އަދިވެސް އިތުރު ކުޅުންތެރިން ގެންނާނަން- މެންޗެސްޓަރ ސިޓީ
31 މެއި 2022 | އަންގާރަ 02:42ފެނަންޑީނިއޯގެ ބަދަލުގައި މިޑްފީލްޑަރެއް ސިޓީއަށް ބޭނުންވޭ
ސިޓީ ދޫކޮށްލާނެކަން ޔަޤީން ކުޅުންތެރިއަކީ ފެނާންޑީނިއޯ: ފޮޓޯ-މެންޗެސްޓަރ ސިޓީ
ކުރިއަށް އޮތް ސީޒަނަށް ޓީމް އިތުރަށް ވަރުގަދަ ކުރަން އަދިވެސް ކުޅުންތެރިން ގެންނާނެކަމުގެ ޔަޤީންކަން މެންޗެސްޓަރ ސިޓީގެ ޗެއަރމަން ހަލްދޫން އަލް މުބާރަކް ދެއްވައިފިއެވެ.
އިނގިރޭސި ޕްރިމިއަރ ލީގުގެ ޗެމްޕިއަން ސިޓީން މިހާރުވެސް ވަނީ ދެފޯވާޑުންގެ ސޮއި ހޯދާފައެވެ. އެއީ ބޮރޫޝިޔާ ޑޯޓްމަންޑަށް ކުޅެމުން އައި 21 އަހަރުގެ ހާލާންޑާއި, އާޖެންޓީނާގެ ޒުވާން ފޯވާޑް އަލްވާރޭޒްއެވެ. ނިމުނު ސީޒަންގެ ތެރެއިން އަލްވަރޭޒްގެ ސޮއި މެންޗެސްޓަރ ސިޓީން ހޯދިއެވެ. އެކަމަކު އޭނާ ޓީމާ ގުޅޭނީ ކުރިއަށް އޮތް ސީޒަނަށެވެ. ސްކޮޑް އިތުރަށް ވަރުގަދަ ކުރަން އަދިވެސް ކުޅުންތެރިން ހޯދުމުގެ މަސައްކަތް ކުރަމުންދާކަން ކްލަބްގެ ޗެއަރމަން ވަނީ ޔަޤީންކޮށްދީފައެވެ. އޭނާ ވިދާޅުވީ ކޮންމެ ސީޒަނަކަށްފަހުވެސް ޓީމުން ކުޅުނެތެރިން ދާނެކަމަށާއި, އަދި އާ ކުޅުންތެރިން ޓީމާ ގުޅޭނެކަމަށެވެ.
މިސީޒަނަށްފަހު ޓީމް ދޫކޮށްލާކަން ޔަޤީންވާ ކުޅުންތެރިއަކީ ކެޕްޓަން ފެނާންޑީނިއޯއެވެ. ހާލާންޑް އައުމާއެކު ޖެސޫސްވެސް ކްލަބްގައި މަޑުކުރާނެކަމާމެދު ޝައްކެވެ. އަދި މިޑްފީލްޑަރ ބާނާޑޯ ސިލްވާގެ ކުރިމަގުވެސް ޔަޤީނެއްނޫނެވެ. ސިޓީގެ ޗެއަރމަން ވިދާޅުވީ އަވަހަށް ކުޅުންތެރިން ހޯދުމުގެ ކަންކަން ނިންމަން މަސައްކަތް ކުރާކަމަށާއި, އެކަމަކު ސިޓީގެ އަތުގައި ކޮންޓްރޯލް ނެތްކަންކަން ހުންނަކަމަށެވެ.
ސިޓީން މަސައްކަތްކުރަނީ ފެނާންޑީނިއޯގެ ބަދަލުގައި ލީޑްސްގެ އިނގިރޭސި މިޑްފީލްޑަރ ކަލްވިން ފިލިޕްސް ހޯދުމަށެވެ. މީގެއިތުރުން ވައަތްފަޅިން ފަަހަތަށް ކުޅޭނެ ޑިފެންޑަރަކަށްވެސް ސިޓީން އަންނަނީ ބަލަމުންނެވެ.
