ރަޝިއާ އިން އެމެރިކާގެ ރިޔާސީ އިންތިޚާބަށް ނުފޫޒް ފޯރުވި ކަމަށްބުނާ މައްސަލަ ތަހުގީގު ކުރުމަށް އެކުލަވާލި ޚާއްސަ ކައުންސިލްގެ މަސައްކަތްތައް ބެލެހެއްޓުމުގެ އިސްވެރިއަކަށް ކުރީގެ އެފްބީއައިގެ ވެރިއަކު ހަމަޖައްސައިފިއެވެ.
އެމެރިކާގެ ޖަސްޓިސް ޑިޕާޓްމަންޓުން ރަޝިއާގެ މައްސަލަ ބަލާ ކައުންސިލުގެ އިސްވެރިއަކަށް ހަމަޖައްސާފައިވަނީ އެފްބީއައިގެ ކުރީގެ ވެރިއެއް ކަމަށްވާ ރޮބަޓް މުލަރ އެވެ.
މުލަރ އެމަޤާމަށް އައްޔަންކުރުމާއި ބެހޭ ގޮތުން ޑެޕިއުޓީ އެޓާނީ ޖެނެރަލް ރޮޑް ރޮރެސްޓެއިން ވިދާޅުވީ އެ އެގޮތަށް އާންމު މަސްލަހަތަށް ބަލާފައި ކަމަށެވެ. އެއީ ސަރުކާރަށް ނުފޫޒް ފޯރުވޭ މަޤާމެއްގައި ހުރި ފަރާތަކަށްވުރެ، ދައުލަތުގެ މަޤާމެއްގައި ނެތް ފަރާތެއް ހަމަޖެއްސުން ރަނގަޅުވުމުން ކަމަށްވެސް ރޮރެސެސްޓަރ ވިދާޅުވިއެވެ.
މިނިންމުމާއި ގުޅިގެން ސަރުކާރާއި އަދި އިދިކޮޅު ސިޔާސީ ބޭފުޅުންވަނީ މަރުހަބާ ކިޔާފައެވެ.
އެމެރިކާގެ ރިޔާސީ އިންތިޚާބުގެ ދުވަސްވަރު މިހާރުގެ ރައީސް ޑޮނަލްޑް ޓްރަމްޕްގެ ފައިދާވާ ގޮތަށް ރަޝިއާ އިން ކެންޕޭނަށް ނުފޫޒްފޯރުވި ކަމަށް ތުހުމަތުކުރާ މައްސަލަ ތަހުގީގުކުރާ ކައުންސިލަށް މުލަރ ހަމަޖެއްސީ، އެމައްސަލައިގެ ތަހުގީގަށް ހުރަސް އެޅުއްވުމުގެ ގޮތުން އެފްބީއައިގެ ވެރިޔާ ޖޭމްސް ކޮމޭ މަޤާމުން ވަކިކުރެއްވި ކަމުގެ ތުހުމަތުތަކާއި ގުޅިގެންނެވެ.
މިމައްސަލައިގެ ތަހުގީގު ކުރިއަށްދާއިރު، އިންތިޚާބުގެ ދުވަސްވަރު ޓްރަމްޕްގެ ކެމްޕޭން ޓީމާއި ރަޝިއާއާ ދެމެދު އެއްވެސް ވަރެއްގެ ގުޅުމެއް އޮތް އިދިކޮޅު ޑިމޮކްރޭޓުންނާއި އެމެރިކާގެ އެފްބީއައި އިން އަންނަނީ މަސައްކަތް ކުރަމުންނެވެ.
އަނެއްކޮޅުން އެމެރިކާގެ ޖާސޫސީ އިދާރާތަކުން ޤަބޫލުކުރާ ގޮތުގައި އިންތިޚާބުގެ ދުވަސްވަރު، މިހާރު ވެރިކަންކުރާ ރިޕަބްލިކަން ޕާޓީއަށް ފައިދާވާ ގޮތަށް އިންތިޚާބުގެ ކެމްޕޭނަށް ރަޝިއާ އިން ވަނީ ނުފީޒް ފޯރުވާފައެވެ.
ރަޝިއާގެ މައްސަލަ ބަލަ ކައުންސިލުގެ އިސްވެރިއަކަށް މުލަރ ހަމަޖެއްސިތާއި ގަޑިއެއްހާއިރުގެ ތެރޭގައި، ޓްރަމްޕް ވަނީ އަލަށް މިހިންގޭ ތަހުގީގަށްފަހު ކެމްޕޭން ޓީމާއި ޓްރަމްޕްއަކީ ސާފުބަޔަކަށް ވެގެންދާނެ ކަމަށް ލަފާކުރައްވާފައެވެ.
ދައުލަތުގެ މަޤާމެއްގައި ފުރުއްވަމުން ނުގެންދަވާ ބޭފުޅަކު މި ތަހުގީގު އެންމެ އިސްވެރިޔާގެ ގޮތުގައި އައްޔަންކުރެއްވި ނަމަވެސް މީގެކުރިން ވައިޓްހައުން އިން ބުނެފައިވަނީ ބޭރުން އެއްވެސް ފަރާތެއް މި ތަހުގީގުގައި އިސްކޮށް މަސައްކަތް ކުރުމުގެ ބޭނުމެއް ނެތް ކަމަށެވެ.
"މި ތަގުގީގުގައި ކަށްވަރުވެގެންދާނެ އަޅުގަނޑުގެ ކެމްޕޭނާއި އެހެން ގައުމެއްގެ އެއްވެސް ފަރާތަކާއި ގުޅުމެއް ނެތްކަން" ޓްރަމްޕް ވިދާޅުވިއެވެ.
އެމެރިކާގެ ސެނެޓުގައި ހިމެނިވަޑައިގަންނަވާ ޑިމޮކްރެޓިކް ޕާޓީގެ އިސްބޭފުޅެއް ކަމަށްވާ ޗަކް ޝޫމާ ވިދާޅުވީ މި ތަގުގީގު ހިންގުމަށް މުލަރއަކީ އެންމެ ރަނގަޅު އެއް ފަރާތް ކަމަށެވެ.
ސެނެޓުގެ ސަރުކާރުގެ މައްސޫލިއްޔަތު އަދާކުރާ މިންވަރު ބަލާ ކޮމިޓީގެ ޗެއާމަން ޖޭސަން ޗަފެޓްޒް ވިދާޅުވީ މުލަރ އަކީ އެފަދަ ކަމެއްގައި ތަހުގީގު ކުރުމުގައި އިތުރުބަރު ކުރެވޭ ފަރާތެއް ކަމަށެވެ.
މި ތަހުގީގު ހިނގަމުންދާއިރު، ކުރީގެ ނޭޝަނަލް ސެކިއުރިޓީ އެޑްވައިޒަރު މައިކަލް ފްލައިން އާއި ރަޝިޔާއާ އޮތް ގުޅުމާ ބެހޭ ގޮތުން ކުރަމުންދިޔަ ތަހުގީގު ހުއްޓާލުމަށް އެފްބީއައިގެ ޑިރެކްޓަރު ޖޭމްސް ކޯމޭގެ އަރިހުން ރައީސް ޑޮނަލްޑް ޓްރަމްޕް އެދިވަޑައިގެންނެވިކަންވަނީ ފަޅާއަރާފައެވެ.
