"ކުޅިވަރު ކުޅޭނަމަ ނުކިޔެވޭނެ" މިއީ ރާއްޖޭގައި ވަރަށް ގިނައިން އަޑުއިވޭ ވާހަކައެކެވެ.މިއީ ކުޅިވަރުގައި ރާއްޖޭގެ ޒުވާން އެތުލީޓުންނަށް ކުރިމަތިވެފައިވާ އެންމެ ބޮޑު އެއް ހުރަހެވެ. ބެލެނިވެރިންގެ އިތުރުން މުޅި މުޖުތަމައަށްވެސް ދެކެވިފައި އޮންނަނީ ކުޅިވަރުކުޅުމަކީ ދަރިވަރުންގެ ކިޔެވުމަށް އެޅޭ ވަރަށް ބޮޑު ހުރަހެއްގެ ގޮތުގައެވެ.
ނަމަވެސް މިއަދު ހަގީގަތް މިވަނީ ބަދަލުވެފައެވެ. ކިޔެވުމާ އެއްވަރަށް ކުޅިވަރަށް ވަގުތު ދީގެން، ދެދާއިރާގައިވެސް ކުރިއެރުން ހޯދޭނެކަން ދަރިވަރުން އަންނަނީ ސާބިތުކޮށްދެމުންނެވެ. މިހާރު ކުރިއަށްދާ 23 ވަނަ އިންޓަރ ސްކޫލް އެތުލެޓިކްސް މުބާރާތުގައި 100 މީޓަރު ދުވުމުގެ ރެކޯޑު މުގުރާލި، ގދ. ތިނަދޫ ނާހިލް ނަޒީރަކީ މީގެ މިސާލެކެވެ.
ނާހިލް ވަނީ 100 މީޓަރު ދުވުމުގައި އެއްވަނަ ހޯދުމުގެ އިތުރުން މުބާރާތުގައި ރެކޯޑު ހަދާފައެވެ. މީގެ ކުރިން މި ރެކޯޑު އޮންނަނީވެސް ގދ. އަތޮޅު ތައުލީމީ މަރުކަޒުގެ އިސްދަރިވަރެއް ކަމުގައިވާ ރާފިލް ވާފިރު އަތުގައެވެ. ރާފިލް ވަނީ 11.7 ސިކުންތުން ރޭސް ނިންމައި މުބާރާތުގައި ރެކޯޑު ހަދާފައެވެ. ނަމަވެސް ނާހިލް މި ރެކޯޑު މުގުރާލީ 11.2 ސިކުންތުން ރޭސް ނިންމައިގެންނެވެ. ނާހިލް ވަނީ މިހާރު ކުރިއަށްދާ މުބާރާތުގައި ގދ. އަތޮޅު ތައުލީމީ މަރުކަޒަށް 4*200 މީޓަރު ރިލޭގެ އޭނާ ދުވި ހީޓުންވެސް އެއްވަނަ ހޯދައިދީފައެވެ.
ވަރަށް ހެޕީވޭ އަސްލު. ވަރަށް ބޮޑު އިމްޕްރޫވްމެންޓެއް ހޯދިއްޖެ. ކުޑައިރުއްސުރެ ވަރަށް ބޭނުންވި 100 އާ ލޯންގް ޖަމްޕްގެ ރެކޯޑު މުގުރާލަން.ނާހިލް ނަޒީރު
ތިނަދޫގެ އެކަޑަމީން ތަމްރީނު ހާސިލުކުރަމުން އަންނަ ނާހިލް ބުނީ އޭނާ ބޭނުންވާފަދަ ކާމިޔާބީއަކާއި ހިސާބަށް ވާސިލްވެވުނީ އަދި ކިރިޔާ ކަމަށެވެ. ތަމްރީނު ހޯދަމުން އަންނަތާ ހަތަރު އަހަރު ވީއިރު، ނާހިލްއަކީ ރާއްޖޭގެ ގައުމީ އެތުލެޓިކްސް ޓީމުގެ މެމްބަރެކެވެ.
ގައުމީ ޓީމުގައި ދެއަހަރު ދުވަސް ހޭދަވީއިރު ނާހިލް ބުނީ، ކިޔެވުމާއި ކުޅިވަރުން ކުރިއަށް ދިއުމަށް އޭނާ ސަމާލުކަންދޭ ކަމަށެވެ. ދެކަމަށް ވަގުތު ހުސްކޮށްގެން މަސައްކަތް ކުރަމުން އަންނައިރު، ސްކޫލުގެ ފަރާތުންވެސް އޭނާއަށް ވަރަށް ބޮޑު ހިތްވަރެއް ލިބޭކަން ނާހިލް ފާހަގަކުރިއެވެ.
2016 ވަނަ އަހަރު ގދ. އަތޮޅު ތައުލީމީ މަރުކަޒުގައި އޮތް އިންޓަރ ހައުސް މުބާރާތުން އެތުލެޓިކްސްގެ ތެރެއަށް ވަތް ނާއިލްއަށް އެންމެ ބޮޑު ހިތްވަރެއް ލިބެނީ އާއިލާގެ ފަރާތުންނާއި ކޯޗު ރައުހަތު ގުދުރަތުﷲގެ ފަރާތުންނެވެ.
އެންމެ ބޮޑު އެހީތެރިކަމެއް ލިބުނީ ކޯޗު ރައުހަތުގެ ފަރާތުން. ދެން އެންމެ ބޮޑު ސަޕޯޓެއް ލިބެނީ އަޅުގަނޑުގެ މަންމައާ ދައްތަގެ ފަރާތުން. މަންމަގެ ސަޕޯޓުން އަޅުގަނޑަށް މިހާ ހިސާބަށް މި އާދެވުނީނާހިލް ނަޒީރު
ކޯޗު ރައުހަތު ބުނީ ނާހިލްއަކީ އުޖާލާ މުސްތަގުބަލެއް އޮތް އެތުލީޓެއް ކަމަށެވެ. އަދި އޭނާއަށް ކުރިއަރައިގެން ދެވުނު އެންމެ ބޮޑު އަސްލަކީ މިކަމަށް ހުންނަ ޝައުގުވެރިކަމާއި، އަޚްލާގުކަން ކޯޗު ފާހަގަކުރިއެވެ.
އުމުރުން 10 އަހަރުން ފެށިގެންވެސް އޭނަ ނުހުއްޓާ ޕްރެކްޓިސް ކުރިއަށް ގެންދިޔަ. މިއީ އަސްލު ނުހުއްޓާ ޓްރެއިނިން ކުރިއަށް ގެންދިއުމުގެ ނަތީޖާ.ނާހިލްގެ ކޯޗު ރައުހަތު ގުދުރަތުﷲ
ކޯޗުގެ އިރުޝާދާއެކު އާއިލާގެ ފަރާތުން ނާހިލްއަށް ލިބޭ ސަޕޯޓަކީ އޭނާއަށް މިހާހިސާބަށް އާދެވުމުގެ ސިއްރެވެ. ނާހިލްގެ އަމާޒަކީ މުބާރާތުގައި ކުރިއަށް އޮތް ލޯންގް ޖަމްޕް އިވެންޓުގެ ރެކޯޑުވެސް ހެދުމެވެ. ނާހިލް ކުރާ މަސައްކަތަށް ބަލާފައި މިއީ ނުވާވަރުގެ ކަމެއް ނޫނެވެ. ނާހިލްގެ އަމާޒަށް ވާސިލްވެވޭނެކަމުގެ އިތުބާރު އޭނާގެ ކޯޗުގެވެސް އެބައޮތެވެ.
