ސްޕެނިޝް ލީގުގައި މިރޭ ގެޓާފޭ އާއި ދެކޮޅަށް ނިކުންނަ މެޗަށް އެކުލަވާލާފައިވާ ބާސެލޯނާގެ ސްކޮޑުގައި އެޓީމުގެ ޑިފެންޑަރު ރޮނާލްޑް އަރައުޚޯ ނުހިމަނައެވެ.
މުބާރާތުގައި އަންގާރަ ދުވަހުގެރޭ ސެލްޓަ ވީގޯ އާއި ބައްދަލުކުރި މެޗުގައި އޭނާގެ ބޮލަށް ލިބުނު އަނިޔާގެ ސަބަބުން އޭނާއަށް ފަރުވާ ދިނުމަށް ވަނީ ހޮސްޕިޓަލަށްވެސް ގެންގޮސްފައެވެ. ހޮސްޕިޓަލުން އޭނާ ދޫކޮށްލުމުން ބާސެލޯނާއިން ބުނީ ކުރިއަށް ހުރި މެޗުތަކުގައި އޭނާ ބައިވެރިވާނީ މުޅިން ރިކަވާ ވެއްޖެނަމައެވެ.
އަރައުޚޯއަށް އަނިޔާވީ ބޯޅައިގައި ބޮލުން ޖައްސަން އުޅުމުގެ ތެރޭގައެވެ. މަތިމަތިން އައި ބޯޅައިގައި ބޮލުން ޖައްސަން މަސައްކަތް ކުރީ އަރައުޚޯއާއި ގަވީއެވެ. ނަމަވެސް ދެކުޅުންތެރިންގެ ބޮލާއިބޯ ޖެހިގެން ދެކުޅުންތެރިންވެސް ދަނޑު މައްޗަށް ވެއްޓުނީއެވެ. މިއާއެކު އަރައުޚޯ އަވަހަށް ތެދުވެ ދުއްވައިގަތް ނަމަވެސް ތަންކޮޅަކަށް ދެވުނުތަނާ އޭނާ ވެއްޓުނީއެވެ. އޭރުވެސް ގަވީ އޮތީ ވެއްޓިފައެވެ.
މިއާއެކު އަރަޚޯގެ ހާލު ގޯސްވެ އޭނާ ވަނީ ވަގުތުން ހޮސްޕިޓަލަށް ގެންގޮސްފައެވެ. ޓެސްޓުތަކާއި ސްކޭންތައް ހަދާ، ފަރުވާ ދިނުމަށްފަހު އޭނާ ހޮސްޕިޓަލުން ދޫކޮށްލީ ބުދަ ދުވަހުއެވެ. އަދި އަރައުޚޯގެ ޓެސްޓުތަކުގެ ނަތީޖާއާއި މެދު ޑޮކްޓަރުން ހިތަހަމަޖެހޭ ކަމަށްވެސް ރިޕޯޓުތައް ބުނެއެވެ.
ބާސެލޯނާގެ ސްކޮޑުގައި އޭނާ ހިމަނާފައި ނުވި ނަމަވެސް އޭނާ ވަނީ ޓީމުގެ ފަރިތަކުރުންތަކުގައި ބައިވެރިވެފައެވެ. އަދި އުރުގުއޭއިން ކުޅުމަށް ހަމަޖެހިފައިވާ ތިން ޕޯސްޓް ސީޒަން ފްރެންޑްލީ މެޗުގައިވެސް އޭނާ ހިމަނާފައިވެއެވެ.
