކަމަށެވެ. އޭގެތެރޭގައި އެމެރިކާގެ ހުށަހެޅުންތައްވެސް ހިމެނެއެވެ. މިދިޔަ އަހަރުވެސް ކުޅުން ހުރިއަށް ގެންދިއުންވީ އުނދަގޫ ކަމަކަށް ކަމަށްވެސް ތެވޭޒް ބުނެފައިވެއެވެ. ތެވޭޒްގެ ބައްޕަ މަރުވީ މިދިޔަ އަހަރުގެ ފެބުރުއަރީ މަހު ކޯވިޑް ޖެހިގެންނެވެ. ތެވޭޒް ވަނީ އިންގްލެންޑްގެ އިތުރުން އިޓަލީގެ ޔުވެންޓަސްއާއި, ބްރެޒިލްގެ ކޮރިންތިއަސްއަށްވެސް ކުޅެފައެވެ. އަދި ޗައިނާ ލީގުގައިވެސް އޭނާ ކުޅުނެވެ.

ޤައުމީ ޓީމާއެކު ހާޞިލްކުރެވުނު ބޮޑު ކާމިޔާބީއަކީ 2004 ވަނަ އަހަރު އޮލިމްޕިކް ރަން މެޑެއްޔެވެ. ޤައުމީ ޓީމަށް ތެވޭޒް 75 މެޗު ކުޅުނެވެ. މެންޗެސްޓަރ ޔުނައިޓެޑްއާއިއެކު ޕްރިމިއަރ ލީގު ދެފަހަރު އަދި ޗެމްޕިއަންސްލީގު އެއްފަހަރު ހޯދިއެވެ. ސިޓީގައިވެސް ޕްރިމިއަރ ލީގު އުފުލާލިއެވެ. ޕްރިމިއަރ ލީގުގައި ހޭދަކުރި ހަތް އަހަރުން 84 ގޯލް ޖެހިއެވެ.

ތެވޭޒް ކުޅުން ހުއްޓާލުމާ ގުޅިގެން އޭނާ ކުޅުނު ކްލަބްތަކުން ވަނީ އެކްލަބްތަކަަށް ކޮށްދިން ޚިދުމަތް ފާހަގަކޮށް, ކުރިމަގުގައި ކާމިޔާބީއަށް އެދިފައެވެ.