ކޮންފަރެންސް ލީގާއެކު މޮރީނިއޯ ތާރީޚުގެ ތެރެއަށް

ރޯމާއަށް އިރުޝާދު ދިން ފުރަތަމަ ސީޒަންގައި އެ ޓީމާއެކު ކޮންފަރެންސް ލީގު ކާމިޔާބުކޮށް މޮރީނިއޯ ތާރީޚުން ޖާގަ ހޯދައިފިއެވެ.

މި މުބާރާތަކީ އަލަށް ތަޢާރަފުކުރި ޔޫރަޕްގެ ތިންވަނަ ފަންތީގެ ކްލަބް މުބާރާތެކެވެ. މުބާރާތުގެ ފައިނަލްގައި ރޭ ރޯމާ ވަނީ ފެޔަނޫޑާ ބަލިކޮށް ތަށި އުފުލާލާފައެވެ. އެއާއެކު މޮރީނިއޯ ވަނީ ތާރީޚުން ޖާގަ ހޯދާފައެވެ. އެއީ މި މުބާރާތް ކާމިޔާބުކުރި ފުރަތަމަ ކޯޗުގެ ޝަރަފާއި، ޔޫރަޕުގެ މުބާރާތެއް ތަފާތު ހަތަރު ކުލަބާކާއެކު ހޯދި ފުރަތަމަ ކޯޗުގެ ޝަރަފެވެ.

މީގެ ކުރިން 04-2003 ވަނަ ސީޒަނުގައި މޮރީނިއޯ ވަނީ ޕޯޓޯއާއެކު ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. އެ އަހަރުގެ ފައިނަލްގައި ޕޯޓޯއިން މޮކާނޯގެ މައްޗަށް ކުރި ހޯދީ 0-3 ގެ ންނެވެ. މީގެ އިތުރުން މޮރީނިއޯ ވަނީ 10-2009 ވަނަ ސީޒަނުގައި އިންޓަރ މިލާނާއެކު ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. އެ އަހަރުގެ ފައިނަލްގައި އިންޓަރ ވަނީ 0-2 ން ބަޔާން މިއުނިކްގެ މައްޗަށް ކުރި ހޯދާފައެވެ.

ތިން ވަނަ މުބާރާތަކީ 17-2016 ވަނަ ސީޒަނުގެ ޔޫރޮޕާ ލީގެވެ. އެއަހަރު ޔޫރޮޕާ ލީގުގެ ފައިނަލްގައި މެންޗެސްޓަރ ޔުނައިޓެޑް ވަނީ އަޔެކްސް ބަލިކޮށް ތަށި އުފުލާލާފައެވެ. އޭރު ޔުނައިޓެޑްގެ ކޯޗަކަށް ހުރީ މޮރީނިއޯއެވެ. ހަތަރު ވަނަ މުބާރާތަކީ ކޮންފަރެންސް ލީގެވެ.

ބެންފީކާއިން 2000 ވަނަ އަހަރު ކޯޗިން ކެރިއަރު ފެށި މޮރީނިއޯ ވަނީ ޔޫރަޕުގެ ބޮޑެތި ޓީމުތަކަށް ކޯޗުކަން ކޮށްދީފައެވެ. އަދި އެ ޓީމު ތަކާއެކު އޭނާ ވަނީ ބޮޑެތި ކާމިޔާބީ ވެސް ހޯދާފައެވެ. މޮއީނިއޯ ކޯޗުކަން ކޮށްދިން ޓީމުތަކުގެ ތެރޭގައި ޕޯޓޯ، ޗެލްސީ، އިންޓަރ މިލާން، ރެއާލް މެޑްރިޑް، މެންޗެސްޓަރ ޔުނައިޓެޑް އަދި ޓޮޓެންހަމް ހިމެނެއެވެ.