"ރަން އިން އައްޑޫ" ގެ ނަމުގައި އައްޑޫ ސިޓީގައި އަންނަ މަހު ދުވުމެއް ބާއްވަން ނިންމައިފި އެވެ.

ޖުމްލަ ހަތަރު ކެޓަގަރީއެއް ހިމެނޭ މި ދުވުމުގައި ފުރަތަމަ ކުރިޔަށްދާނީ މެރަތަން އެވެ. މެރަތަން ރޭސް ފެށުމަށް ހަމަޖެހިފައިވަނީ 15 ވަނަ ދުވަހުގެ ރޭ ފަތިހު 4:45 ގައެވެ. މި ރޭސް ފެށުމަށް ހަމަޖެހިފައިވަނީ ކަނބިހާ މަގުންނެވެ. މެރަތަން ރޭސް ނިމޭނެކަމަށް ލަފާކުރެވެނީ ފަސް ގަޑިއިރާ 20 މިނެޓުންނެވެ. އެގޮތުން ދުވުންތެރިންނަށް ރޭސް ނިންމާލެވޭނެ ކަމަށް ލަފާކުރެވެނީ 10:10 ގައެވެ. މި ރޭހުގައި 42.2 ކިލޯ މީޓަރުގެ ރާސްތާއެއް ކަޑައްތުކުރަން ޖެހޭނެއެވެ.

ދެވަނަ ރޭހަކަށް ފަށާނީ ހާފް މެރަތަން އެވެ. މި ރޭސް ފަށާނީ ގަން އިންޓަނޭޝަނަލް އެއާޕޯޓުން 06:45 ގައެވެ. މި ރޭހުގައި 21.1 ކިލޯ މީޓަރުގެ ރާސްތާއެއް ކަޑައްތުކުރަންޖެހޭނެ އެވެ.

ތިންވަނަ ރޭހަކަށް ފަށާނީ 10 ކިލޯމީޓަރު ރޭހެވެ. މި ރޭސް ފަށާނީ ހިތަދޫ ލިންކްރޯޑުން 07:45 ގައެވެ. މި ދުވުމުގެ ފަހު ރޭހަކީ ފަސް ކިލޯ މީޓަރު ރޭހެވެ. މި ރޭސް ހިތަދޫ އެޅެދީދީ މަގުން 08:45 ގައި ފަށާނެއެވެ. މި ހުރިހާ ރޭހެއްވެސް ނިންމާނީ ހިތަދޫގައި ހުންނަ ކޮންވެންޝަން ސެންޓަރަށެވެ.

މި ރޭސްތައް ކުރިޔަށްދާ ރޫޓުތަކުގެ ކޮންމެ ދެ ކިލޯ މީޓަރަކުން ފަސްޓްއެއިޑް ސްޓޭޝަން ވަނީ ގާއިމުކޮށްފައެވެ. ފަސްޓްއެއިޑްގެ ގޮތުން އެހީތެރިވާނީ މޯލްޑިވްސް ރެޑްކްރޮސެންޓުން ކަމަށާއި، ރޭސްތައް ކުރިޔަށްދާއިރު، އައްޑޫގެ ފުލުހުން ސަލާމަތީ ގޮތުން ހަރަކާތްތެރިވާނެ ކަމަށް މިކަންތައް އިންތިޒާމުކުރާ ފަރާތުން ބުނެއެވެ.

މި އިވެންޓް އިންތިޒާމުކުރުމުގައި ހަރަކާތްތެރިވާ މޯލްޑިވްސް އޮލިމްޕިކް ކޮމެޓީގެ ޖެނެރަލް ސެކެޓްރީ އަހުމަދު މަރުޒޫގް (މަރޭ) ވިދާޅުވީ، މި ރޭސްތަކުގައި އެންމެ ބޮޑަށް ބެލީ އައްޑޫ ލިންކްރޯޑްތަކުގައި ކުރިޔަށް ގެންދިޔުމުގެ އިތުރުން އައްޑޫގެ ރީތިކަން ފެންނަކަހަލަ ދެތިން މަގެއްގައިވެސް ކުރިޔަށް ގެންދިޔުން ކަމަށާއި، ރޭސްތައް އެކި ތަންތަނުން ފަށަން ނިންމީ އައްޑޫގެ ރީތިކަން ބޮޑަށް ދެއްކޭނެ ގޮތަކަށް ކަމަށެވެ.

މި އިވެންޓާ ބެހޭގޮތުން އައްޑޫ ސިޓީ ކައުންސިލްގެ މޭޔަރު އަބްދުﷲ ސޯދިގު (ސޯބެ) ވިދާޅުވީ، އިވެންޓް ޓޫރިޒަމް އަކީ ރާއްޖެއިން ފެންނަ ފަތުރުވެރިކަމާ މުޅިން ތަފާތު ފަތުރުވެރިކަމެއް ކަމަށާއި، އެކަންތައް އައްޑޫއިން ދެއްކިދާނެ ކަމަށެވެ. އެގޮތުން އޭނާ ވިދާޅުވީ، ޓީއެފްޖީގެ މި އިވެންޓް ވެގެންދާނީ އައްޑޫގެ ތަރައްގީގެ ތަސައްވަރަށް ވަރަށް މުހިންމު އިވެންޓަކަށް ކަމަށެވެ.

މި އިވެންޓަށް އައްޑޫ ސިޓީ ކައުންސިލުންވެސް އަންނަނީ ދެމުންނެވެ. އެގޮތުން އެ ފަރާތުން އައްޑޫ ސިޓީގެ ރީތިކަން ދުވުންތެރިންނަށް ދައްކާލުމަށް އިންތިޒާމުތަކެއް ހަމަޖައްސަމުން އަންނަ ކަމަށް އިންތިޒާމުކުރާ ފަރާތްތަކުން ބުނެއެވެ.

މި ރޭހުގައި ބައިވެރިވުމުގެ ފުރުސަތު އޯގަސްޓް އެއްވަނަ ދުވަހު ހުޅުވާލާނެއެވެ. އެގޮތުން ގޮޓްރޭސްޑޮޓްކޮމް މެދުވެރިކޮށް ރޭހުގައި ބައިވެރިވޭނެކަމަށް އިންތިޒާމުކުރާ ފަރާތްތަކުން ބުނެއެވެ. ގޮޓްރޭސް ޓޮޓްކޮމް ކުންފުންޏަކީ މި އިވެންޓުގެ އޮފިޝަލް ޓައިމިން ޓެކްނޮލޮޖީ ޕާޓްނާ އެވެ.