ޗެމްޕިއަންސްލީގު ފައިނަލްގައި ބޭލްއާއި ހަޒާޑްއަށްވެސް ކުޅެވޭނެ!
25 މެއި 2022 | ބުދަ 09:47ބޭލްއާއި ހަޒާޑްވެސް ޕްރެކްޓިސްގައި ބައިވެރިވޭ
ބޭލް އަހަރުގެ ކުރީކޮޅު ރެއާލްގެ ޕްރެކްޓިސްގައި: ފޮޓޯ-ބޭލް ޓްވިޓަރ
ލިވަޕޫލާ ދެކޮޅަށް ކުޅޭ ޗެމްޕިއަންސްލީގު ފައިނަލް މެޗަށް ނެގި ސްކޮޑްގައި ގެރެތް ބޭލްއައި އެޑިން ހަޒާޑްވެސް ހިނަމައިފިއެވެ. ރެެއާލް މެޑްރިޑްގެ ކޯޗު ކާލޯ އެންޗެލޮޓީ ބުނީ އެދެކުޅުންތެރިންވެސް ފިޓްވެ, ޕްރެކްޓިސްގައި ބައިވެރިވަމުން އަންނަކަށާއި, މެޗުގައި ދެ ކުޅުންތެރިންނަށްވެސް ކުޅެވޭނެކަމަށެވެ.
މީގެތެރެއިން ބޭލްއަށް އެމެޗު ވާނީ ރެއާލްގައި ކުޅެން ލިބޭ ފަހު މެޗަށެވެ. އެކަމަކު މެޗުން ބޭލްއަށް ފުރުޞަތު ދޭނެކަން ޔަޤީނެއް ނޫނެވެ. ރެއާލްއާއެކު ހަތަރު ޗެމްޕިއަންސްލީގު ހޯދާފައިވާ ބޭލްއަށް މިފަހަރު ތަށި ލިބިއްޖެނަމަ ރޮނަލްޑޯ ހޯދި ޗެމްޕިއަންސްލީގު ތަށީގެ އަދަދާ އެއްވަރު ވާނެެއެވެ. ރޮނަލްޑޯ ވަނީ ފަސް ފަހަރު އެތަށި އުފުލާލާފައެވެ. 32 އަހަރުގެ ބޭލް ރެއާލްގައި މީގެކުރިން ޗެމްޕިއަންސްލީގު އުފުލާލީ މުހިއްމު ދައުރެއް އަދާކޮށް, މުހިއްމު ލަނޑުތައްވެސް ޖަހައިގެންނެވެ. އެކަމަކު މިފަހަރު ފައިނަލާ ހަމައަށް ރެއާލް ދަތުރުކުރުމުގައިވެސް ބޭލްގެ ދައުރެއް ނެތެވެ.
ޗެލްސީން ރެއާލްއަށް ބަދަލުވެ އަނިޔާގެ ސަބަބުން ހަޒާޑްއަށް ރެއާލްގައި މުހިއްމު ދައުރެއް އަދައެއް ނުކުރެވެއެވެ. އެކަމަކު އޭނާ އަދި ކްލަބްގައި މަޑުކުރާނެއެވެ. ޗެމްޕިއަންސްލީގު ފައިނަލްގައި ބޭނުންކުރާނެކަންވެސް ޔަޤީނެއް ނޫނެވެ. ކޯޗު އެންޗެލޮޓީ ވަނީ ޗެމްޕިއަންސްލީގު ފައިނަލް ކުރިއަށް އޮއްވާ ބޭލްއަށް ވަރަށްބޮޑަށް ތައުރީފް ކޮށްފައެވެ. މީގެކުރިން ބޭލް ރެއާލްގައި އަދާކުރި މުހިއްމު ދައުރު ފާހަގަކުރިއެވެ. މިސީޒަންގައި އަނިޔާގެ މައްސަލަތައް ދިމާވި ނަމަވެސް އިތުރު ޗެމްޕިއަންސްލީގެއް ބޭލްއާއެކު ރެއާލް ހޯދާނެކަމަށް އެންޗެލޮޓީ އުއްމީދުކުރެއެވެ.
ބޭލްއާއި ހަޒާޑް ފިޓްވިނަމަވެސް އެކުޅުންތެރިންނަށް އޮތް އެންމެ ބޮޑު ގޮންޖެހުމަކަށްވާނީ ރެއާލްގެ ޒުވާން ކުޅުންތެރިންނެވެ. ޗެމްޕިއަންސްލީގު ފައިނަލަސް ރެއާލް ގެންގޮސްދިނުމުގައިވެސް މުހިއްމު ދައުރެއް އަދާކުރި ޒުވާން ކުޅުންތެރިންނެވެ. އޭގެތެރޭގައި ވިނީޝިއުސް ޖޫނިއަރ, ރޮޑްރީގޯ, ކަމަވިންގާ ފަދަ ކުޅުންތެރިން ހިމެނެއެވެ.
ޗެމްޕިއަންސްލީގު ފައިނަލްގައި ލިވަޕޫލާ ދެކޮޅަށް ރެއާލް މެޑްރިޑް ނިކުނާނީ މިމަހުގެ 28 ވަނަ ދުވަހުގެ ރެއެވެ.
