އައިސިސް ޖަމާއަތް ނުވަތަ (އައި.އެސް.އައި.އެސް) އިން އެމެރިކާގެ ކުރީގެ ރައީސް ޖޯޖް ޑަބްލިއު ބުޝް އަވަހަރާކޮށްލަން އުޅޭކަމަށް ރިޕޯޓުކޮށްފިއެވެ.

އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ ރިޕޯޓަކާ ހަވާލާދީ ފޯބްސް އިން ރިޕޯޓުކޮށްފައިވާގޮތުގައި އައިސިސް އާއި ގުޅުން އޮންނަ ކަމަށް ތުހުމަތުކުރެވޭ މީހަކު ވަނީ އެމެރިކާގައި ކުރީގެ ރައީސް ބުޝް އަވަހާރަކޮށްލުމަށް މަސައްކަތްކޮށްފައެވެ. އެގޮތުން އޭނާ ވަނީ މެކްސިކޯ މަގުން އޭނާއާ ބައިވެރިވުމަށް އިތުރު މީހުން އެމެރިކާއަށް އެތެރެކުރުމަށް މަސައްކަތްކޮށްފައެވެ. އަދި މިދިޔަ ނޮވެމްބަރު މަހު އޭނާ ވަނީ ޑަލަސް އަށް ގޮސް ބުޝް ދިިރިއުޅުއްވާ ގެކޮޅު ހިމެނެހޭން އެސަރަހައްދުގެ ވީޑިއޯވެސް ކޮށްފައެވެ.

އެފްބީއައިއިން ފާހަގަކުރާ ގޮތުގައި މިކަމުގެ މައުލޫމާތުތައް އެއިދާރާއަށް ލިބިފައިވަނީ މިކަންތައް ގާތުން ބަލަމުންދިޔަ ދެ އިންފޯމަންޓުންގެ ފަރާތުންނެވެ. މީގެ އިތުރުން ބުޝް އަވަހާރަކޮށްލުމަށް މަސައްކަތްކުރާ މީހާގެ ވަޓްސްއެޕް އެކައުންޓުން އެކަމާ ގުޅޭ މެސެޖުތަކެއްވެސް ފެނިފައިވާކަމަށްވެއެވެ.

ބުޝް އަވަހާރަކޮށްލުމަށް މަސައްކަތްކުރާކަމަށް ތުހުމަތުކުރެވޭ މީހާ، އޭނާ ބުޝް އަވަހާރަކޮށްލަން ބޭނުންވަނީ އިރާގުގެ އެތައް ބަޔަކު މަރާލިކަމުގެ ޒިންމާ ބުޝް ނަންގަވަންޖެހޭކަމަށް އޭނާ ގަބޫލުކުރާތީ ކަމަށް ބުނެފައިވާކަމަށް ފޯބްސް އިން ރިޕޯޓުކޮށްފައިވެއެވެ. ފޯބްސް އިން ރިޕޯޓުކޮށްފައިވާ ގޮތުން 2020 ވަނަ އަހަރުން ފެށިގެން އޭނާ ދަނީ އެމެރިކާގައި ދިރިއުޅެމުންނެވެ.

މިފަހުން ޔޫކްރެއިން ރަޝިއާ ހަނގުރާމައާ ގުޅިގެން ވާހަކަދައްކަވަމުން ބުޝް އަށް އަނގައޮޅިވަޑައިގެން ޔޫކްރެއިންގެ ބަދަލުގައި އިރާގުގައި ހިންގާ ކަންކަމީ އަނިޔާވެރި އަދި ބަލައިގަނެވޭނެ ކަންކަން ނޫން ކަމަށް ވިދާޅުވެވުމުން އެކަން އެމެރިކާގެ ރައްޔިތުންނަށް މަޖާކަމަކަށް ވެގެން ދިޔަ ނަމަވެސް އެކަން އިރާގުގެ ރައްޔިތުންނަށް މަޖާކަމަކަށް ނުވިއެވެ. އިރާގުގެ ރައްޔިތުން ވަނީ 2003 ވަނަ އަހަރު އެމެރިކާއިން އެގައުމަށް އަރާ ހިންގި އަމަލުތައް އަދިވެސް ހަދާނުން ފިލައިގެން ނުދާކަމަށް ބުނެފައެވެ.