މިއަހަރުގެ ފަހުކޮޅު ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގައި ޔޫރަޕުގެ ޗެމްޕިއަން އިޓަލީ ނެތުމަކީ ލަދުގަންނަން ޖެހޭ ކަމެއް ކަމަށް އިޓަލީގެ ފުޓްބޯޅަ ލެޖެންޑު ރޮބާޓޯ ބާޖިއޯ ބުނެފިއެވެ.
އިޓަލީގެ ގައުމީ ޓީމަށް ކުޅުނު ފޯވާޑް ބާޖިއޯ ބުނީ އިޓަލީއަކީ ޔޫރަޕުގެ އެންމެ ފަހުގެ ޗެމްޕިއަނުން ކަމަށެވެ. އަދި ޔޫރަޕުގެ އެންމެ ފަހުގެ ޗެމްޕިއަނުން ވޯލްޑް ކަޕުގައި ނުކުޅެވުމަކީ ލަދުވެތި ކަމެއްގެ ގޮތުގައި އޭނާ ފާހަގަކުރިއެވެ. ބާޖިއޯ ބުނީ އޭނަ ގަބޫލުކުރާ ގޮތުގައި ޔޫރަޕުގެ އެންމެ ފަހުގެ ޗެމްޕިއަނުންގެ ހައިސިއްޔަތުން އިޓަލީއަށް މިފަހަރުގެ ވޯލްޑް ކަޕުގައި އޮޓަމެޓިކް ޖާގައެއް ދޭން ޖެހޭ ކަމަށެވެ.
މިދިޔަ އަހަރުތަކުގައި ބައިނަލްއަގުވާމީ ލެވަލްގައި އިޓަލީ ބަލިވެފައިވަނީ މަދު މެޗަކުންނެވެ. ބާޖިއޯ ބުނީ ކިތަންމެ މޮޅު ފުޓްބޯޅަ ޓީމެއް ވިޔަސް ދަށްކޮށް ދާ ދުވަހެއްގައި ބަލިވެދާނެ ކަމަށެވެ. އެ ގޮތުން އިޓަލީ އަށް ވެސް ދަށް ދުވަސް ދިމާވީ އެންމެ މުހިންމު ދަނޑިވަޅުތަކުގައި ކަމަށާއި ވޯލްޑް ކަޕަށް ކޮލިފައިނުވީ އެެ ސަބަބާ ހުރެ ކަމަށް ބުނެވިދާނެ ކަމަށް ބާޖިއޯ ވަނީ ބުނެފަ އެވެ.
އެންމެ ފަހުން 2018 ވަނަ އަހަރު ރަޝިޔާގައި ބޭއްވި ވޯލްޑް ކަޕަށްވެސް އިޓަލީ ކޮލިފައި ނުވެއެވެ. ނަމަވެސް އޭގެ ފަހުން މޮޅު ކުޅުމެއް ދައްކާ އެޓީމުން ޔޫރޯ 2020 ކާމިޔާބުކުރިއެވެ. މި ފަހަރުގެ ވޯލްޑް ކަޕް ކޮލިފައިންގ ގްރޫޕްގައި ސްވިޓްޒަލެންޑްގެ ފަހަތުން ދެ ވަނައިގައި ނިންމުމުން، އިޓަލީއަށް ޖެހުނީ ކޮލިފައިންގ ޕްލޭއޮފްގައި ކުޅޭށެވެ. ޕްލޭއޮފްގައި އިޓަލީ ބަލިވީ ނޯތު މެސެޑޯނިއާ އަތުންނެވެ. މި ބައްޔާއެކު އެޓީމަށް ވޯލްޑް ކަޕުގެ ޖާގަ ގެއްލުނީއެވެ.
ބާޖިއޯ ބުނީ އިޓަލީ ސްކޮޑުގައި އޭނާ ހުރި ނަމަ ޔޫރޯގެ ޗެމްޕިއަންކަން ހޯދާފައި ވޯލްޑް ކަޕަށް ކޮލިފައިނުވުން ހަޖަމްކުރަން އުނދަގޫވާނެ ކަމަށެވެ.
