އެމްބާޕޭ ވާހަކަދެއްކީ ހަމައެކަނި ރެއާލްއަކާ ނޫން، ލިވަޕޫލާ ވެސް ވާހަކަ ދެއްކި

ކުރިމަގާމެދު ގޮތެއް ނިންމުމަށް ވާހަކަ ދެއްކީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އާއި ސްޕެއިންގެ ރެއާލް މެޑްރިޑާ އެކަނި ނޫން ކަމަށް ކީލިއަން އެމްބާޕޭ ބުނެފިއެވެ.

މިސީޒަނުގެ ނިޔަލަށް ޕީއެސްޖީއާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނެއެވެ. އެއާއެކު އޭނާ އެ ޓީމު ދޫކޮށް ރެއާލަށް ބަދަލުވާނެކަމަށް އޮތީ ބެލެވިފައެވެ. އަދި އެކަމާ ގުޅޭ މަޝްވަރާތައް ވެސް އޭނާއާއި ރެއާލާ ދެމެދު ކުރެވުނެވެ. ނަމަވެސް އެންމެ ފަހު ވަގުތު އޭނާ ނިންމީ ޕީއެސްޖީގައި މަޑު ކުރުމަށެވެ. އެކަމާ ގުޅިގެން އެމްބާޕޭ އޭނާ ވާހަކަ ދެއްކީ ޕީއެސްޖީ އަދި ރެއާލާ އެކަނި ނޫންކަމަށެވެ. ބުނީ ޔާގަން ކްލޮޕާއެކު ލިވަޕޫލަށް ގުޅުމަށް ވެސް އޭނާ ވާހަކަ ދެއްކި ކަމަށެވެ.

އިތުރަށް އޭނާ ބުނީ ލިވަޕޫލާ ވާހަކަ ދެއްކީ އެއީ އޭނާގެ މަންމައަށް އެންމެ ކަމުދާ ޓީމު ކަމަށް ވާތީ ކަމަށެވެ. އަދި އޭނާގެ މަންމަ ލިވަޕޫލް ދެކެ ލޯބިވާތީ ކަމަށެވެ. އެކަމުގެ ސަބަބެއް އޭނާ އަށް ނޭންގޭ ކަމަށާއި، އެކަމާ ގުޅޭ ގޮތުން އޭނޭގެ މަންމައާ ސުވާލުކުރުމަށް ވެސް އޭނާ ބުންޏެވެ.

އެމްބާޕޭ ބުނީ ލިވަޕޫލަކީ ރަނގަޅު ކުލަބެއް ކަމަށެވެ. އަދި މީގެ ފަސްއަހަރު ކުރިން އޭނާ މޮނާކޯގައި ހުރި ދުވަސްކޮޅު ލިވަރޕޫލާ ދެކޮޅަށް ކުޅުނު ކަމަށް ވެސް އެމްބާޕޭ ބުންޏެވެ. އެންމެ ފަހުން އެމްބާޕޭ ބުނީ ލިވަޕޫލަކީ ބޮޑު ކުލަބެއް ކަމަށެވެ.

އެމްބާޕޭ ޕީއެސްޖީގައި މަޑު ކުރަން ނިންމުމާއި ގުޅިގެން އެ ކުލަބުގެ ރައީސް ބުނީ އެމްބާޕޭއަކީ އެ ކުލަބުގެ ކުރިމަގަށް މުހިންމު ކުޅުންތެރިއެއް ކަމަށެވެ. ނަމަވެސް އެމްބާޕޭ ޕީއެސްޖީގައި މަޑުކުރަން ނިންމުމުން ގިނަ ބަޔަކު އަންނަނީ އެކަމަށް ފާޑު ވެސް ކިޔަމުންނެވެ.