ކުރީގެ ރައީސް, ރައީސް މައުމޫން އަބްދުލްގައްޔޫމުގެ ނަންފުޅު ބޭނުންކޮށްގެން ބައެއް ފަރާތްތަކުން ތާއިދު ހޯދުމަށް މަސައްކަތް ކުރައްވާތީ އެކަން އެމަނިކުފާނު ކުށްވެރިކުރައްވައިފިއެވެ.
ކުރީގެ ރައީސް މައުމޫން ނެރުއްވި ބަޔާނުގައި ވިދާޅުވެފައިވަނީ މިހާރު އެމަނިކުފާނަކީ، ހަމައެކަނި އެމް.އާރް.އެމް.ގެ މެންބަރެއް ކަމަށެވެ. އެހެން އެއްވެސް ސިޔާސީ ޕާޓީއެއްގެ މެންބަރެއް ނޫން ކަމަށާއި، އެހެން ޕާޓީއަކަށް ތާއީދުކުރައްވާ ފަރާތެއްވެސް ނޫން ކަމަށެވެ.
ފަހަކަށް އައިސް ބައެއް ސިޔާސީ ފަރާތްތަކުން ރައްޔިތުންނާ، އަދި ޚާއްޞަކޮށް އެމަނިކުފާނަށް ތާއީދުކުރާ ފަރާތްތަކާ ބައްދަލުކުރާއިރު، އެމަނިކުފާނު މިހާރު ތާއީދުކުރައްވަނީ އެ ފަރާތްތަކަށް ކަމަށް ވިސްނައިދިނުމަށް ދޮގު ވާހަކަތައް ދައްކަމުންދާ ކަމުގެ ޝަކުވާއާއި ކަންބޮޑުވުން އެކި ފަރާތްތަކުން ޙިއްޞާ ކުރަމުންދާ ކަމަށް ރައީސް މައުމޫން ވިދާޅުވެފައިވެއެވެ.
ރައީސް މައުމޫން ވިދާޅުވީ އެމަނިކުފާނާއި، ކިތަންމެ ގާތް ފަރާތެއް ނަމަވެސް، ނުވަތަ ސިޔާސީ ގޮތުން އެމަނިކުފާނާއެކު ކުރިން މަސައްކަތް ކޮށްފައިވާ ފަރާތެއް ނަމަވެސް، ދައްކާ އެފަދަ ވާހަކަތަކަކީ އޭގައި އެއްވެސް ޙަޤީޤަތެއް ނެތް، ދޮގު ވާހަކަތަކެއް ކަމަށެވެ.
މޯލްޑިވްސް ރީފޯމް މޫވްމަންޓަކީ، ދިވެހިން އެދޭ އިސްލާޙީ ބަދަލުތަކެއް ޙާޞިލުކުރުމަށް އުފެދިފައިވާ އުންމީދީ ޕާޓީއެއް ކަމަށާއި، އެމް.އާރް.އެމް.ގެ އަސާސްތަކަކީ، ދިވެހިންގެ ތެރޭގައި، އިހު އޮތް ދާޚިލީ ހަމަޖެހުމާއި، ރާއްޖޭގެ މިނިވަންކަމާއި ސިޔާދަތު ހިފަހައްޓައި، އީޖާދީ ޚިޔާލުތަކާއެކު، ފުދުންތެރި، އަމާން މާދަމައެއް ބިނާ ކުރުމަށް ކުރެހެމުންދާ މަގެއް ކަމަށް ރައީސް މައުމޫންގެ ބަޔާނުގައި ވިދާޅުވެފައިވެއެވެ.
ރައީސް މައުމޫން މިއަދު ޤަބޫލުކުރައްވާ ތާއީދުކުރައްވާ އަސާސްތަކާއި، އަޚްލާޤާއި، ދުރުވިސްނުން ގެންގުޅޭ ހަމައެކަނި ޕާޓީއަކީ އެމް.އާރް.އެމް ކަމަށް ވިދާޅުވެފައިވެއެވެ. އަދި އެމަނިކުފާނު އެދިވަޑައިގަންނަވަނީ އެމަނިކުފާނަށާއި، ޕާޓީގެ އަސާސްތަކާއި ދުރުވިސްނުމަށް ތާއީދުކުރައްވާ އެއްވެސް ބޭފުޅަކު ސިޔާސީ ވާދަވެރިންގެ މަކަރުވެރި ވާހަކަތަކުގައި ޖެހިވަޑައިނުގެން، އެމް.އާރް.އެމް.އަށް ތާއީދުކޮށްދެއްވައި، ޕާޓީއާއެކު ތިއްބެވުމަށް ކަމަށް ވިދާޅުވެފައިވެއެވެ.
