އެތުލެޓިކްސް އެސޯސިއޭޝަން އޮފް މޯލްޑިވްސް އިން ކުރިއަށްގެންދާ އިންޓަރ ސްކޫލް އެތުލެޓިކްސް ޗެމްޕިއަންޝިޕް 2022 މިއަދު ފަށައިފިއެވެ.

މިއަދު ހެނދުނު ސިންތެޓިކް ދުވާ ޓްރެކުގައި ފެށި މި މުބާރާތް ކުރިއަށް ދާނީ މިއަދުން ފެށިގެން މި މަހުގެ 27 ގެ ނިޔަލަށެވެ. މި މުބާރާތުގައި ޖުމުލަ 47 ސްކޫލަކުން ވަނީ ބައިވެރިވެފަައެވެ. އޭގެ ތެރޭގައި ހިމެނެނީ ރާއްޖެ ތެރޭގެ 25 ސްކޫލެވެ. ބާކީ 22 ސްކޫލަކީ މާލޭގެ ސްކޫލުތަކެވެ.

މުބާރާތުގައި ޖުމުލަ 102 އިވެންޓު ކުރިއަށްދާނެއެވެ. އަދި މުބާރާތުގައި 1800 އަށްވުރެ ގިނަ އެތުލީޓުން ވެސް ބައިވެރިވެއެވެ. ހަތަރު އުމުރުފުރާއަކަށް ކުރިއަށްދާ މި މުބާރާތުގައި ހިމެނެނީ 13، 15، 17، އަދި 19 އަހަރުން ދަށެވެ. މުބާރާތް ފެށުމުގެ ކުރިން އެތުލެޓިކްސް އެސޯސިއޭޝަނުން ވަނީ މުބާރާތައް ބޭނުންވާ ޓެކްނިކަލް އޮފިޝަލުން ތަމްރީނު ކުރުމުގެ ގައުމީ ފެންވަރުގެ ކޯހެއް ކުރިއަށް ގެންގޮސްފައެވެ.

މުބާރާތުގައި މިއަދު ހެނދުނު ކުރިއަށް ދިޔައީ 100 މީޓަރުގެ ދުވުމެވެ. މުބާރާތުގެ ޓީމް އިވެންޓުތައް ފެށުމަށް ހަމަޖެހިފައިވަނީ މާދަމާއެވެ. ކޮވިޑް-19 އާއި ގުޅިގެން މި މުބާރާތް ވަނީ ދެ އަހަރު ދުވަހަށް މެދު ކެނޑިފައެވެ. އެކުވެނި ޓްރެކް ޒަމާނީ ފެންވަރަށް ބަދަލުކުރި ފަހުން މިއީ ބާއްވާ ސްކޫލްތަކުގެ ފުރަތަމަ މުބާރާތެވެ.