ހުޅަނގު މޫސުމުގެ ގަދަ ވަޔާއެކު ކ. ކާށިދޫގެ ފަތްކެޔޮ ދަނޑުތައް އެއްކޮށް ހަލާކުވެއްޖެއެވެ.

ކާށިދޫއަކީ ދަނޑުވެރިކަމުގެ މަސައްކަތް ފުޅާ ދާއިރާއެއްގައި ކުރާ ރަށެކެވެ. ވަކިން ޚާއްސަކޮށް ދޮންކެޔޮ ހެއްދުމުގައި ފާހަގަކޮށްލެވޭ ރަށެކެވެ. މާލެއަށާއި، ރިސޯޓުތަކަށް އެރަށުން ގިނަ އަދަދަކަށް ދޮންކެޔޮ ގެންދެއެވެ.

ރާއްޖެއެމްވީއަށް މައުލޫމާތުދެއްވަމުން ކ. ކާށިދޫ ކައުންސިލްގެ ރައީސް މުހައްމަދު އާމިރު ވިދާޅުވީ ގަދަ ވައިގެ ސަބަބުން ވައި މަތީގައި ހުރި ދަނޑުތައް ވަރަށް ބޮޑަށް ހަލާކުވެފައިވާކަމަށެވެ. ބޮޑަށް ގެއްލުންލިބިފައިވަނީ ދޮންކެޔޮ ގަސްތަކަށް ކަމަށާއި، 10،000 ވަރަކަށް ގަހަށް އެކި ވަރުގެ ގެއްލުން ލިބިފައިވާކަމަށް އާމިރު ވިދާޅުވިއެވެ.

ދޮންކެޔޮ ގަސްތަކުގެ އިތުރުން ފަޅޯ ގަސްތަކުގައިހުރި ފަޅޯތައްވެސް ފައިބައިފައިވާކަމަށް އޭނާ ވިދާޅުވިއެވެ. މި ލިބުނު ގެއްލުމުގެ މައުލޫމާތު އެގްރިކަލްޗަރ މިނިސްޓްރީއާވެސް ހިއްސާކުރައްވާފައިވާނެ ކަމަށް އާމިރު ވިދާޅުވިއެވެ. އަދި ކާށިދޫއަށް ގޮސް އެ ލިބުނު ގެއްލުން ބަލައިދިނުމަށް އެދިފައިވާނެކަމަށް ވިދާޅުވިއެވެ.

އާމިރު އިތުރަށް ވިދާޅުވީ ކާށިދޫގައި ފުޅާ ދާއިރާއެއްގައި ދަނޑުވެރިކަން ކުރަމުންދާއިރު، ގިނަ ދަނޑުތަކަކީ އިންޝުއަރ ނުކޮށް ހުރި ތަންތަން ކަމަށެވެ. މިފަދަ ހާދިސާތައް ހިނގާއިރު ދަނޑުތައް އިންޝުއަރ ކޮށްފައިހުރުން މުހިންމު ކަމަށާއި، އެހެންކަމުން އެތަންތަން އިންޝުއަރ ކުރުމުގެ މަސައްކަތް ކައުންސިލްގެ އެހީތެރިކަމާއެކު ކުރިއަށްދާނެ ކަމަށް އޭނާ ވިދާޅުވިއެވެ. އަދި ކާށިދޫގެ ދަނޑުތައް ވަރަށް ބޮޑަށް ރީސްޓްރަކްޗަރ ކުރަން ޖެހިފައިވާކަމަށާއި، އެ މަސައްކަތްވެސް ކުރިއަށްދާނެ ކަމަށް ވިދާޅުވިއެވެ.