ބަޓް ކޭމްޕުގެ ކާމިޔާބު ފްރަންޗައިޒް ފިލްމުތައް ކަމަށްވާ "އާޝިގީ2" ގައި ހިމެނޭ މަޤުބޫލު ލަވައެއްކަމަށްވާ "ކިއުންކި ތުމް ހީ ހޯ" އަށް ޓެންޒޭނިއާގެ ކިލީ ޕޯލްއާ އޭނާގެ އަންހެން ކޮއްކޮ "ލިޕް ސިންކް" ކޮށްފައިވާ ވީޑިއޯއަށް ގިނަ ބައެއްގެ ސަމާލުކަން ލިބެން ފަށައިފިއެވެ.

މަޝްހޫރު ފަންނާނު އަރްޖީތް ސިންގގެ އަޑުން ކިޔާފައިވާ މި ލަވައަކީ 2013 ގެ ހިޓް ފިލުމު އާޝިގީގެ ބަތަލާ ޝްރަދާ ކަޕޫރާއި، ބަތޮލު އަދިތިޔާ ރޯއީ ކުޅެފައިވާ ލަވައެކެވެ. ކިލީ ޕޯލްއާއި އޭނާގެ ކޮއްކޮ މި ލަވައަށް ލިޕް ސިންކް ކޮށްފައިވާއިރު، މައިގަނޑު ގޮތެއްގައި ލަވަކިއުމުގެ ބައި ކުރިއަށް ގެންގޮސްފައިވަނީ ކިލީއެވެ.

އަންގާރަ ދުވަހު ޕޯސްޓު ކޮށްފައިވާ މި ލަވައަށް މިހާރުވެސް 128،000ށް ވުރެ ގިނަ ވިއުސް ވަނީ ލިބިފައެވެ.

އެ ވީޑިއޯ ކިލީ އޭނާގެއިންސްޓަގްރާމްގައިވެސް ހިއްސާކޮށްފައިވާއިރު، ވަރަށް ގިނަ ބަޔަކު ގެންދަނީ އެ ދެބެއިންނަށް ތައުރީފް ކުރަމުންނެވެ. ވަކިން ޚާއްސަކޮށް އިންޑިއާއަށް ނިސްބަތްވާ މީހުންވެސް ދަނީ އެ ދެބެއިންގެ ހުނަރު ފާހަގަކޮށް، ބޮލީވުޑްގެ އިތުރު ލަވަތަކަށް ލިޕް ސިންކް ކުރުމަށް އެދެމުންނެވެ.

މިއީ ކިލީއާއި އޭނާގެ ކޮއްކޮގެ ވީޑިއޯތައް ވައިރަލްވި ފުރަތަމަ ފަހަރެއް ނޫނެވެ. މީގެ ކުރިންވެސް "ޝޭރްޝާހް" ފިލުމުގެ "ރާތޭ ލަންބިއާ" އަށް ލިޕް ސިންކްކޮށްފައިވާ ވީޑިއޯއެއްވެސް ވައިރަލްވެފައިވެއެވެ. އެ ލަވައިގެ އަސްލު ވީޑިއޯއިން ފެންނަ ސިދާތް މަލްހޯތްރާއާއި، ކިޔާރާ އަދްވާނީވެސް ވަނީ އެ ވީޑިއޯ ޝެއަރކޮށް ތައުރީފު ކޮށްފައެވެ.

އަދި ޝާހުރުކު ޚާން އާއި މާހިރާ ޚާން ގެ "ޔެ ޒާލިމާ" އަށް ލިޕް ސިންކް ކޮށްފައިވާ ލަވައަށްވެސް ގިނަ ބައެއްގެ ތައުރީފު އޮހިގެން ގޮސްފައިވެއެވެ.

ގިނަ ވީޑިއޯތަކުގައި ކިލީ ޕޯލްގެ ދެބެއިން ތިބެނީވެސް ޓެންޒޭނިއާގެ ސަގާފަތު ދައްކުވައިދޭ ހެދުމުގައެވެ.