އެސްޓީއޯއިން ހިއްސާއަކަށް 65 ރުފިޔާ ބަހަން ފާސްކޮށްފި
މި ޖަލްސާގައި 782 ހިއްސާދާރުން ވަނީ ބައިވެރިވެފައި
އެސްޓީއޯގެ އަހަރީ އާންމު ޖަލްސާ
2021 ވަނަ އަހަރު އެސްޓީއޯއަށް ލިބުނު ފައިދާއިން ހިއްސާއަކަށް 65 ރުފިޔާ ބަހަން ފާސްކޮށްފިއެވެ.
ހިއްސާއަކަށް 65 ރުފިޔާ ބަހަން އެސްޓީއޯއިން ފާސްކޮށްފައިވަނީ ހޯމަ ދުވަހުގެ ރޭ ކްރޮސްރޯޑްސް މޯލްޑިވްސްގައި ކުރިއަށްދިޔަ އެކުންފުނީގެ އަހަރީ އާންމު ޖަލްސާއިންނެވެ. މިއީ އެކުންފުނީގެ ދިގު ތާރީޚުގައި މިހާތަނަށް ބަހާ އެންމެ ބޮޑު އަދަދެވެ. މިދިޔަ އަހަރު އެކުންފުނިން ބަހާފައިވަނީ ހިއްސާއަކަށް 60 ރުފިޔާއެވެ.
މި ޖަލްސާގައި ޖުމްލަ 782 ހިއްސާދާރުން ވަނީ ބައިވެރިވެފައެވެ. 157 ހިއްސާދާރަކު ޖަލްސާއަށް ހާޒިރުވެފައިވާއިރު، 686 ހިއްސާދާރުން ބައިވެރިވެފައިވަނީ ޕްރޮކްސީ މެދުވެރިކޮށެވެ.
މި ޖަލްސާގައި މުހިންމު ނިންމުންތަކެއް ނިންމާފައިވާއިރު އެކުންފުނި އޮޑިޓްކުރުމުގެ މަސައްކަތް ޕްރައިސް ވޯޓަރހައުސް ކޫޕަރސްއާ ހަވާލުކުރަން ވަނީ ނިންމާފައެވެ. އަދި ކުންފުނީގެ އާންމު ހިއްސާދާރުންގެ ފަރާތުން ޑިރެކްޓަރުންގެ ބޯޑަށް ހޮވާފައިވަނީ ވ. ޝެހެނާޒް މަންޒިލް، އަބްދުﷲ ސައީދެވެ.
މިދިޔަ އަހަރު އެސްޓީއޯ ގްރޫޕަށް 11 ބިލިއަން ރުފިޔާގެ ބޮޑު އާމްދަނީއެއް ވަނީ ލިބިފައެވެ. އަދި ޓެކުހަށް ކެނޑުމަށްފަހު ސާފު ފައިދާގެ ގޮތުގައި 487 މިލިއަން ރުފިޔާ ލިބިފައިވެއެވެ. މިއާއެކު 2021 ވަނަ އަހަރު ވެގެންގޮސްފައިވަނީ އެކުންފުނީގެ ތާރީޚުގައިވެސް މާލީގޮތުން އެންމެ ކާމިޔާބު އަހަރަށެވެ.
