ސިޓީގައި ތިބީ ލެޖެންޑުން- ގާޑިއޯލާ
23 މެއި 2022 | ހޯމަ 02:54މިއީ ސިޓީން ލީގު ހޯދި ހަވަނަ ފަހަރު
ޗެމްޕިއަން ތަށްޓާއެކު ސިޓީގެ ކުޅުންތެރިން: ފޮޓޯ-ޕްރިމިއަރ ލީގު
އިނގިރޭސި ޕްރިމިއަރ ލީގު ދިފާއުކުރި މެންޗެސްޓަރ ސިޓީގައި މުޅިންވެސް ތިބީ ލެޖެންޑުންކަމަށް ކޯޗު ޕެޕް ގާޑިއޯލާ ބުނފިއެވެ. ލީގުގެ ފަހުން މެޗުން ލީގު ޗެމްޕިއަންކަން ޔަޤީންކުރުމަށްފަހު ގާޑިއޯލާ ބުނީ ސިޓީގެ ކޮންމެ ކުޅުންތެރިއަކީވެސް "ޚާއްސަ" ކުޅުންތެރިއެއްކަމަށެވެ.
ގާޑިއޯލާ ބުނީ ސިޓީން ހޯދީ އުނދަގޫ ކާމިޔާބީއެއްކަމަށެވެ. މީގެކުރިން މިކާމިޔާބީ ހޯދީ މެންޗެސްޓަރ ޔުނައިޓެޑްގައި ފާގަސަންކަމަށް ގާޑިއޯލާ ބުންޏެވެ. ހަ އަހަރުގެ ތެރޭގައި ފަސް ފަހަރަށް ލީގު ހޯދި ސިޓީގެ ކުޅުންތެރިންނަށް ތައުރީފް ކުރަމުން ގާޑިއޯލާ ބުނީ އަބަދުވެސް ފަހު މެޗަކީ ޚާއްޞަ މެޗެއްކަމަށާއި, މިހަނދާންތައް އަބަދުވެސް ހުންނާނެކަމަށެވެ.
ސިޓީން ލީގު ޔަޤީންކުރީ އެސްޓަން ވިލާއިން ދެ ލަނޑުގެ ލީޑެއް ހޯދާފައިވަނިކޮށް ފަހު ފަނަރަ މިނިޓްގެ ތެރެއިން ފަސް މިނިޓްގެ ތެރޭގައި ތިން ލަނޑު ޖަހާ މޮޅުވެގެންނެވެ. މިދިޔަ ހަ އަހަރުގެ ތެރެއިން ސިޓީއަށް ލީގު ގެއްލުނީ އެއް ފަހަރުއެވެ. ސިޓީން ވަނީ ހަ ފަހަރު ލީގުގެ ޗެމްޕިއަންކަން ހޯދާފައެވެ.
