މެންޗެސްޓަރ ޔުނައިޓެޑްގެ މެދުތެރެއަށް ކުޅެމުންއަން އިނގިރޭސި ޤައުމީ ޓީމުގައިވެސް މުހިތްމު ދައުރެއް ހިއްސާކުރާ ޖެސީ ލިންގާޑް ކުލަބާއިއެކު ހަދާފައިވާ އެގްރީމެންޓް އާކޮށްފިއެވެ.

އުމުރުން 24 އަހަރުގެ ލިންގާޑް ޔުނައިޓެޑްގެ ކޮންޓްރެކް އާކޮށްފައިވަނީ 2021 ވަނަ އަހަރާއި ހަމައަށް އެކުލަބުގައި ދެމިހުރުމަށެވެ.

ހަފްތާއަކު އެއްލައްކަ ޕައުންޑަށް ލިންގާޑްގެ ކޮންޓްރެކްޓް އާކުރިއިރު، ދެފަރާތުގެ މެދުގައިވެފައިވާ އެއްބަސްވުމަށް ފަހުގެ ތާރީޚެއްގައި ބަދަލުތަކެއް އައުމަކީ އެކަށީގެންވާ ކަމެކެވެ.

ހަތް އަހަރުގައި ޔުނައިޓެޑްގެ އެކަޑަމީއާ ގުޅުނު ލިންގާޑް މިހާތަނަށް އެކުލަބަށް 70 މެޗު ކުޅެދީފައިވާއިރު، އިނގިރޭސި ޤައުމީޓީމަށް ހަތަރު ފަހަރު ކެޅެދީފައިވެއެވެ.

"މެންޗެސްޓަރ ޔުނައިޓެޑަކީ އަބަދުވެސް އަހަރެންގެ ހަޔާތުގައި ބޮޑުބައެއް ހިއްސާކުރޭ" ލިންގާޑް ބުނެފައިވެއެވެ.

ލިންގާޑް ފާހަގަކުރެވިފައިވަނީ ވެމްބްލީ ސްޓޭޑިއަމްގައި ލަނޑު ޖެހުމުގައި ޔުނައިޓެޑްގެ އެންމެ ކާމިޔަބު ކުޅުންތެރިޔާގެ ގޮތުގައިއެވެ.

އެފްއޭކަޕް ކާމިޔާބުކުރުމުގައި ޖެހި ލަނޑުގެ އިތުރުން، ކޮމިއުޓީ ޝީލްޑް މެޗުގައި ލެސްޓަރ ސިޓީއާ ދެކޮޅަށާ ފެބްރުއަރީ މަހު އީއެފްއެލް ކަޕްގައި ސައުތްހެމްޓަންއާ ދެކޮޅަށް ވެމްބްލީގައި ޖެހިލަނޑުތައް ފާހަގަކޮށްލެވެއެވެ.

ލިންގާޑްގެ ކޮންޓްރެކްޓް އާކުރުމުން ޔުނައިޓެޑްގެ ކޯޗު މޮރީނިއޯ ބުނެފައިވަނީ ލިންގާޑްއަކީ ޔުނައިޓެޑްގެ ސްކޮޑްގައި މަޤްބޫލު ކުޅުންތެރިއެއް ކަމަށެވެ.

ޔުނައިޓެޑްގެ ފުރަތަމަ ޓީމުން ފުރުސަތު ދިނުމުގެ ކުރިން ލިންގާޑް ވަނީ ލެސްޓަރ ސިޓީ އާ ބާމިންހަމް ސިޓީގެ އިތުރުން ބްރައިޓަންއަށް ލޯނުގެ އުސޫލުން ދޫކޮށްލާފައެވެ.

ލިންގާޑްއަށް ޔުނައިޓެޑްގެ ޓީމުން އެންމެ ފުރަތަމަ ފުރުސަތެއް ދީފައިވަނީ ވެންހާލްގެ ކޯޗުކަމުގެ ދަށުން 15-2014 ވަނަ އަހަރުގެ ސީޒަންގައި ޔުނައިޓެޑް ކުޅުނު ފުރަތަމަ މެޗުގައެވެ.

މި ސީޒަންގައި ލިންގާޑް ވަނީ ޔުނައިޓެޑަށް 29 މެޗު ކުޅެދީފައެވެ. މިހާތަނަށް 5 ގޯލެއް ލިންގާޑް ވަނީ ޖަހާފައެވެ.