އެސްޓީއޯ ޕީޕަލްސް ޗޮއިސްގެ ބައެއް ވިޔަފާރިތައް ކްރެޑިޓް ސްކީމްގެ ތެރެއަށް
މެކްސްކޮމް ޓެކްނޮލޮޖީ، ޕީކް-އަ-ބޫ، އަދި ޕޮއިސް ވަނީ އެސްޓީއޯ ކްރެޑިޓް ސްކީމާ ގުޅިފައި
އެސްޓީއޯ ކްރެޑިޓް ސްކީމް ފުޅާކުރުން
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ ކްރެޑިޓް ސްކީމާ ބައެއް އަމިއްލަ ވިޔަފާރިތައް ގުޅިއްޖެއެވެ.
އެސްޓީއޯގެ ކްރެޑިޓް ސްކީމާ ގުޅިފައިވަނީ އެސްޓީއޯ ޕީޕަލްސް ޗޮއިސްގައި ހިމެނޭ ބައެއް އަމިއްލަ ވިޔަފާރިތަކެވެ. މީގެ ތެރޭގައި މެކްސްކޮމް ޓެކްނޮލޮޖީއާއި ޕީކް-އަ-ބޫ އަދި ޕޮއިސްއެވެ.
މިކަމަށްޓަކައި ބުދަ ދުވަހު ބޭއްވި ރަސްމިއްޔާތުގައި އެސްޓީއޯ ޕީޕަލްސް ޗޮއިސްގެ ސޭލްސް މެނޭޖަރ އަބްދުﷲ ސައީދު ވިދާޅުވީ، އެސްޓީއޯ ޕީޕަލްސް ޗޮއިސްގެ ތެރޭގައި ހުރި ބައެއް އަމިއްލަ ވިޔަފާރިތަކުން ތަކެތި އިންސްޓޯލްމެންޓަށް ދޫކުރުމަށް ވަރަށް ގިނަ ކަސްޓަމަރުން އެދިފައިވާކަމަށެވެ. އެއާއެކު މިކަން ވާނެ ގޮތް ފަހިކޮށްދީފައިވާކަމަށާއި، ބުދަ ދުވަހުން ފެށިގެން އިންސްޓޯލްމެންޓަށް ތަކެތި ދޫކުރާނެ ކަމަށް ސައީދު ވިދާޅުވިއެވެ.
އެސްޓީއޯއިން ބުނީ ސަރުކާރު މުވައްޒަފުންނަށާއި، އެސްޓީއޯގެ ކްރެޑިޓަށް އެއްބަސްވެފައިވާ ކުންފުނިތައް މެދުވެރިކޮށް މި ކްރެޑިޓް ސްކީމުން މުދާ ނެގޭނެކަމަށެވެ. ވަޒީފާގައި އުޅޭތާ 6 މަސް ވެފައިވާނަމަ މި ސްކީމްގެ ތެރެއިން ކްރެޑިޓަށް މުދާ ނެގޭނެއެވެ. ތިން ދުވަސް ތެރޭގައި ކްރެޑިޓް ފޯމް އެޕްރޫވްވާނެއެވެ. އަދި އެޕްރޫވްވީހާ އަވަހަކަށް ފޯނަށް މެސެޖެއް ލިބޭނެކަމަށް އެސްޓީއޯއިން ބުނެއެވެ. އެސްޓީއޯ ޕީޕަލްސް ޗޮއިސްއަށް ގޮސްގެން ބޭނުންވާ މުދަލެއް ނެގޭނެއެވެ.
