ބިދޭސީ ކުޅުންތެރިންނަށް ގެނައި ބަދަލާއެކު ޤައުމީ ޓީމަށް ފައިދާ ކުރާނެ: ސާޖިދު

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އިން މިއަހަރު ބާއްވާ އެސޯސިއޭޝަން ކަޕްގައި ޓީމުތަކަށް މިފަހަރު ގެންނަ ބިދޭސީ ކުޅުންތެރިންގެ ސަބަބުން ރާއްޖޭގެ ޤައުމީ ޓީމަށް ފައިދާ ކުރާނެ ކަމަށް ވީއޭއެމްގެ ޓެކްނިކަލް އެންޑް ޑިވަލޮޕްމަންޓް ކޮމެޓީގެ ޗެއާމަން މުޙައްމަދު ސާޖިދު (ކާއްޓޭ) ވިދާޅުވެއްޖެއެވެ.

ވީއޭއެމުން މިއަހަރުގެ ވޮލީ ސީޒަން ފެށުމަށް ތައްޔާރުވަމުން އަންނަ އިރު، އެ އެސޯސިއޭޝަނުން ބުނީ ޓީމުތަކަށް ދެމުން އައި ފައިސާގެ ބަދަލުގައި މި އަހަރު ދިނުމަށް ހަމަޖެހިފައިވަނީ ކުޅުންތެރިން ކަމަށެވެ. އަދި ޓީމުތަކަށް ކުޅުންތެރިން ދޭނީ އެ ޓީމަކުން ބޭނުންވާ މަޤާމަކަށް އެންމެ އެކަށީގެންވާ ކުޅުންތެރިޔާކަމަށް ވެސް ވީއޭއެމުން ބުނެއެވެ. އަދި ޕްރިލިމިނަރީ ރައުންޑްގައި ވާދަކުރާ ޓީމުތަކަށް ކުޅުންތެރިން ބޭނުންވާ މަޤާމުތައް ދެނެގަތުމަށްޓަކައި މިހާރު ޓީމުތަކުން ފޯމެއް ފުރާފައިވާ ކަމަށާއި، އެއާ އެއް ގޮތަށް އިންޑިއާއިން އެންމެ ހައި ލެވެލްގެ 18 ކުޅުންތެރިން ހިމެނޭ ޕޫލެއް މިހާރު އެކުލަވާލާފައިވާނެ ކަމަށް ވެސް ވީއޭއެމުން ބުނެއެވެ. އަދި އެ ކުޅުންތެރިންނަކީ އެ ޤައުމުގެ 600 ކުޅުންތެރިންގެ ތެރެއިން ހޮވާލެވުނު ކުޅުންތެރިންކަމަށާއި، މި ކުޅުންތެރިންނަކީ އެ ޤައުމުގެ ޤައުމީ ލީގުގައި ވެސް އެންމެ ރަނގަޅަށް ޕާފޯމެންސް ދައްކާފައިވާ ކުޅުންތެރިންކަމަށްވެސް ވީއޭއެމުން ބުނެއެވެ.

މި ކުޅުންތެރިން ޓީމުތަކަށް ބަހާނީ ޑްރާފްޓް ސިސްޓަމެެއްގެ ތެރެއިންނެއެވެ. އެއީ ގުރުއަތު ނެގިގެން ކުޅުންތެރިންގެ ތެރެއިން އެ ކުލަބަކުން ބޭނުންވާ ކުޅުންތެރިއެއް ނަގާ ގޮތަށެވެ. ވީއޭއެމުން ފާހަގަ ކުރި ގޮތުގައި މި ބަދަލާއެކު ކޯޗުންގެ މަސައްކަތް ވެސް އެހެން ހަރުފަތަކަށް ގެންދެވޭނެއެވެ.

ސާޖިދު ވިދާޅުވި ގޮތުގައި ވީއޭއެމުން މުބާރާތްތައް ރާވަންޖެހޭނީ އޭގެން ޤައުމީ ޓީމަށް އެންމެ ފައިދާ ކުރާނެ ގޮތަށް ކަމަށާއި، މުބާރާތަށް މިފަހަރު ގެނެވުނު ބަދަލާއެކު ޤައުމީ ޓީމަށް ފައިދާ ކުރާނެ ކަމަށެވެ. ސާޖިދު ވިދާޅުވީ މިފަހަރު ގެނައި ބަދަލާއެކު ޓީމުތަކަށް ދެ އެޓޭކަރުންގެ އިތުރުން ސެޓަރެއް ގެނައުމުގެ ފުރުސަތު އޮންނާނެ ކަަމަށެވެ. އަދި އެއީ ގިނަ ޓީމުތަކުން ބޭނުންވާ ގޮތް ކަމަށް ވެސް އޭނާ ވިދާޅުވިއެވެ.

މީގެ އިތުރުން ސާޖިދު ވިދާޅުވީ މި ލެވެލްގެ ކުޅުންތެރިންނާއެކު ކުޅެން އާންމުކޮށް ފުރުސަތު ލިބެނީ މުބާރާތަކަށް ޓްރެއިނިން ހެދުމަށް ގައުމަށް ގޮސް ކުޅެވޭ ޕްރެކްޓިސް މެޗެއްގައި އެކަނިކަމަށެވެ. އެ ޕްރެކްޓިސް މެޗަކީ ކުޅުންތެރިންނަށް އެއްވެސް ޕްރެޝަރެއް ނޫން ކަމަށާއި، ކުލަބެއްގެ އެ ލެވެލްގެ ކުޅުންތެރިންނާއެކު މި ގޮތަށް ކުޅެލަން ލިބުމަކީ ޕްރެޝަރެއް ކަމަށެވެ. އޭގެ ސަބަބުން ތަޖުރިބާ ލިބިގެންދާނެ ކަމަށާއި، މޮޅެތި ކުޅުންތެރިންގެ ބްލޮކް ކުރުމާއި، އެޓޭކް ކުރުމާއި، ސާވިސް ކުރުން އަދި ޑިފެންސް ކުރަން ވެސް ލިބޭ ކަމަށް ސާޖިދު ވިދާޅުވިއެވެ.

މި ކުޅުންތެރިންނާއެކު ފަރިތަކުރުމަށް 13 ދުވަސް ލިބޭނެ ކަމަށް ސާޖިދު ވިދާޅުވިއެވެ. ސާޖިދު ވިދާޅުވީ އިންޓަނޭޝަނަލް ވޮލީގައި ކުޅެނީ ޕަވާ ވޮލީ ކަމަށާއި، އެންމެ ނޯމަލްކޮށް ވެސް ޖަމްޕް ސާވިސް އަންނާނީ ގާތް ގަނޑަކަށް 140 ކިލޯ މީޓަރުގައި ކަމަށާއި، އެ ބޯޅަ ރިސީވް ކުރަން މިހާރު ދިވެހި ކުޅުންތެރިންނަށް ނުލިބޭ ކަމަށެވެ. ނަމަވެސް، މި ލިބޭ 13 ދުވަހުގެ ތެރޭގައި ދިވެހިރާއްޖޭގެ ގައުމީ ޓީމުގެ ހުރިހާ ކުޅުންތެރިންނަށް ވެސް އެ ބޯޅަ ޕްރެކްޓިސް ކުރަން ލިބޭނެ ކަމަށް ސާޖިދު ވިދާޅުވިއެވެ. އެކަމުގެ ސަބަބުން ރާއްޖޭގެ ވޮލީއަށް ވަރަށް ބޮޑު ފައިދާއެއް ކުރާނެ ކަމަށް ވެސް އޭނާ ވިދާޅުވިއެވެ.