ޕޯޗުގަލްގެ ސްޕޯޓިންގެ ލެފްޓް ބެކް ނޫނޯ މެންޑެސް ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވެއްޖެއެވެ.

އުމުރުން 19 އަހަރުގެ މެންޑެސް އޭނާގެ ސީނިއަރ ކެރިއަރު ފެށީ 2020 ވަނަ އަހަރު ސްޕޯޓިން އިންނެވެ. އޭނާ ވަނީ އެ ޓީމަށް 40 މެޗު ކުޅެދީފައެވެ. އޭގެ ފަހުން 2021 ވަނަ އަހަރު އޭނާ ވަނީ ލޯނު އެއްބަސްވުމެއްގެ ދަށުން ޕީއެސްޖީއަށް ކުޅެފައެވެ. ޕީއެސްޖީއަށް އޭނާ ވަނީ 37 މެޗު ކުޅެދީފައެވެ. މީގެ އިތުރުން އޭނާ ވަނީ ޕީއެސްޖީއާއެކު މި ސީޒަނުގެ ފްރާންސް ލީގު ކާމިޔާބުކޮށްފައެވެ. އޭނާ ވަނީ ފްރާންސް ލީގުގެ އެންމެ ޒުވާން ކުޅުންތެރިޔާގެ މަގާމަށް ވާދަކޮށްފައެވެ. އަދި ފްރާންސް ލީގުގެ އެންމެ މޮޅު ބެސްޓް ލެފްޓް ބެކްއަށް ހޮވުނީ އޭނާއެވެ.

އޭނާ ވަނީ އިއްޔެގެ ވަގުތެއްގައި ޕީއެސްޖީއާއެކު ދާއިމީ އެއްބަސްވުމެއްގައި ސޮއިކޮށްފައެވެ. އޭނާ ޕީއެސްޖީއަށް ބަދަލުވީ ހަތަރު އަހަރުގެ މުއްދަތަކަށެވެ. ޕީއެސްޖީއާއެކު އޭނާ ހެދި އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުއެވެ. އޭނާ ގެނައުމަށްޓަކައި ޕީއެސްޖީން ވަނީ ސްޕޯޓިންއަށް 40 މިލިއަން ޔޫރޯގެ ކްލޯސް ފީއެއް ދައްކާފައެވެ.

މެންޑެސް އަންނަނީ ޕޯޗުގަލްގެ ގައުމީ ޓީމަށް ވެސް ކުޅެމުންނެވެ. ގައުމީ ޓީމަށް 2021 ވަނަ އަހަރު ކުޅެން ފެށި މެންޑެސް ވަނީ ގައުމީ ޓީމާއެކު މިހާތަނަށް 13 މެޗު ކުޅެފައެވެ. ސީނިއަ ގައުމީ ޓީމަށް އެންމެ ފުރަތަމަ އޭނާ ކުޅެން ފެށީ 2021 ވަނަ އަހަރު އޮތް ޔޫރޯ މުބާރާތުގައެވެ.