އިންޑިއާއިން ގޮދަން ފުށުގެ އެކްސްޕޯޓް މަނާކޮށްފަ އޮތް އޮތުން އަވަހަށް އުވާނުލާނެ ކަމަށް އެގައުމުގެ ކޮމާސް މިނިސްޓަރ ޕިޔުޝް ގޮޔަލް ވިދާޅުވެއްޖެއެވެ.
މިނިސްޓަރު ގޮޔަލް މިހެން ވިދާޅުވެފައި ވަނީ ރޮއިޓަރސް އަށް ދެއްވި އިންޓަވިއުއެއްގައެވެ.
އެގޮތުން ގޮދަން ފުށް އެކްސްޕޯޓްކުރުމަށް އެގައުމުން އިއުލާންކޮށްފައިވާ އެމްބާގޯ ނުވަތަ މަނާކުރުމުގެ އަމުރު އުވާނުލާނެ ކަމަށާއި އެހެން ނަމަވެސް ސަރުކާރުން އެހެން ގައުމުތަކުގެ ސަރުކާރުތަކާއެކު މަޝްވަރާކޮށް ގޮދަށް ފުށް ގައުމުތަކަށް ފޯރުކޮށްދިނުމުގެ މަސައްކަތްކުރާނެ ކަމަށް ގޮޔަލް ވިދާޅުވިއެވެ.
ދުނިޔޭގައި ދެވަނައަށް އެންމެ ގިނަ އަދަދަކަށް ގޮދަންފުށް އެކްސްޕޯޓްކުރާ ގައުމު، އިންޑިއާއިން ގޮދަން ފުށް އެކްސްޕޯޓްކުރުން މަނާކޮށްފައި ވަނީ މެއި 14 ވަނަ ދުވަހުއެވެ. އެއީ އެގައުމަށް އައި ހީޓް ވޭވް އަކާއެކު ސަޕްލައިއަށް ކުރި އަސަރާއެކު ގައުމުގެ އެތެރޭގައި ގޮދަން ފުށުގެ އަގު ވަރަށް ބޮޑަށް އުފުލުމާ ގުޅިގެންނެވެ. އިންޑިއާގެ މި ނިންމުމާއެކު ދުނިޔޭގެ ބާޒާރުގައި ގޮދަން ފުށުގެ އަގު ވަރަށް ބޮޑަށް އުފުލިގެންދިޔައެވެ.
ރޮއިޓަރސް އަށް ދެއްވި އިންޓަވިއުގައި ގޮޔަލް ވަނީ މިވަގުތު އިންޑިއާއިން ބޭން އުވާލައި، އެކްސްޕޯޓް އަލުން ފަށައިފިނަމަ އޭގެ ނަތީޖާ އެންމެ ރަނގަޅު ނުވާނެ ކަމަށް ވިދާޅުވެފައެވެ. އެގޮތުން މިހާރު ދުނިޔޭގެ ބާޒާރު އޮތީ އެކަމަށް އެންމެ ރަނގަޅަށް ތައްޔާރުވެފައި ނޫންކަމަށާއި އެކްސްޕޯޓް އަލުން ފެށުމުން އެއްބަޔަކު މާ ގިނައިން ގަނެ އެންމެ ބޭނުންވާ ގައުމުތަކަށް ގޮދަން ފުށް ބޭނުންވާ ގައުމުތަކަށް އެ ނުލިބުމުގެ ފުރުސަތު ބޮޑުކަމަށް އޭނާ ފާހަގަކުރެއްވިއެވެ.
އެހެންކަމުން މިވަގުތަށް އެންމެ ފައިދާ ވާނީ ސަރުކާރުތައް މެދުވެރުކޮށް ގައުމުތަކަށް ގޮދަން ފުށް ފޯރުކޮށްދިނުން ކަމަށް ގޮޔަލް ވިދާޅުވިއެވެ.
ޖީ7ގެ ގައުމުތައް ހިމެނޭހެން ގިނަ ގައުމުތަކަކުން ވަނީ އިންޑިއާއިން އިއުލާނުކޮށްފައިވާ ބޭން އުވާލުމާމެދު ވިސްނުމަށް އެގައުމުގައި އެދިފައެވެ. އިންޑިއާގެ މި ނިންމުމާ ގުޅިގެން އެމެރިކާއިން ވެސް ވަނީ ކަންބޮޑުވުން ފާޅުކޮށްފައެވެ.
ގޮޔަލް ވަނީ އިންޑިއާގެ ނިންމުމާ ގުޅޭ މައުލޫމާތު ވޯލްޑް ޓްރޭޑް އޯގަނައިޒޭޝަން އަދި އިންޓަނޭޝަނަލް މަނިޓަރީ ފަންޑް އާ ހިއްސާކޮށްފައިވަނެ ކަމަށް ވިދާޅުވެފައެވެ.
