39 ނަންބަރު ޖަރޒީގައި މެސީ ފޮޓޯ ނެގީ ކީއްވެ؟
22 މެއި 2022 | އާދީއްތަ 17:44ބާސެލޯނާއާއެކު މެސީ 38 ޓްރޮފީ ހޯދި
މެސީ، ޕީއެސްޖީގެ 39 ނަންބަރު ޖަރޒީގައި
ޕީއެސްޖީއަށް ކުޅެމުން އަންނަ ލިއޮނެލް މެސީ، 39 ނަންބަރު ޖަރޒީއެއްގައި އޭނާގެ އިންސްޓަގްރާމް ސްޓޯރީއަށް ފޮޓޯއެއް ލުމާއެކު ގިނަ ބަޔަކު އެކަމާ ސުވާލު އުފެއްދިއެވެ. މި ސީޒަންގައި ޕީއެސްޖީއަށް ބަދަލުވުމަށްފަހު މެސީ ކުޅެމުން އަންނަނީ 30 ނަންބަރު ޖަރޒީގައެވެ. އެހެންކަމުން 39 ނަންބަރު ޖަރޒީގައި އޭނާގެ ސްޓޯރީއަށް ފޮޓޯ ލުމުން ގިނަ ބަޔަކު ހައިރާންވިއެވެ.
އުމުރުން 34 އަހަރުގެ މެސީ މިފޮޓޯ އޭނާގެ ސްޓޯރީގައި ހިއްސާކުރީ ސަބަބެއް ނެތިއެއް ނޫނެވެ. ހޮނިހިރު ދުވަހުގެރޭ ޕީއެސްޖީން ފްރެންޗް ލީގު ނިންމާލިއިރު އެޓީމުން ވަނީ މި ސީޒަންގެ މުބާރާތް ކާމިޔާބުކޮށްފައެވެ. މިއީ މެސީގެ ކުޅިވަރު ކެރިއަރުގައި އޭނާއަށް ލިބުނު 39 ވަނަ ޓްރޮފީއެވެ.
ކެރިއަރުގެ ބޮޑު ބައެއް ސްޕެއިންގެ ބާސެލޯނާގައި މެސީ ހޭދަކުރިއިރު އޭނާ ވަނީ ބާސެލޯނާއާއެކު 38 ޓްރޮފީ ހޯދާފައެވެ. ޕީއެސްޖީއާއެކު އޭނާއަށް މިހާތަނަށް ލިބުނު ހަމައެކަނި ޓްރޮފީއަކީ ފްރެންޗް ލީގުގެ ޗެމްޕިއަން ޓްރޮފީއެވެ.
