އެމްބާޕޭއަށް މުހިންމީ ފައިސާއެއް ނޫން

ޕީއެސްޖީގެ ތަރި ކީލިއަން އެމްބާޕޭއަށް އެންމެ މުހިންމީ ފައިސާ ނޫންކަމަށް ޕީއެސްޖީގެ ރައީސް ނަސީރް އަލް ޚެލާފީ ބުނެފިއެވެ.

އަލް ޚެލާފީ ބުނީ އެމްބާޕޭއަށް މުހިންމީ ފައިސާ ނޫންކަމަށާއި، ރަނގަޅު ސްޕޯޓިންގ ޕްރޮޖެކްޓެއް ކަަމަށެވެ. އަދި ޕީއެސްޖީން އޭނާއަށް ދޭވަރަށްވުރެ ބޮޑު އަގެއް ދެވޭނެ ކްލަބެއް ސްޕެއިންގައި އެބައޮތްކަމަށްވެސް އޭނާ ބުންޏެވެ. އޭނާގެ މި ބަސް އަމާޒުކޮށްފައިވަނީ އެމްބާޕޭ ހޯދުމަށް އެންމެ ބޮޑަށް މަސައްކަތް ކުރި ރެއާލް މެޑްރިޑަށެވެ.

އެމްބާޕޭ ހޯދުމަށް ރެއާލްއިން ވަނީ މިދިޔަ ސީޒަނުން ފެށިގެން މަސައްކަތް ކޮށްފައެވެ. އަދި މި ސީޒަން ނިމުމަށްފަހު ފްރީ ޓްރާންސްފާއެއްގައި އެމްބާޕޭ ޕީއެސްޖީއަށް ބަދަލުވާނެކަމަށް ގިނަ ބަޔަކަށް ގަބޫލު ކުރެވުނެވެ. ނަމަވެސް އޭނާ ވަނީ ޕީީއެސްޖީގައި މަޑުކުރުމަށް ނިންމާ، 2025 ވަނަ އަހަރާއި ހަމައަށް ކޮންޓްރެކްޓް އައުކޮށްފައެވެ.

ޕީއެސްޖީގައި މަޑުކުރަން އެމްބާޕޭ ނިންމިއިރު، ކްލަބު ހިންގުމުގެ ބޮޑެތި ބާރުތަކެއް އޭނާއަށް ދީފައިވެއެވެ. އެގޮތުން ޕީއެސްޖީގެ ސްޕޯޓިންގ ޑިރެކްޓަރ ލިއެނާޑޯ މަގާމުން ދުރުކޮށް އެހެން މީހަކު އެމަގާމަށް އައްޔަނުކުރުމަށް ޕީއެސްޖީން ވަނީ ނިންމާފައެވެ. އަދި އައު ޑިރެކްޓަރ ހަމަޖެއްސުމުގައި އެމްބާޕޭގެ ޚިޔާލު ހޯދާނެއެވެ. މީގެ އިތުރުން، ޓީމުގެ ކޯޗު މައުރީސިއޯ ޕޮޗެޓީނޯ މަގާމުން ދުރުކޮށް އައު ކޯޗެއްވެސް މިއަންނަ ސީޒަނަށް ވާއިރަށް ޕީއެސްޖީއަށް ހޯދާނެކަމަށް ރިޕޯޓުތައް ބުނެއެވެ.