ހުރިހާ ޕްލެޓްފޯމެއްގައިވެސް ޕުޝްޕާ ވައިބްސް

2021 ވަނަ އަހަރު އިންޑިޔާގައި ނިކުތް އެންމެ ކާމިޔާބު ފިލްމަކަށް ހަމަގައިމުވެސް ޕުޝްޕާ ވަނީ ވެގެންގޮސްފައެވެ. ފިލްމާ އެއްވަރަށް ފިލްމުގެ ލަވަތައްވެސް އެހާ މަޝްހޫރެވެ. ފިލްމުގެ ލަވަތަކާއި ފިލްމު މަޝްހޫރީ ހަމައެކަނި އިންޑިޔާއަކު ނޫނެވެ. މުޅި ދުނިޔޭގައިވެސް ފިލްމުގެ ލަވަތައް ހިޓެވެ.

ތެލުގޫ ތަރި އައްލޫ އަރްޖުން އާއި ރަޝްމިކާ މަންޑަންނާ ލީޑު ރޯލުން ފެންނަ މިފިލްމު ހިންދީ, ތެލުގޫ، ތަމިލް، މަލަޔާޅަމް އަދި ކަންނަޑާ ބަހުން ވަނީ ނެރެފައެވެ. އިންޑިޔާއަށް ކުރިމަތިވެފައިވާ ކޮވިޑް-19ގެ ހާލަތާއެކު ފިލްމު އިންޑިޔާގައި ހިނގަމުންދަނީ ހީވެސްނުކުރާ މިންވަރަކަށެވެ. ވަކިން ޚާއްސަކޮށް ފިލްމުގެ ހިންދީ ވަރޝަން އަށް ލިބޭ ތަރުޚީބު ފާހަގަކޮށްލަން ޖެހެއެވެ. ހިންދީ ބަހުން ވާހަކަދައްކާ މީހުންގެ މެދުގައި ފިލްމު ޕްރޮމޯޓްކުރުމަށް ފިލްމުގެ ހިންދީ ޓްރެއިލަރ ނެރުން ފިޔަވައި މާބޮޑު މަސައްކަތެއް ކޮށްފައެއްވެސް ނުވެއެވެ. ނަމަވެސް ފިލްމު މިހާރު ވަނީ ހިންދީ ސިނަމާތަކުން 100 ކްރޯޑާއި ކައިރިއަށް ޖެހިލާފައެވެ.

އައްލޫ އަރްޖުންގެ ކުޅަދާނަ ހުނަރު އެތައް ބަޔަކަށް ކަމުގޮސްފައިވާއިރު ފިލްމަށް ވަނީ މުޅި އިންޑިޔާގެ ސިނަމާތަކުން 400 ކްރޯޑް ލިބޭނެކަމަށް ބެލެވިފައެވެ. ޕުޝްޕާ އަންނަނީ އެމޭޒަން އިން ލައިވް ސްޓްރީމްވެސް ކުރަމުންނެވެ. މިއާއެކު ޕުޝްޕާ ވެފައިވަނީ އެ ޕްލެޓްފޯރމުންވެސް އެންމެ ގިނަ ބަޔަކު މިހާތަނަށް ބެލި އެއް ފިލްމަށެވެ.

ޕުޝްޕާ ފިލްމަށް ލިބެމުން އަންނަ ކާމިޔާބީގެ ފަހަތުގައި ފިލްމުގެ ލަވަތައް މުހިންމު ރޯލެއް އަދާކުރެއެވެ. ގިނަ ބަޔެއްގެ މެދުގައި މަގުބޫލު ޓިކްޓޮކަށް ބަލާލި ނަމަވެސް ފިލްމުން ގިނަ ބަޔަކަށް އެންމެ ބޮޑަށް ކަމުދިޔަ "ސްރިވައްލީ” އާއި "އޯ އަންތަވާ" އަށް އަންނަނީ އެކްޓްކުރަމުންނެވެ. ވަކިން ޚާއްސަކޮށް ސްރިވައްލީ ގައި އައްލު އަރްޖުންގެ ޚާއްސަ ސްޓެޕަށް ގިނަ ބަޔަކު އަންނަނީ ނަށަމުންނެވެ. އޭގެތެރޭގައި އެކި ހިސާބުތަކުން ގިނަ ބަޔެއްގެ މަގުބޫލުކަން ހޯދާފައިވާ ތަރިންވެސް ހިމެނެއެވެ.

ރާއްޖެއަށް ބަލާލި ނަމަވެސް ދިވެހިންވެސް އަންނަނީ ޓިކްޓޮކްގައި ސްރިވައްލީ އާއި އޯ އަންތަވާ އަށް އެމީހުންގެ ހަރަކާތްތައް ދައްކާލަމުންނެވެ. އަދި ބައެއް ލަވަ ކިޔުންތެރިން އަންނަނީ އެލަވަތައް ކިޔާ ޓިކްޓޮކަށް ލަމުންނެވެ.

ކޮންމެއަކަސް ޕުޝްޕާ މިވަނީ ހުރިހާ ޕްލެޓް ފޯމެއް ފަތަހަކޮށްފައެވެ.