ސްރީލަންކާގެ ބޮޑުވަޒީރުކަމާ އަލަށް ހަވާލުވެވަޑައިގެން ރަނިލް ވިކްރަމަސިންގހަ ވޯލްޑް ބޭންކް އަދި އޭޝިއަން ޑިވެލޮޕްމެންޓް ބޭންކާއެކު އެގައުމުގެ މިހާރުގެ ހާލަތާގުޅޭ މަޝްވަރާތަކެއް ކުރިއަށް ގެންދަވައިފިއެވެ.
ރޮއިޓަރސްއިން ރިޕޯޓުކޮށްފައިވާގޮތުން، ބޮޑުވަޒީރުގެ އޮފީހުން ވަނީ، އެ ދެބޭންކާއެކު މަޝްވަރާތައް ކުރިއަށް ގެންދަވާފައިވާކަން ހާމަކޮށް ބަޔާނެއް ނެރެފައެވެ.
އެބަޔާނުގައި ވާގޮތުން، މި މަޝްވަރާތަކުގައި ބޮޑަށް ދެކެވިފައި ވަނީ ލަންކާއަށް މިވަގުތު ބޭނުންވާ ބޭހާއި ގަސްކާނާ އަދި ކާބޯތަކެތީގެ ބާވްތަތްތައް އެގައުމަށް ހޯދައިދިނުމަށް ބޭންކުތަކުގެ އެހީ ފޯރުކޮށްދިނުމާ ގުޅޭގޮތުންނެވެ.
ލަންކާގެ ބޮޑުވަޒީރުކަމާ ހަވަނަ ފަހަރަށް ހަވާލުވެވަޑައިގެން ވިކްރަމަސިންގހަ ވަނީ ހޮނިހިރު ދުވަހު އެމަނިކުފާނުގެ ކެބިނެޓަށް މީހުން އައްޔަނު ކުރައްވަން ފައްޓަވާފައެވެ.
ވިކްރަމަސިންގހައަކީ މަޖިލީހުގައި އެމަނިކުފާނު ނިސްބަތްވާ ޔުނައިޓެޑް ނެޝަނަލް ޕާޓީ ތަމްސީލުކުރާ ހަމައެކަނި މެމްބަރު ކަމުން، އެމަނިކުފާނުގެ ކެބިނެޓު އެކުލަވާލުމުގައި ގޮތަބަޔާ ރާޖަޕަކްސަ ނިސްބަތްވާ ސްރީލަންކާ ޕޮޑުޖަނަ ޕެރެމުނާ ޕާޓީއަށް ބަރޯސާވާން ވަނީ މަޖުބޫރުވެފައެވެ.
އެގޮތުން ހޮނިހިރު ދުވަހު ކެބިނެޓަަށް ހަތަރު މެމްބަރުން އައްޔަނުކުރައްވާފައިވާ އިރު، ހަތަރު މެމްބަރުންނަކީވެސް ސްރީލަންކާ ޕޮޑުޖަނަ ޕެރެމުނާ ޕާޓީގެ މެމްބަރުންނެވެ. އެހެންކަމުން އަލަށް ކެބިނެޓަށް އައްޔަނު ކުރެވުނު މެމްބަރުންނާ މެދުވެސް މިހާރު ލަންކާގައި މުޒާހަރާކުރަމުންދާ ރައްޔިތުން ވަނީ ނުރުހުން ފާޅުކޮށްފައެވެ. މުޒާހަރާގެ ބައިވެރިން ގޮވަމުންދަނީ ގައުމުގެ ސިޔާސީ މަގާމުތަކުން ރާޖަޕަކްސަ އާއިލާ ދުރުވުމަށެވެ.
